ନୂଆଦିଲ୍ଲୀ : ପ୍ୟାରିସ୍ ଅଲିମ୍ପିକ୍ସ 2024ରେ କୁସ୍ତି ଫାଇନାଲରେ ପହଞ୍ଚି ଭାରତୀୟ ଷ୍ଟାର ରେସଲର ଭିନେଶ ଫୋଗାଟ ଦେଶ ପାଇଁ ମେଡାଲ ପକ୍କା କରିସାରିଥିଲେ । ହେଲେ ଫାଇନାଲ ମ୍ୟାଚ୍ ପୂର୍ବରୁ ହିଁ ତାଙ୍କୁ ଅଲିମ୍ପିକ୍ସରୁ ଅଯୋଗ୍ୟ ଘୋଷଣା କରାଯାଇଥିଲା । ଏହାପରେ ଭିନେଶ ଓ ଭାରତୀୟ ଅଲିମ୍ପିକ ସଂଘ କୋର୍ଟ ଅଫ ଆର୍ବିଟ୍ରେସନ୍ ଫର ସ୍ପୋର୍ଟ (CAS)ରେ ୟୁନାଇଟେଡ ୱାର୍ଲ୍ଡ ରେସଲିଂ (UWW) ନିଷ୍ପତ୍ତି ବିରୋଧରେ ଆବେଦନ କରିଥିଲେ । ଯାହାର ଶୁଣାଣି ପରେ CAS ଏହି ଆବେଦନକୁ ଖାରଜ କରିଦେଇଥିଲା । ଯଦିଓ ସେହି ସମୟରେ CAS ଏହାର ନିଷ୍ପତ୍ତି ଗୋଟିଏ ଧାଡିରେ ଦେଇଥିଲେ ଏବଂ ପ୍ରତ୍ୟାଖ୍ୟାନ ପାଇଁ କୌଣସି କାରଣ ଦର୍ଶାଯାଇନଥିଲା, ଏବେ କିନ୍ତୁ ଭିନେଶଙ୍କ ଆବେଦନ ଖାରଜ କରିବାର କାରଣ ଦର୍ଶାଇଛି CAS ।
Full judgement is out #VineshPhogat.
— Abhijit Deshmukh (@iabhijitdesh) August 19, 2024
The CAS has ruled that athletes must strictly comply with their weight limits, allowing no exceptions. This decision was emphasized in their rejection of Indian wrestler Vinesh Phogat’s appeal against her disqualification from the Paris… pic.twitter.com/MBUGmIEm7C
କାରଣ କହିଲେ ଭିନେଶ :-
ଆବେଦନକୁ ପ୍ରତ୍ୟାଖ୍ୟାନ କରିବାର କାରଣ ଦର୍ଶାଇ CASର ଏକ ଆଡ୍-ହକ୍ ଡିଭିଜନ୍ କହିଛନ୍ତି ଯେ, ଖେଳାଳିମାନେ ନିଶ୍ଚିତ କରିବାକୁ ପଡିବ ଯେ ସେମାନେ ସେମାନଙ୍କର ଓଜନ ବର୍ଗରେ ଓଜନ ସୀମା ତଳେ ରହିଛନ୍ତି ଏବଂ କୌଣସି ପରିସ୍ଥିତିରେ ଏଥିରେ ବ୍ୟତିକ୍ରମକୁ ଗ୍ରହଣ କରାଯାଇପାରିବ ନାହିଁ । CAS କହିଛନ୍ତି, "ଓଜନ ସୀମା ସମ୍ବନ୍ଧୀୟ ନିୟମ ଆଗରୁ ସ୍ପଷ୍ଟ ଏବଂ ସମସ୍ତ ଅଂଶଗ୍ରହଣକାରୀଙ୍କ ପାଇଁ ସମାନ । ଏଥିପାଇଁ କୌଣସି ସହନଶୀଳତା ପ୍ରଦାନ କରାଯାଇ ପାରିବ ନାହିଁ, ତାଙ୍କର (ଭିନେଶଙ୍କର) ଓଜନ ନିର୍ଦ୍ଧାରିତ ସୀମାରୁ ଉପରେ ଥିଲା । ଯେତେବେଳେ କି ଏଥିରେ ସାମାନ୍ୟ ଓଜନ ମଧ୍ୟ ଅନୁମତିପ୍ରାପ୍ତ ନୁହେଁ । ଏହା ଆଥଲେଟଙ୍କୁ ସ୍ପଷ୍ଟ କରିବାକୁ ହେବ ଯେ ସେମାନେ ସେହି ଓଜନ ସୀମା ତଳେ ରହିଛନ୍ତି । ଏଥିରେ କୌଣସି ବିବାଦ ନାହିଁ ଯେ ଆବେଦନକାରୀଙ୍କ ଓଜନ ନିର୍ଦ୍ଧାରିତ ସୀମାଠାରୁ ଅଧିକ ଥିଲା । ଶୁଣାଣି ସମୟରେ ସେ ନିଜେ ଏହାକୁ ସ୍ପଷ୍ଟ କରିଛନ୍ତି । ସେ କହିଥିଲେ ଯେ 100 ଗ୍ରାମ ଓଜନ ଅଧିକ ଥିଲା ଏବଂ ଏହା ଉପରେ ସହନଶୀଳତା ପ୍ରୟୋଗ କରାଯିବା ଉଚିତ । କାରଣ ଏହି ଓଜନ ସ୍ବଳ୍ପ ଏବଂ ପାଣି ପିଇବାରୁ ବଢ଼ିଯାଇଛି । ହେଲେ ଓଜନ ସୀମା ସମ୍ବନ୍ଧୀୟ ନିୟମ ସମସ୍ତ ଅଂଶଗ୍ରହଣକାରୀଙ୍କ ପାଇଁ ସମାନ । ଏଥିରେ କୌଣସି ସହନଶୀଳତା ପ୍ରଦାନ କରାଯାଇ ପାରିବ ନାହିଁ ।"
100 ଗ୍ରାମ ଓଜନ ଯୋଗୁଁ ପଦକ ହରାଇଲେ :-
ପ୍ରକାଶ ଥାଉ, ଅଲିମ୍ପିକ୍ସରେ ମହିଳା 50 କିଲୋଗ୍ରାମ ଫ୍ରିଷ୍ଟାଇଲ ରେସ୍ଲିଂରେ ସେମିଫାଇାନଲରେ ବିଜୟୀ ହେବାପରେ ଫାଇାନଲରେ ପ୍ରବେଶ କରିଥିଲେ ଭିନେଶ ଫୋଗାଟ । ଏହା ପରଦିନ ତାଙ୍କର ଫାଇନାଲ ମ୍ୟାଚ୍ ରହିଥିଲା । କିନ୍ତୁ ଏହା ପୂର୍ବରୁ ସେ ଅଯୋଗ୍ୟ ଘୋଷିତ ହୋଇଥିଲେ । 50 କିଲୋଗ୍ରାମରୁ ମାତ୍ର 100 ଗ୍ରାମ ଅଧିକ ଓଜନ ହେବାରୁ ଫାଇନାଲରୁ ବଞ୍ଚିତ ହେବା ସହ ପଦକ ମଧ୍ୟ ହାତରୁ ଚାଲିଯାଇଥିଲା । ଏହି ଖବର ଶୁଣିବା ପରେ ପୁରା ଭାଙ୍ଗି ପଡିଥିଲେ ଭିନେଶ । ଭିନେଶଙ୍କ ସମେତ ଭାରତୀୟ ଅଲିମ୍ପିକ୍ସ ଆସୋସିଏସନ କୋର୍ଟ ଅଫ୍ ଆର୍ବିଟ୍ରେସନ ଫର ସ୍ପୋର୍ଟ୍ସ (CAS)ରେ ସଂଯୁକ୍ତ ରୌପ୍ୟ ପଦକ ପାଇଁ ଆବେଦନ କରିଥିଲେ । କିନ୍ତୁ ଏହାକୁ ଖାରଜ କରିଦେଇଥିଲେ CAS । ଫଳରେ ଭିନେଶଙ୍କ ରୌପ୍ୟ ପଦକ ଆଶା ମଉଳି ଯାଇଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
