ହାଇଦ୍ରାବାଦ: ଚଳିତ ଆଇପିଏଲ ସିଜିନରେ ଧୂଆଁଧାର ବ୍ୟାଟିଂ କରି ଫ୍ୟାନ୍ସଙ୍କ ହୃଦୟ ଜିତିଛନ୍ତି ମହେନ୍ଦ୍ର ସିଂ ଧୋନି । ଅଧିନାୟକ ଦାୟିତ୍ବରୁ ଓହରିଥିଲେ ମଧ୍ୟ ଜଣେ ଖେଳାଳି ଭାବେ ସିଏସକେ ଟିମରେ ଖେଳୁଛନ୍ତି । ପିଚରେ ତାଙ୍କର ହେଲିକପ୍ଟର ସଟର ମଜା ନେଉଛନ୍ତି ଦର୍ଶକ । ଏହାରି ମଧ୍ୟରେ ଆସନ୍ତା 2025 ଆଇପିଏଲ ସିଜିନ ଧୋନି ଖେଳିବେ କି ନାହିଁ ବୋଲି ପ୍ରଶ୍ନ ଉଠିଥିବା ବେଳେ ବଡ ଖୁଲାସା କରିଛନ୍ତି ସିଏସକେର ପୂର୍ବତନ ଖେଳାଳି ସୁରେଶ ରାଇନା । ଆସନ୍ତାବର୍ଷ ମଧ୍ୟ ମାହି ଆଇପିଏଲ ଖେଳିବେ ବୋଲି କହିଛନ୍ତି ରାଇନା । ଗତ 16 ତାରିଖରେ ହାଇଦ୍ରାବାଦ ଓ ଆରସିବି ମଧ୍ୟରେ ମ୍ୟାଚ ଖେଳାଯାଉଥିବା ବେଳେ ଜିଓ ସିନେମାରେ କମେଣ୍ଟ୍ରି ସମୟରେ ଏପରି କହିଥିଲେ ରାଇନା ।
ଆଗାମୀ ଆଇପିଏଲ ଧୋନି ଖେଳିବେ ନାହିଁ ବୋଲି ସୁରେଶ ରାଇନାଙ୍କୁ ପ୍ରଶ୍ନ ପଚରା ଯାଇଥିଲା । ଏହାର ଉତ୍ତରରେ ସେ କହିଥିଲେ, 'ଖେଲେଙ୍ଗେ' । ମାନେ ଆସନ୍ତା ବର୍ଷ ମଧ୍ୟ ଧୋନି ଆଇପିଏଲ ଖେଳିବେ ବୋଲି ସେ ଇସାରା ଦେଇଥିଲେ । ଗତବର୍ଷ ଆଇପିଏଲରେ ଧୋନି ଅବସର ନେବା ନେଇ ଚର୍ଚ୍ଚା ହେଉଥିଲା । କିନ୍ତୁ ଦଳ ଫାଇନାଲରେ ବିଜୟୀ ହେବା ପରେ ସେ ଚେନ୍ନାଇ ପାଇଁ ପୁଣି ଖେଳିବେ ବୋଲି କହିଥିଲେ । ଚଳିତ ସିଜିନରେ ଧୋନିଙ୍କ ପ୍ରଦର୍ଶନ ଭଲ ରହିଥିଲେ ମଧ୍ୟ ଆଗାମୀ ସିଜିନ ସେ ଖେଳିବେ କି ନାହିଁ ସେନେଇ କିଛି ସ୍ପଷ୍ଟ କରିନାହାନ୍ତି । ଚଳିତ ସିଜିନ ଆରମ୍ଭ ହେବା ପୂର୍ବରୁ ସିଏସକେ ଟିମର ଅଧିନାୟକ ପଦ ଛାଡ଼ିଥିଲେ ମହେନ୍ଦ୍ର ସିଂହ ଧୋନି । ତାଙ୍କ ବଦଳରେ ଦଳର ନେତୃତ୍ବ ନେଉଛନ୍ତି ଋତୁରାଜ ଗାଇକ୍ବାଡ । ଚଳିତ ବର୍ଷ ଧୋନିଙ୍କ ଶେଷ ଆଇପିଏଲ ସିଜିନ ହୋଇପାରେ ବୋଲି ଚର୍ଚ୍ଚା ହେଉଛି ।
ଏପ୍ରିଲ 14 ତାରିଖରେ ମୁମ୍ବାଇ ବିପକ୍ଷରେ ଖେଳାଯାଇଥିବା ମ୍ୟାଚରେ ମହେନ୍ଦ୍ର ସିଂ ଧୋନିଙ୍କ ଧୂଆଁଧାର ବ୍ୟାଟିଂ ଦେଖିବାକୁ ମିଳିଥିଲା । ଶେଷ 4 ବଲରେ ସେ ବ୍ୟାଟିଂ କରିବାକୁ ଆସି ହ୍ୟାଟ୍ରକି ଛକା ମାରିଥିଲେ । 4 ବଲରେ ସେ 20 ରନ କରି ଅପରାଜିତ ରହିଥିଲେ । ସେହିପରି ଦିଲ୍ଲୀ ବିପକ୍ଷ ମ୍ୟାଚରେ 8 ନମ୍ବରରେ ବ୍ୟାଟିଂ କରିବାକୁ ଆସି ଅନ୍ତିମ ଓଭରରେ 2ଟି ଛକା ଓ 2ଟି ଚୌକା ମାରି 20 ରନ ସଂଗ୍ରହ କରିଥିଲେ ।
