ଭୁବନେଶ୍ବର: ନବୀନ ନିବାସରେ ଶେଷ ହୋଇଛି ତିନି ଜିଲ୍ଲାର ସମୀକ୍ଷା ବୈଠକ । ସଂଗଠନ ସଜାଡ଼ିବା ସହ ନେତା ଓ କର୍ମୀଙ୍କୁ ସକ୍ରିୟ କରୁଛି ଦଳ । ବିଭିନ୍ନ ସଂସଦୀୟ କ୍ଷେତ୍ରର ନେତାଙ୍କୁ ନବୀନ ନିବାସ ଡାକି ଦଳ ପକ୍ଷରୁ ହେଉଛି ଆଲୋଚନା । ଏହି କ୍ରମରେ ଆଜି ସୁନ୍ଦରଗଡ, ସମ୍ବଲପୁର ଓ ଢେଙ୍କାନାଳ ତିନି ଜିଲ୍ଲାର ସଂସଦୀୟ କ୍ଷେତ୍ରରେ ଦଳର ସ୍ଥିତିକୁ ନେଇ ହୋଇଛି ଆଲୋଚନା । ତେବେ ଆଗକୁ ସାଧାରଣ ନିର୍ବାଚନ ଆସୁଥିବା ବେଳେ ଦଳର ସ୍ଥିତିକୁ ସୁଦୃଢ କରିବା ସହ ନିର୍ବାଚନୀ ରଣନୀତିକୁ ନେଇ ଏହି ସମୀକ୍ଷା ବୈଠକ ହୋଇଥିବା ଜଣାପଡ଼ିଛି । ଦଳର ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ, ସାଂସଦ, ବିଧାୟକ ଓ ବରିଷ୍ଠ ନେତାଙ୍କୁ ନେଇ ଏହି ବୈଠକ କରାଯାଇଛି । ଏହି ବୈଠକରେ ସାଧାରଣ ଲୋକଙ୍କ ସହ ଯୋଡି ହୋଇ ଜଣେ ଶୃଙ୍ଖଳିତ ସାଧାରଣ କର୍ମୀ ହୋଇ ତୃଣମୂଳ ସ୍ତରରେ ଯାଇ କାର୍ଯ୍ୟ କରିବାକୁ ନେତାଙ୍କୁ ମୁଖ୍ୟମନ୍ତ୍ରୀ ପରାମର୍ଶ ଦେଇଛନ୍ତି ।
ଢେଙ୍କାନାଳ ସଂସଦୀୟ କ୍ଷେତ୍ରର ବୈଠକ ସରିଲା ପରେ ସାଂସଦ ମହେଶ ସାହୁ ପ୍ରତିକ୍ରିୟା ରଖି କହିଛନ୍ତି, "ବୈଠକରେ ସଂଗଠନ କାର୍ଯ୍ୟକୁ ତ୍ବରାନ୍ୱିତ କରିବାକୁ ନିର୍ଦ୍ଦେଶ ଦିଆଯାଇଛି । ମୁଖ୍ୟମନ୍ତ୍ରୀ ଉପରେ ରାଜ୍ୟବାସୀଙ୍କ ବିଶ୍ୱାସ ଆଶୀର୍ବାଦ ରହିଛି । ଏହି ବିଶ୍ୱାସକୁ ନେଇ ବିଜେଡି ଲୋକଙ୍କ ପାଖକୁ ଯାଉଥିବା ବେଳେ ଅପହଞ୍ଚ ଇଲାକରେ ମଧ୍ୟ ପହଞ୍ଚିଛି । ଆମେ ସାଧାରଣ କର୍ମୀ ହୋଇ ଜନସାଧାରଣଙ୍କ ପାଇଁ କାମ କରୁଛି । ତେଣୁ ଲୋକଙ୍କ ପାଖକୁ ଯାଇ ସିଧାସଳଖ ତାଙ୍କ ସମସ୍ୟାକୁ ବୁଝିବା ସହ ବିଜେଡି ବିକାଶର ବାର୍ତ୍ତା ନେଇ ନିର୍ବାଚନୀ ପ୍ରଚାର କରିବ ।" ଏହାସହ ରାଜ୍ୟରେ ମଠ ମନ୍ଦିର ରୂପାନ୍ତରିତ କରଣ କଥା କହିଛନ୍ତି ମହେଶ ସାହୁ । ମୁଖ୍ୟମନ୍ତ୍ରୀଙ୍କ ନେତୃତ୍ୱରେ ୧୪୭ ଓ ୨୧ ଆସନରେ ସାଧାରଣ କର୍ମୀ ହିସାବରେ ଲଢେଇ କରିବେ ବୋଲି ମହେଶ କହିଛନ୍ତି । ଧର୍ମେନ୍ଦ୍ର ପ୍ରଧାନଙ୍କ ସମ୍ବଲପୁରୀ ପ୍ରାଥୀତ୍ୱକୁ ନେଇ ସେ କହିଲେ ‘‘ଯିଏ ଯେଉଁଛି ଠିଆ ହେଲେ ମଧ୍ୟ କିଛି ଫରକ ପଡ଼ିବନି । ସେ ମହେଶ ସାହୁ ହଉ କିମ୍ବା ବବି ଦାଶ, ମୁଖ୍ୟମନ୍ତ୍ରୀ ଯାହାକୁ ଯେଉଁଠି ନିର୍ଦ୍ଦେଶ ଦେବେ ସେ ସେଠି ଲଢ଼ିବ ଆଉ ବିଜେଡି ବିକାଶର ଧାରାକୁ ନେଇ ଜିତିବ ।’’
ସେପଟେ ସମୀକ୍ଷା ବୈଠକ ପରେ ରଘୁନାଥପାଲି ବିଧାୟକ ସୁବ୍ରତ ତରାଇ କହିଛନ୍ତି, "ବୈଠକରେ ଦଳ କିପରି 7 ବିଧାନସଭା ସହ ଲୋକସଭାରେ ବିଜୟୀ ହେବ ସେଥିପାଇଁ ସ୍ୱତନ୍ତ୍ର ଯୋଜନା କରାଯାଇଛି। ଫଳରେ ବୁଥ ସ୍ତରକୁ ଯିବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି । ଦଳ ଲୋକଙ୍କ ପାଇଁ କାମ କରୁଛି ।" ବିଶେଷ କରି ସମୀକ୍ଷା ବୈଠକରେ ଜୁଏଲଙ୍କୁ ହରାଇବାକୁ ବିଜେଡିର ଯୋଜନା ରହିଥିବା ବେଳେ ତାଙ୍କୁ ଏଥର ଚେକ୍ ଦେବା ପାଇଁ BJD ପ୍ରସ୍ତୁତ । ଦଳ ସୁପ୍ରିମୋ ବ୍ଲୁ ପ୍ରିଣ୍ଟ ପ୍ରସ୍ତୁତ କରିଛନ୍ତି। ଜୁଏଲ ଓରାମଙ୍କୁ ଏଥର ନିଶ୍ଚିତ ହରେଇବୁ । ଆମ ବିଜୟ ନିଶ୍ଚିତ। ଏପଟେ ଦଳ କାହାକୁ ପ୍ରାର୍ଥୀ କରିବ ସେ ନିଷ୍ପତ୍ତି ମୁଖ୍ୟମନ୍ତ୍ରୀ ନେବେ ।’’ ବିଜେଡିର ୭ ଟା ବିଧାନସଭା ସହ ଲୋକସଭା ଆସନ ପାଇଁ ଆଲୋଚନା ହେଲା। ସବୁ ସିଟରେ କେମିତି ବିଜେଡିର ବାଜିମାତ ହେବ ତା ଉପରେ ଆଲୋଚନା ହେଲା । ଏଥର ଦଳ ସବୁ ଆସନରେ ଜିତିବ। ଲୋକସଭାରୁ କିଏ ଲଢ଼ିବେ ସେ ନେଇ ନିଷ୍ପତ୍ତି ନବୀନ ପଟ୍ଟନାୟକ ନେବେ। ସଂଗଠନକୁ ଆହୁରି ମଜବୁତ କରିବା ପାଇଁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଥିବା ବିଧାୟକ ରୋହିତ ପୂଜାରୀ କହିଛନ୍ତି ।
ଇଟିଭି ଭାରତ, ଭୁବନେଶ୍ବର
