ବଲାଙ୍ଗୀର: ଦୁର୍ବଳ ହେଉଛି ବଲାଙ୍ଗୀର କଂଗ୍ରେସ । ଦୀର୍ଘ ବର୍ଷର କଂଗ୍ରେସ ସହ ସମ୍ପର୍କ ଛିନ୍ନ ବଲାଙ୍ଗୀରର କଲେ ଯୁବ ନେତା ଆକାଶ ମିଶ୍ର । ପୂର୍ବତନ ବିଧାୟକ ତଥା ସାଂସଦ ବାଳଗୋପାଳ ମିଶ୍ରଙ୍କ ପୁଅ ଆକାଶ ଦଳରେ ତାଙ୍କୁ ଅଣଦେଖା କରାଯାଉଥିବା ଅଭିଯୋଗ ଆଣି ହାତ ଛାଡିଛନ୍ତି । ତେବେ ବର୍ତ୍ତମାନ ସେ ସ୍ୱାଧୀନ ଭାବେ ରହିବେ ବୋଲି ପ୍ରତିକ୍ରିୟାରେ କହିଛନ୍ତି ।
ବଲାଂଗୀରର ଯୁବ କଂଗ୍ରେସ ନେତା ଆକାଶ ମିଶ୍ର ଦଳର ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଇଛନ୍ତି । ଦଳ ତାଙ୍କୁ ଅଣଦେଖା କରିବା ଓ କୌଣସି ସମୟରେ ସୁଯୋଗ ନ ଦେବାର ଅଭିଯୋଗ ଆଣି ନିଜ ସମର୍ଥକ ସହ ଦଳ ଛାଡିଛନ୍ତି । ଏନେଇ ସେ ପ୍ରତିକ୍ରିୟା ଦେଇ କହିଛନ୍ତି, "ଦୀର୍ଘ ବର୍ଷ ହେଲା କଂଗ୍ରେସ ଦଳରେ ସକ୍ରିୟ ଥିଲି । ଦଳ ଯାହା ଦାୟିତ୍ୱ ଦେଉଥିଲା ତାହା ତୁଲାଇ ଆସୁଥିଲି । ହେଲେ 2015ରୁ କୋଣଠେସା କରାଯାଇଛି । ମୋତେ ଦଳରୁ ସମ୍ମାନ ମିଳିନାହିଁ । ଏବେ ଅସହ୍ୟ ହେବାରୁ ସମର୍ଥକ ସହ ଦଳ ଛାଡିଛି ।"
ସୂଚନା ଯୋଗ୍ୟ, ଆକାଶ ମିଶ୍ର ବଲାଙ୍ଗୀରର ପୂର୍ବତନ ବିଧାୟକ ତଥା ସାଂସଦ ବାଳଗୋପାଳ ମିଶ୍ରଙ୍କ ପୁଅ । ବାଳଗୋପାଳ ମିଶ୍ର ସ୍ୱାଧୀନ ଭାବରେ ଲୋଇସିଂହାରୁ ଚାରି ଥର ବିଧାୟକ ଭାବରେ ନିର୍ବାଚିତ ହୋଇଥିଲେ । ସେହିପରି 1989ରେ ସେ ଜନତା ଦଳରୁ ସାଂସଦ ମଧ୍ୟ ହୋଇଥିଲେ । ତେବେ ବାଳଗୋପାଳଙ୍କ ପରେ ତାଙ୍କ ପୁଅ ଆକାଶ ମିଶ୍ର ସକ୍ରିୟ ରାଜନୀତିକୁ ଆସିଥିଲେ । କଂଗ୍ରେସ ଦଳରେ 14 ବର୍ଷରୁ ଥିଲେ । ସେ ବିଗତ ଦିନରେ ଏଆଇସିସି ପକ୍ଷରୁ ଆସାମ ନିର୍ବାଚନ ଓ ଛତିଶଗଡ଼ ନିର୍ବାଚନରେ ପର୍ଯ୍ୟବେକ୍ଷକ ଭାବରେ ମଧ୍ୟ ଦାୟିତ୍ୱ ତୁଲାଇଥିଲେ । ରାଜ୍ୟ ଯୁବ କଂଗ୍ରେସ ସଭାପତି ଭାବରେ ମଧ୍ୟ ସେ ତାଙ୍କର କାର୍ଯ୍ୟ କରି ଆସୁଥିଲେ । ଦଳ ଛାଡିବା ପୂର୍ବରୁ ସେ ରାଜ୍ୟ ସାଧାରଣ ସମ୍ପାଦକ ମଧ୍ୟ ଥିଲେ । ସେହିପରି ପଶ୍ଚିମ ଓଡିଶା ଚାଷୀ ସଂଗଠନ କରି ସେ ସରକାରଙ୍କ ପାଇଁ ଅଡ଼ୁଆ ପରିସ୍ଥିତି ସୃଷ୍ଟି କରିଥିଲେ । ହେଲେ ଏବେ ସେ ଦଳ ଛାଡିବା ପରେ ନିହାତି ଭାବରେ ବଲାଙ୍ଗୀର କଂଗ୍ରେସ ଦୁର୍ଗ ଭୁଶୁଡିବ ବୋଲି ଚର୍ଚ୍ଚା ହେଉଛି ।
ଇଟିଭି ଭାରତ, ଭୁବନେଶ୍ୱର
