କେନ୍ଦୁଝର: ରାଜଧାନୀ ରାଜରାସ୍ତାର ଫୁଟପାଥରୁ ଦୀପ ଓ ତେଲ କିଣିଲେ । ସାଙ୍ଗରେ ଥିଲେ ଧର୍ମପତ୍ନୀ । ସେଠାରୁ ସିଧା ପହଞ୍ଚିଲେ ଜନ୍ମମାଟି କେନ୍ଦୁଝର ଜିଲ୍ଲାର ପୈତୃକ ଗ୍ରାମ ରାଇକଳା । ନିଜ ପଡୋଶୀ, ଗ୍ରାମ ତଥା ଅଞ୍ଚଳବାସୀଙ୍କ ସହିତ ପାରମ୍ପରିକ ଆଦିବାସୀ ସମାଜ ଶୈଳୀରେ ପାଳିଲେ ଦୀପାବଳି । ମିଠା ଖାଇଲେ, ବାଣ ଫୁଟାଇଲେ, ପାରମ୍ପରିକ ମାଦଳ ବଜାଇଲେ ଓ ଗ୍ରାମ ତଥା ଅଞ୍ଚଳବାସୀଙ୍କୁ ଦୀପାବଳିର ଶୁଭେଚ୍ଛା ଜଣାଇଲେ । ମୁଖ୍ୟମନ୍ତ୍ରୀ ହେବା ପରେ କିଛି ଏପରି ଢଙ୍ଗରେ ପ୍ରଥମଥର ଆଲୋକର ପର୍ବ ଦୀପାବଳିକୁ ପାଳନ କରିଛନ୍ତି ମୋହନ ଚରଣ ମାଝୀ ।
- ସାନ୍ତାଳୀ ପରମ୍ପରାରେ ବନ୍ଦଣା ପର୍ବ ଓ ଗୋଠାଣ ପୂଜା
ଗତକାଲି (ଗୁରୁବାର) ଅପରାହ୍ନରେ ମୁଖ୍ୟମନ୍ତ୍ରୀ ଏକ ସ୍ବତନ୍ତ୍ର ବିମାନରେ ଦୁଇଦିନିଆ ଗସ୍ତରେ କେନ୍ଦୁଝରେ ପହଞ୍ଚିଥିଲେ । ସେଠାରୁ ସେ ସିଧା ପୈତୃକ ଗ୍ରାମ ରାଇକଳା ପହଞ୍ଚିଥିଲେ । ମୁଖ୍ୟମନ୍ତ୍ରୀ ହୋଇଥିବା ଗାଁର ପୁଅକୁ ଦୀପାବଳି ଅବସରରେ ସ୍ବାଗତ କରିବା ପାଇଁ ପୂରା ଗ୍ରାମବାସୀ ଉତ୍ସାହିତ ଥିଲେ । ଏକାଠି ହୋଇଥିଲେ ପଡୋଶୀ, ଗ୍ରାମବାସୀ ଓ ଆଖପାଖ ଅଞ୍ଚଳର ମୁରବୀଙ୍କ ସମେତ ବହୁ ଶୁଭେଚ୍ଛୁ ଓ ପ୍ରଶଂସକ । ମୁଖ୍ୟମନ୍ତ୍ରୀ ପହଞ୍ଚିବା ପରେ ସମ୍ପୂର୍ଣ୍ଣ ସାନ୍ତାଳୀ ସମ୍ପ୍ରଦାୟର ପରମ୍ପରା ଅନୁସାରେ ସ୍ବାଗତ କରାଯାଇଥିଲା । ପ୍ରଥମେ ପାଦ ଧୋଇ ଦେଇଥିଲେ ଗ୍ରାମର ମହିଳାମାନେ ଓ ଏହା ପରେ ଆରମ୍ଭ ହୋଇଥିଲା ବନ୍ଦଣା ପର୍ବ (ବନ୍ଦାଣ ବିଧି) ।
- ମାଦଳ ବଜାଇଲେ, ଶୁଭେଚ୍ଛା ଜଣାଇଲେ
ଗ୍ରାମବାସୀଙ୍କ ସହ ମିଠା ଖାଇ ଦୀପାବଳି ଶୁଭେଚ୍ଛା ଜଣାଇଥିଲେ ମୁଖ୍ୟମନ୍ତ୍ରୀ । ଗ୍ରାମବାସୀଙ୍କ ଗହଣରେ ବାଣ ଫୁଟାଇଥିଲେ । ପରେ ପାରମ୍ପରିକ ଭାବେ ମୃଦଙ୍ଗ (ମାଦଳ) ବଜାଇଥିଲେ ମୁଖ୍ୟମନ୍ତ୍ରୀ । ଗ୍ରାମବାସୀଙ୍କ ସହ ମିଶି କାନ୍ଧରେ ମୃଦଙ୍ଗ ପକାଇ ମୁଖ୍ୟମନ୍ତ୍ରୀ ବେଶ କିଛି ସମୟ ବଜାଉଥିବା ଦେଖିବାକୁ ମିଳିଥିଲା । ସାନ୍ତାଳୀ ସଂସ୍କୃତିରେ କୌଣସି ପାର୍ବଣ ସମୟରେ ପାରମ୍ପରିକ ବାଦ୍ୟଯନ୍ତ୍ରରେ ନାଚ ଗୀତର ପରମ୍ପରା ରହିଛି । ଏହାକୁ ସ୍ଥାନୀୟ ଭାଷାରେ ‘ଧିଙ୍ଗ୍ୱାନି ନାଚ’ ବୋଲି କୁହାଯାଏ ।
- ପିଲାବେଳୁ ସାମିଲ ହୋଇଆସୁଛି: ମୁଖ୍ୟମନ୍ତ୍ରୀ
ଏହି ଅବସରରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କହିଛନ୍ତି," ଆମ ଗାଁ ରାଇକଳାରେ ପାଳନ କରାଯାଉଥିବା ଦୀପାବଳି ପର୍ବକୁ ‘ବନ୍ଦଣା ପର୍ବ’ କୁହାଯାଏ । ଏଥିରେ ‘ଗୋଠାଣ ପୂଜା’ କରାଯାଏ । ଆମ ସାହିରେ କରାଯାଉଥିବା ଏହି ପୂଜାପାଠରେ ଯୋଗ ଦେବାପାଇଁ ମୁଁ ସ୍ବତନ୍ତ୍ର ଭାବେ ଆସିଛି । ଯେହେତୁ ଛୋଟବେଳୁ ମୁଁ ଏହି ପୂଜାରେ ସବୁବେଳେ ସାମିଲ ହୁଏ, ଏ ପୂଜାକୁ ମୁଁ ଭୁଲିପାରିନାହିଁ । ତେଣୁ ଏଥିରେ ସାମିଲ ହେବାକୁ ଆସିଛି । ଆମ ଗାଁରେ ଲୋକମାନେ ମାଦଳ ବଜାଇଲେ, ଗୀତଗାଇ ନାଚିଲେ , ଘରକୁ ଘର ବୁଲିଲେ । ଏହାକୁ ଧିଙ୍ଗ୍ୱାନି ନାଚ କୁହାଯାଏ । ଏହି ନାଚ ଗୀତରେ ମୁଁ ମିଲ ହେଲି । ଏ ପର୍ବରେ ଓଡ଼ିଆ ଅସ୍ମିତାର କଥା ଅଛି ।’’
- ଆଜି କେନ୍ଦୁଝର କାଳୀପୂଜା ବୁଲିବେ ମୁଖ୍ୟମନ୍ତ୍ରୀ:-
ଆହୁରି ମଧ୍ୟ ମୁଖ୍ୟମନ୍ତ୍ରୀ କହିଛନ୍ତି, କେନ୍ଦୁଝର ସହରରେ ଧୁମଧାମରେ କାଳୀପୂଜା ହୁଏ । ମୁଁ ସେସବୁ ଯାଗାକୁ ଯାଇ ମା' କାଳୀଙ୍କୁ ଦର୍ଶନ କରିବି । ଆମ ଘରେ ଆସନ୍ତାକାଲି (ଆଜି, ଶୁକ୍ରବାର) ଗୋବର୍ଦ୍ଧନ ପୂଜା ହେବ । ଏହାକୁ ଗୁହାଳ ପୂଜା ମଧ୍ୟ କୁହାଯାଏ । ଆମେ ତାହା ପାଳନ କରିବୁ । କାଳୀ ପୂଜାକୁ ଆମ ସାନ୍ତାଳୀ ସମାଜରେ ‘ସହରାଇ ପରବ’ କୁହାଯାଏ । ଏହାକୁ ବି ପାଳନ କରିବୁ । "
- ଏଠାରେ ଉଲ୍ଲେଖଯୋଗ୍ୟ ଯେ, ନିକଟରେ ଶେଷ ହୋଇଥିବା ଶାରଦୀୟ ପାର୍ବଣ ଦୁର୍ଗାପୂଜାରେ ମଧ୍ୟ ମୁଖ୍ୟମନ୍ତ୍ରୀ ମୋହନ ମାଝୀ କେନ୍ଦୁଝର ଗସ୍ତ କରିଥିଲେ । ଏକାଧିକ ପୂଜା କମିଟି ପକ୍ଷରୁ ମୁଖ୍ୟମନ୍ତ୍ରୀଙ୍କୁ ନିମନ୍ତ୍ରଣ କରାଯାଇଥିଲା । କଟକ ଓ ଭୁବନେଶ୍ବରରେ ବିଭିନ୍ନ ପୂଜା ମଣ୍ଡପ ବୁଲିବା ପରେ ମୁଖ୍ୟମନ୍ତ୍ରୀ ଗୃହଜିଲ୍ଲା କେନ୍ଦୁଝରରେ ମଧ୍ୟ ଦୁର୍ଗାପୂଜାର ମଜା ନେଇଥିଲେ । ଏବେ ଦୀପାବଳିରେ ମଧ୍ୟ ସେ ନିଜ ଗାଁକୁ ଯିବାକୁ ଭୁଲି ନାହାନ୍ତି ।
ଇଟିଭି ଭାରତ, କେନ୍ଦୁଝର
