ଆପଣ ଚିକେନର ଅନେକ ଆଇଟମ୍ ଖାଇଥିବେ । ଚିକେନ କଷା, ଚିକେନ ଟିକା, ବଟର ଚିକେନ... ଆହୁରି କେତେ କ'ଣ । ହେଲେ କେବେ ମାଡ୍ରାସ ଚିକେନ ମସାଲା ଖାଇଛନ୍ତି କି ? ଏହି ଚିକେନ ଆଇଟମ ଖାଇବାକୁ ଆପଣଙ୍କୁ ମାଡ୍ରାସ ଯିବାକୁ ପଡିବନି । ନିଜ ଘରେ ଏହାକୁ ପ୍ରସ୍ତୁତ କରିପାରିବେ । ଏହି ରେସିପି ବନାଇବା ଭାରି ସହଜ । କମ୍ ସମୟରେ ଏବଂ କମ୍ ତେଲ ମସାଲାରେ ଆପଣ ଏହାକୁ ପ୍ରସ୍ତୁତ କରିପାରିବେ । ଚାଲନ୍ତୁ ଜାଣିବା କିପରି ପ୍ରସ୍ତୁତ କରିବେ
ଆବଶ୍ୟକୀୟ ସାମଗ୍ରୀ:
- ଚିକେନ- 500 ଗ୍ରାମ
- ସୋରିଷ ତେଲ
- ଜିରା- ଅଧା ଚାମଚ
- ଗୋଟା ଧନିଆ- ଅଧା ଚାମଚ
- ଗୋଟା ପାନମଧୁରୀ- ଅଧା ଚାମଚ
- ଶୁଖିଲା ଲଙ୍କା- 4ରୁ 5ଟା
- ଗୋଲମରିଚ
- କଟା ପିଆଜ- ଏକ କପ୍
- କଟା ଟମାଟୋ- ଏକ କପ୍
- ଅଦା - ଏକ ଚାମଚ
- ରସୁଣ (ଛୋଟ ଛୋଟ କରି କାଟନ୍ତୁ)- ଏକ ଚମଚ
- ଭୃସଙ୍ଗ ପତ୍ର
- ହଳଦୀ ପାଉଡର- ଏକ ଚାମଚ
- ଲୁଣ ସ୍ବାଦ ଅନୁସାରେ
ପ୍ରସ୍ତୁତି ପ୍ରଣାଳୀ:
- ପ୍ରଥମେ ଗ୍ୟାସ୍ ଲଗାଇ ଏକ କଡେଇ ବସାନ୍ତୁ । କଡେଇ ଗରମ ହେବା ପରେ ଏଥିରେ ଜିରା, ଗୋଟା ଧନିଆ, ପାନମଧୁରୀ, ଗୋଲମରିଚ, ଶୁଖିଲା ଲଙ୍କା ପକାଇ ଭାଜନ୍ତୁ । ଏବେ କଟା ପିଆଜ, କଟା ରସୁଣ ଓ ଅଦା, କଟା ଟମାଟୋ ଓ ଲୁଣ ପକାଇ ଅଳ୍ପ ସମୟ ଭାଜନ୍ତୁ ଏବଂ ବାହାର କରିଦିଅନ୍ତୁ ।
- ଏହିସବୁ ସାମଗ୍ରୀକୁ ଗୋଟିଏ ପାତ୍ରକୁ କାଢି ଥଣ୍ଡା ହେବାକୁ ଦିଅନ୍ତୁ ଏବଂ ଏହାର ପେଷ୍ଟ ବନାନ୍ତୁ ।
- ବର୍ତ୍ତମାନ କଡେଇରେ ଅଳ୍ପ ସୋରିଷ ତେଲ ଦେଇ ଏଥିରେ ଭୃସଙ୍ଗ ପତ୍ର ପକାନ୍ତୁ । ଏହା ପଛକୁ ଚିକେନ, ଲୁଣ, ହଳଦୀ ଗୁଣ୍ଡ ପକାଇ 8ରୁ 10 ମିନିଟ୍ ଭାଜନ୍ତୁ । ଚିକେନ ହାଲୁକା ଭାଜି ହୋଇଥିବା ପରେ ଏଥିରେ ମସାଲା ପେଷ୍ଟକୁ ପକାଇ ଭଲ ଭାବେ ଗୋଳାନ୍ତୁ । କିଛି ସମୟ ସିଝିବାକୁ ଦେଇ ପୁଣିଥରେ ଏଥିରେ ଅଳ୍ପ ପାଣି ମିଶାଇ କଷନ୍ତୁ ।
- ଚିକେନ ଭଲ ଭାବେ ସିଝିଯିବା ପରେ ପ୍ରସ୍ତୁତ ହୋଇଯିବ ଆପଣଙ୍କ ମାଡ୍ରାସ ଚିକେନ ମସାଲା । ଘରକୁ ଆସୁଥିବା ଅତିଥିଙ୍କ ପାଇଁ ଝଟପଟ୍ ପ୍ରସ୍ତୁତ କରିପାରିବେ । ନହେଲେ ଛୁଟି ଦିନରେ ଏହି ରେସିପିର ମଜା ନେଇପାରିବେ ।
