ସମ୍ବଲପୁର: ଖରାର ତାତି ସହ ବଢୁଛି ନିର୍ବାଚନୀ ଉଷ୍ମତା । ମେ 25 ତାରିଖରେ ସମ୍ବଲପୁରରେ ନିର୍ବାଚନ ଅନୁଷ୍ଠିତ ହେବ । ଗତ ଶନିବାର ଦିନ ସମ୍ବଲପୁରର ତାପମାତ୍ରା 43 ଡିଗ୍ରୀ ରହିଥିଲା । ଜିଲ୍ଲାରେ ପ୍ରଚଣ୍ଡ ଗ୍ରୀଷ୍ମ ପ୍ରବାହ ଜାରି ରହିଥିବାବେଳେ ମନୁଷ୍ୟ ଓ ପଶୁ ପକ୍ଷୀ ହନ୍ତସନ୍ତ ହେଉଛନ୍ତି । ଆସନ୍ତା ମେ 25 ରେ ସମ୍ବଲପୁର ସହରରେ ପ୍ରଚଣ୍ଡ ଗ୍ରୀଷ୍ମ ପ୍ରବାହ ଭିତରେ ନିର୍ବାଚନ ହେବ । ତେଣୁ ନିର୍ବାଚନ ପରିଚାଳନା ଜିଲ୍ଲା ପ୍ରଶାସନ ପାଇଁ ବଡ଼ ଚ୍ୟାଲେଞ୍ଜ ସୃଷ୍ଟି କରିଛି । ଏହାକୁ ନେଇ ଜିଲ୍ଲା ପ୍ରଶାସନ ପକ୍ଷରୁ ପ୍ରାକ୍ ପ୍ରସ୍ତୁତି ଆରମ୍ଭ କରାଯାଇଛି ।
ଅଧିକାଂଶ ସମୟରେ ମେ ମାସରେ ସମ୍ବଲପୁରରେ ସର୍ବୋଚ୍ଚ ତାପମାତ୍ରା ରହିଥାଏ । ତେଣୁ ଆସନ୍ତା ମେ 25 ରେ ଲୋକେ ମତଦାନ କରିବାକୁ କେମିତି ଯିବେ ସେନେଇ ଜିଲ୍ଲା ପ୍ରଶାସନ ଚିନ୍ତିତ ରହିଛି । ଦେଶରେ ପ୍ରଥମ ପର୍ଯ୍ୟାୟ ନିର୍ବାଚନରେ ମତଦାନ ହ୍ରାସ ପାଇଥିବା ଦେଖିବାକୁ ମିଳିଥିବାବେଳେ ଏହା ଜିଲ୍ଲା ପ୍ରଶାସନର ଚିନ୍ତା ବଢ଼ାଇଦେଇଛି । ସେଥିପାଇଁ ଜିଲ୍ଲା ପ୍ରଶାସନ ଏବେଠୁ ବିଭିନ୍ନ ପଦକ୍ଷେପ ଗ୍ରହଣ କରିଛି । ପ୍ରଚାର ସମୟରେ ରାଜନୈତିକ ଦଳ ଗୁଡିକ ନିର୍ବାଚନ କମିଶନଙ୍କ ଗାଇଡଲାଇନ ଅନୁପାଳନ କରୁଛନ୍ତି ନା ନାହିଁ ତାହା ଉପରେ ପ୍ରଶାସନ ନଜର ରଖିଛି । ପୂର୍ବାହ୍ନ 11 ଟାରୁ ଅପରାହ୍ନ 3ଟା ପର୍ଯ୍ୟନ୍ତ ନିର୍ବାଚନୀ ସଭା ନ କରିବାକୁ ପରାମର୍ଶ ଦିଆଯାଇଛି । ଏହାସହ ନିର୍ବାଚନୀ ସଭା ସମୟରେ ପର୍ଯ୍ୟାପ୍ତ ଥଣ୍ଡା ପାନୀୟ ଜଳ, ଓଆରଏସ ମହଜୁଦ ରଖିବାକୁ ନିର୍ଦ୍ଦେଶ ଦିଆଯାଇଛି । ରାଜନୈତକ ଦଳ ଗୁଡିକ ନିର୍ବାଚନୀ ସଭା ପାଇଁ ଅନୁମତି ମାଗିବା ପାଇଁ ଆସୁଥିବାବେଳେ ଜିଲ୍ଲା ପ୍ରଶାସନ ଏଭଳି ଗାଇଡଲାଇନ ଅନୁପାଳନ କରିବାକୁ ନିର୍ଦ୍ଦେଶ ଦେଉଛି ବୋଲି ଜିଲ୍ଲାପାଳ କହିଛନ୍ତି ।
ମେ 25 ତାରିଖରେ ନିର୍ବାଚନ ହେବାକୁ ଥିବାବେଳେ ସେହିଦିନ ପୂର୍ବାହ୍ନ 11ଟାରୁ ଅପରାହ୍ନ 3ଟା ପର୍ଯ୍ୟନ୍ତ ଯଥା ସମ୍ଭବ ମତଦାନ କରିବାକୁ ନଯାଇ ଅନ୍ୟ ସମୟରେ ମତଦାନ କରିବାକୁ BLO ମାନେ ଘରକୁ ଘର ଯାଇ ଲୋକ ମାନଙ୍କୁ ପରାମର୍ଶ ଦେଉଛନ୍ତି । ଜିଲ୍ଲାପାଳ କହିଛନ୍ତି, "ଯଦି ବି ଏହି ସମୟରେ କେହି ମତଦାନ କରିବାକୁ ଯାଉଛନ୍ତି ତାହେଲେ ଛତା, ଗାମୁଛା, ପାନୀୟ ଜଳ ସାଙ୍ଗରେ ନେଇ ଯିବା ସହ ଛୋଟ ପିଲାଙ୍କୁ ସାଙ୍ଗରେ ନନେବା ପାଇଁ ପରାମର୍ଶ ଦିଆଯାଇଛି । ନିର୍ବାଚନ ସମୟରେ ପ୍ରତ୍ୟେକ ବୁଥରେ ପର୍ଯ୍ୟାପ୍ତ ପାନୀୟ ଜଳ, ଓଆରଏସ ପାଉଡର ରଖାଯିବ । ଏହାସହ ସହ ମତଦାତାଙ୍କ ପାଇଁ ଛାଇର ବ୍ୟବସ୍ଥା କରାଯିବା ସହ ପାରା ମେଡିକାଲ ଷ୍ଟାଫ ମଧ୍ୟ ନିୟୋଜିତ ରହିବେ । ବୁଥ ଗୁଡିକରେ ଜଳ ସିଞ୍ଚନ କରାଯିବାର ବ୍ୟବସ୍ଥା ମଧ୍ୟ କରାଯିବ ।"
ଇଟିଭି ଭାରତ, ସମ୍ବଲପୁର
