ନୂଆଦିଲ୍ଲୀ: ଉତ୍ତର ପ୍ରଦେଶର ଦୁଇ ଚର୍ଚ୍ଚିତ ଆସନ ଆମେଠୀ ଓ ରାୟବରେଲୀରେ କଂଗ୍ରେସର ପ୍ରାର୍ଥୀ କିଏ ହେବେ, ସେ ନେଇ ଚର୍ଚ୍ଚା ଜାରି ରହିଛି । ସେଥିରେ ଏବେ ଭିନ୍ନମୋଡ ଦେଖିବାକୁ ମିଳିପାରେ । ଏବେ ସୂତ୍ରରୁ ମିଳିଥିବା ସୂଚନା ଅନୁସାରେ, ଆମେଠୀ ଆସନରୁ ନୁହେଁ ବରଂ ରାୟବରେଲୀରୁ ନାମାଙ୍କନ ଭରିପାରନ୍ତି ଦଳର ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀ । ସେହିପରି ପ୍ରିୟଙ୍କାଙ୍କ ନିର୍ବାଚନୀ ଡେବ୍ୟୁ ରାୟବରେଲୀରୁ ହେବା ନେଇ ଚର୍ଚ୍ଚା ଜାରି ରହିଥିଲା, ସେଥିରେ ମଧ୍ୟ ଭିନ୍ନ ସଙ୍କେତ ମିଳିଛି । ପ୍ରିୟଙ୍କା ଏଥର ରାଏବରେଲୀ ନୁହେଁ ବରଂ ନିର୍ବାଚନରେ ପ୍ରତିଦ୍ବନ୍ଦ୍ବିତାରେ ଡେବ୍ୟୁ କରିନପାରନ୍ତି । ନିକଟରେ ଦଳର କେନ୍ଦ୍ରୀୟ ନିର୍ବାଚନ କମିଟି ବୈଠକ ଶେଷ ହୋଇଥିଲେ ସୁଦ୍ଧା ଦଳ ଏପର୍ଯ୍ୟନ୍ତ କେହି ପ୍ରାର୍ଥୀଙ୍କ ନାମ ସାମ୍ନାକୁ ଆଣିନି । ଅହେତୁକ ବିଳମ୍ବ ମଧ୍ୟରେ ରାଜନୈତିକ ସୂତ୍ରରୁ ଏପରି ଖବର ଜାତୀୟ ରାଜନୀତିକୁ ଉଷ୍ମ କରିବାରେ ଲାଗିଛି ।
ପୂର୍ବରୁ ମିଳିଥିବା ସୂଚନା ଅନୁସାରେ, ଉତ୍ତର ପ୍ରଦେଶ କଂଗ୍ରେସ କମିଟି ରାହୁଲଙ୍କୁ ଆମେଠୀରୁ ଓ ପ୍ରିୟଙ୍କାଙ୍କୁ ରାୟବରେଲୀରୁ ନିର୍ବାଚନ ଲଢାଇବା ପାଇଁ କେନ୍ଦ୍ରୀୟ କମିଟିକୁ ସୁପାରିଶ କରିଥିଲା । ଦଳର ପ୍ରଦେଶ ପ୍ରଭାରୀ ଅବିନାଶ ପାଣ୍ଡେ ଓ ବିଧାୟକ ଦଳ ନେତା ଆରାଧାନା ମିଶ୍ର ଓ ଅନ୍ୟ ନେତାମାନେ ଏହି ପ୍ରସ୍ତାବ ସହ ହାଇକମାଣ୍ଡ ଖଡଗେଙ୍କ ଦୃଷ୍ଟି ଆକର୍ଷଣ କରିଥିଲେ । ମାତ୍ର କେନ୍ଦ୍ରୀୟ ନିର୍ବାଚନ କମିଟି ବୈଠକ ଶେଷ ହୋଇଥିଲେ ସୁଦ୍ଧା ଦଳ ଏହି ଦୁଇ ଆସନରେ ପ୍ରାର୍ଥୀ ଘୋଷଣା କରିନି ।
ତେବେ ମା’ ସୋନିଆ ଗାନ୍ଧୀ ରାଜ୍ୟସଭାକୁ ନିର୍ବାଚିତ ହେବା ପରେ ତାଙ୍କ ପାରମ୍ପରିକ ଆସନ ରାୟବରେଲୀର ଝିଅ ତଥା କଂଗ୍ରେସ ରାଷ୍ଟ୍ରୀୟ ସାଧାରଣ ସମ୍ପାଦିକା ପ୍ରିୟଙ୍କା ଗାନ୍ଧୀ ନିର୍ବାଚନୀ ଏଣ୍ଟ୍ରି କରିବା ନେଇ ଚର୍ଚ୍ଚା ଆରମ୍ଭ ହୋଇଥିଲା । ତେବେ ରାହୁଲ କେରଳ ଓ୍ବାଇନାଡରୁ ପ୍ରାର୍ଥୀ ହୋଇଛନ୍ତି । ଏହି ଆସନରେ ଭୋଟିଂ ମଧ୍ୟ ଶେଷ ହୋଇଛି । ହେଲେ ଆମେଠୀ ଆସନରୁ ମଧ୍ୟ ରାହୁଲଙ୍କ ଲଢିବା ଚର୍ଚ୍ଚାରେ ପୂର୍ଣ୍ଣଚ୍ଛେଦ ପଡୁନି । ବିଜେପି ପ୍ରାର୍ଥୀ ତଥା କେନ୍ଦ୍ରମନ୍ତ୍ରୀ ସ୍ମୃତି ଇରାନୀ ଏହି ଆସନରୁ ନିର୍ବାଚନ ଲଢୁଥିବା ବେଳେ ତାଙ୍କ ବିରୋଧରେ ରାହୁଲଙ୍କୁ ପ୍ରାର୍ଥୀ ନକରି ଦଳ କାହିଁକି ରାୟବରେଲୀରୁ ପ୍ରାର୍ଥୀ କରିବାକୁ ବିଚାର କରୁଛି, ତାହା ମଧ୍ୟ ପ୍ରଶ୍ନଘେରରେ ରହିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
