ଖୋର୍ଦ୍ଧା: ନିର୍ବାଚନ ପାଖେଇ ଆସୁଥିବା ବେଳେ ରୋଚକ ମୋଡ଼ ନେଉଛି ଖୋର୍ଦ୍ଧା ରାଜନୀତି । ଖୋର୍ଦ୍ଧା ନିର୍ବାଚନ ମଣ୍ଡଳୀରେ ବିଜେପିକୁ ଲାଗିଛି ଶକ୍ତ ଝଟକା । ବିଜେପିରୁ ଇସ୍ତଫା ଦେଇଛନ୍ତି ଗତ 2019 ନିର୍ବାଚନରେ ବିଜେପି ପ୍ରାର୍ଥୀ ହୋଇଥିବା କାଳୁ ଚରଣ ଖଣ୍ଡାୟତରାୟ । ତେବେ ଦଳରୁ ଇସ୍ତଫା ଦେବା ପରେ ସିଧାସଳଖ ବିଜେପି ସାଂସଦ ପ୍ରାର୍ଥିନୀ ଅପରାଜିତା ଷଡ଼ଙ୍ଗୀଙ୍କୁ ଟାର୍ଗେଟ କରିଛନ୍ତି ।
ବିଜେପିରୁ କାଳୁ ଚରଣ ଖଣ୍ଡାୟତରାୟ ଇସ୍ତଫା ଦେବା ପରେ ଖୋର୍ଦ୍ଧା ବିଜେପି ବର୍ତ୍ତମାନ କମ୍ପନ ସୃଷ୍ଟି ହୋଇଛି । ସାଂସଦ ଅପରାଜିତାଙ୍କ ପାଇଁ ଭବିଷ୍ୟତରେ ନିର୍ବାଚନ ବୈତରଣୀ ପାର ହେବା କଷ୍ଟକର ହୋଇପଡିବ ବୋଲି ଚର୍ଚ୍ଚା ହେଉଛି । ଲଗାତାର କିଛି ଦିନ ଧରି ଖୋର୍ଦ୍ଧା ବିଜେପିରେ କିଛି ଚାଲିଛି ବିଭିନ୍ନ ଦୃଶ୍ୟ । ଖୋର୍ଦ୍ଧା ନିର୍ବାଚନ ମଣ୍ଡଳୀରୁ ବିଜେପି ଟିକଟ ପାଇଁ ଆଶାୟୀ ଥିଲେ କାଳୁ ଚରଣ ଖଣ୍ଡାୟତରାୟ । କିନ୍ତୁ ଦଳ ତାଙ୍କ ବଦଳରେ ପ୍ରଶାନ୍ତ ଜଗଦେବ ଖୋର୍ଦ୍ଧାରୁ ପ୍ରାର୍ଥୀ କରିବା ପରେ କାଳୁ ଚରଣଙ୍କ ସମର୍ଥକ ଏହାକୁ ସହଜରେ ଗ୍ରହଣ କରିପାରିନଥିଲେ । ୨୦୧୯ ମସିହାରେ ୭୪ ହଜାର ଭୋଟ ପାଇଥିବା ବେଳେ ସାଂସଦ ଅପରାଜିତାଙ୍କ ପାଇଁ ୯୦ହଜାର ଭୋଟ କରାଇ ତାଙ୍କର ବିଜୟରେ ଏକ ମୁଖ୍ୟ ଭୂମିକା ନିଭାଇ ଥିଲେ । ଦୀର୍ଘ ୧୦ ବର୍ଷ ଧରି ସଂଗଠନକୁ ତୃଣମୂଳ ସ୍ତରରୁ ମଜଭୁତ କରିଆସୁଥିବା କାଳୁ ଦଳ ପାଇଁ ଅଲୋଡ଼ା ହୋଇଯାଇଛନ୍ତି । ଆଜି ନିଜର ସମର୍ଥକମାନଙ୍କ ସହ ଦଳରୁ ଇସ୍ତଫା ଦେଇଛନ୍ତି ।
ତେବେ କାଳୁ ଚରଣ ବିଜେପିରୁ ଇସ୍ତଫା ଦେବା ପରେ ଏକ ସାମ୍ବାଦିକ ସମ୍ମିଳନୀ କରି ବିଜେପି ସାଂସଦ ପ୍ରାର୍ଥିନୀ ଅପରାଜିତାଙ୍କ ଉପରେ ବର୍ଷିଛନ୍ତି । କାଳୁ କାନ୍ଦି କାନ୍ଦି କହିଛନ୍ତି, "ମୁଁ ଜଣେ ପାଇକ ମାଟିର ପୁଅ । ଏଇ ପାଇକ ମାଟିର ଦ୍ୱାହି ଦେଇ କହୁଛି ମୋ ସହିତ ଛଳନା କରି ମୋତେ ଧୋକା ଦେଇଛନ୍ତି ଅପରାଜିତା ଷଡ଼ଙ୍ଗୀ । ମୁଁ ସ୍ଵାଧୀନ ଭାବରେ ଛିଡ଼ା ହେବି । ମୁଁ ପଛେ ହାରିଯାଏ କିନ୍ତୁ ଅପରାଜିତାଙ୍କୁ ହରାଇବା ପାଇଁ ଦୁଆର ଦୁଆର ବୁଲି ଭିକ୍ଷା ମାଗି ନେହୁରା ହେବି ।"
ତେବେ ବେଗୁନିଆ ବୋଲଗଡ ନିର୍ବାଚନ ମଣ୍ଡଳୀରେ କିଛି ମାସ ଧରି ଅପରାଜିତାଙ୍କ ବିରୁଦ୍ଧରେ ବିଦ୍ରୋହ ଦେଖିବାକୁ ମିଳୁଥିବା ବେଳେ ବର୍ତ୍ତମାନ ଖୋର୍ଦ୍ଧା ନିର୍ବାଚନ ମଣ୍ଡଳୀରେ ଏହି ବିଦ୍ରୋହର ସ୍ୱର ତେଜି ଉଠିଛି । ନିର୍ବାଚନ ଯେତିକି ଯେତିକି ପାଖେଇ ପାଖେଇ ଆସୁଛି, ଅପରାଜିତାଙ୍କ ପାଇଁ ସେତିକି ଅଡ଼ୁଆ ବଢ଼ି ବଢ଼ି ଚାଲିଛି ।
ଇଟିଭି ଭାରତ, ଖୋର୍ଦ୍ଧା
- " class="align-text-top noRightClick twitterSection" data="">
