ନିମାପଡ଼ା: ବାର୍ଡ ଫ୍ଲୁ ସଂକ୍ରମିତ ଅଞ୍ଚଳରେ କେନ୍ଦ୍ରୀୟ ଟିମ୍ । ପୁରୀ ଜିଲ୍ଲାରେ ବାର୍ଡ ଫ୍ଲୁ ସଂକ୍ରମଣ ମାଡିଚାଲିଥିବା ବେଳେ ଏହି ସ୍ଥିତିର ସମୀକ୍ଷା ପାଇଁ ଆଜି (ବୁଧବାର) ଓଡ଼ିଶା ଆସିଛନ୍ତି କେନ୍ଦ୍ରୀୟ ଦଳ । କେନ୍ଦ୍ର ପ୍ରାଣୀ ଚିକିତ୍ସା ମନ୍ତ୍ରଣାଳୟର ଆଡିସିନାଲ କମିଶନର ଅଭିଜିତ ମିତ୍ରଙ୍କ ନେତୃତ୍ବରେ କେନ୍ଦ୍ରୀୟ ବିଶେଷଜ୍ଞ ଦଳ ନିମାପଡା ବ୍ଲକର କୋଠକୁସାଙ୍ଗ ଗାଁରେ ପହଞ୍ଚି ସ୍ଥିତି ଅନୁଧ୍ୟାନ କରିଛନ୍ତି । ସେମାନେ ବାର୍ଡ ଫ୍ଲୁ ଚିହ୍ନଟ ହୋଇଥିବା ଅଞ୍ଚଳ, ଫାର୍ମ ପରିଦର୍ଶନ କରିବା ସହିତ ସ୍ଥାନୀୟ କୁକୁଡା ଚାଷୀଙ୍କ ସହ ଆଲୋଚନା କରିଛନ୍ତି । କେତେ କୁକୁଡା ସଂକ୍ରମିତ ହୋଇଛନ୍ତି ସେସବୁର ତଥ୍ୟ ନେଇଛନ୍ତି । ତେବେ ଏଯାଏଁ ସଂକ୍ରମିତ ଅଞ୍ଚଳରେ 30 ହଜାରରୁ ଅଧିକ କୁକୁଡା ମରାଯାଇଥିବା ବେଳେ ଏଯାଏଁ ମଣିଷ ଦେହରେ ଚିହ୍ନଟ ହୋଇନି ବାର୍ଡ ଫ୍ଲୁ ସଂକ୍ରମଣ ।
ଗ୍ରାଉଣ୍ଡରେ କେନ୍ଦ୍ରୀୟ ଟିମ୍ର ସ୍ଥିତି ଅନୁଧ୍ୟାନ:
ଏହି ଟିମ୍ ସହ ରାଜ୍ୟ ପ୍ରାଣୀ ସମ୍ପଦ ବିଭାଗ ନିର୍ଦ୍ଦେଶକ ରାମାଶିଷ ହାଜାରା, ଅତିରିକ୍ତ ନିର୍ଦ୍ଦେଶକ ମିହିର ନାୟକ ଓ ଯୁଗ୍ମ ନିର୍ଦ୍ଦେଶ ରବୀନ୍ଦ୍ର ସେଠ ଉପସ୍ଥିତ ରହିଛନ୍ତି । ପ୍ରାଣୀ ଚିକିତ୍ସା ମନ୍ତ୍ରଣାଳୟ ଆଡିସିନାଲ କମିଶନର ଅଭିଜିତ ମିତ୍ର କହିଛନ୍ତି, "ବାର୍ଡ ଫ୍ଲୁ ସ୍ଥିତି ଓ ଏହାକୁ ରୋକିବାକୁ କ'ଣ ସବୁ ପଦକ୍ଷେପ ନିଆଯାଇଛି, ତାହାର ସମୀକ୍ଷା କରିବାକୁ ଆସିଛୁ । ଏନେଇ ଆସନ୍ତାକାଲି ଆଲୋଚନା କରାଯିବା ପରେ କେନ୍ଦ୍ର ସରକାରଙ୍କ ଆକ୍ସନ ପ୍ଲାନ ଅନୁଯାୟୀ ପଦକ୍ଷେପ ନିଆଯିବ ।"
ପୁରୀ ଜିଲ୍ଲା ବାର୍ଡ ଫ୍ଲୁ ହଟସ୍ପଟ:
ସୂଚନାଥାଉ କି, ବର୍ତ୍ତମାନ ପୁରୀ ଜିଲ୍ଲା ବାର୍ଡ ଫ୍ଲୁ ହଟସ୍ପଟ୍ ପାଲଟିଛି । ଜିଲ୍ଲାର ପିପିଲି, ସତ୍ୟବାଦୀ, ନିମାପଡା ଓ ଡେଲାଙ୍ଗ ବ୍ଲକର ଚାରୋଟି ଗ୍ରାମରେ ବାର୍ଡ ଫ୍ଲୁ ଚିହ୍ନଟ କରାଯିବା ପରେ ରାଜ୍ୟ ସରକାରଙ୍କ ପ୍ରାଣୀ ଚିକିତ୍ସା ବିଭାଗ ପକ୍ଷରୁ ତତ୍ପରତା ପ୍ରକାଶ ପାଇଥିଲା । ସଂକ୍ରମିତ ଅଞ୍ଚଳର ଏକ କିଲୋମିଟର ପରିଧି ମଧ୍ୟରେ ଥିବା କୁକୁଡା ଫାର୍ମରେ ବାର୍ଡ କଲିଂ କରାଯାଇଥିଲା । ଦୁଇଟି ପର୍ଯ୍ୟାୟରେ ଆରଆରଟି ଟିମ୍ ଦ୍ବାରା ବିଭିନ୍ନ ସ୍ଥାନରେ ବାର୍ଡ କଲିଂ ଶେଷ ହେବା ପରେ ଆଜି କେନ୍ଦ୍ରୀୟ ଟିମ୍ ଆସି ଗ୍ରାଉଣ୍ଡରେ ସ୍ଥିତି ଅନୁଧ୍ୟାନ କରିଛନ୍ତି ।
କ୍ଷତିଗ୍ରସ୍ତ କୁକୁଡା ଚାଷୀଙ୍କୁ ଆର୍ଥିକ ସହାୟତା:
ବାର୍ଡ ଫ୍ଲୁ ସଂକ୍ରମଣ ରୋକିବା ପାଇଁ ଏବେ ପିପିଲି ଓ ସତ୍ୟବାଦୀ ବ୍ଲକରେ କୁକୁଡାଗୁଡିକୁ ମରାଯାଇଥିବା ବେଳେ ଡେଲାଙ୍ଗ ଓ ନିମାପଡାରେ ଏହି ଅଭିଯାନ ଜାରି ରହିଛି । 51ଟି ରାପିଡ ରେସପେନ୍ସ ଟିମ୍ ପକ୍ଷୀମାନଙ୍କୁ ମାରିବା ଓ କୁକୁଡା ବିଶୋଧନ କାର୍ଯ୍ୟରେ ନିୟୋଜିତ ହୋଇଛନ୍ତି । ବର୍ତ୍ତମାନ ପର୍ଯ୍ୟନ୍ତ 35 ହଜାର 329ଟି କୁକୁଡା ମରାଯାଇଥିବାବେଳେ 84ଟି ଅଣ୍ଡା ଓ 15 ହଜାର 380 କେଜି କୁକୁଡା ଦାନା ନଷ୍ଟ କରାଯାଇଛି । ସେହିପରି କ୍ଷତିଗ୍ରସ୍ତ କୁକୁଡା ଚାଷୀଙ୍କୁ 20 ଲକ୍ଷ 94 ହଜାର 572 ଟଙ୍କା କ୍ଷତିପୂରଣ ଭାବେ ପ୍ରଦାନ କରାଯାଇଛି । ସେପଟେ ବାର୍ଡ ଫ୍ଲୁ ଯେମିତି ଅଲଗା ଜିଲ୍ଲାକୁ ନ ବ୍ୟାପେ, ସେନେଇ ପ୍ରାଣୀ ସମ୍ପଦ ବିଭାଗ ସଚେତନ ରହିଛି ।
ଇଟିଭି ଭାରତ, ନିମାପଡା
