ସବୁ ନନ୍ଭେଜ ପ୍ରେମୀଙ୍କ ପ୍ରିୟ ଚିକେନ । ସନ୍ଧ୍ୟାବେଳେ ସମସ୍ତେ ବଜାରଘାଟରେ ଚିକେନ ରୋଲ, ପକୋଡା ଭଳି ଆଇଟମ ଖୋଜିଥାନ୍ତି । ଆଉ ଯଦି କେଏଫସି ଷ୍ଟାଇଲ ଫ୍ରାଏଡ ଚିକେନ ମିଳିଯାଏ ତ ମଜା ଆସିଯାଏ । ବିଶେଷକରି ଆଜି ରବିବାର ଭଳି ନଜଭେଜ୍ ବାରରେ ସମସ୍ତଙ୍କର କିଛି ନା କିଛି ଚିକେନ ଆଇଟମ ଖାଇବାକୁ ମନ ଥାଏ । ଯଦି ଆପଣଙ୍କୁ ମଧ୍ୟ ଚିକେନ ଖାଇବା ପସନ୍ଦ ତାହେଲେ କୌଣସି ବଜାରକୁ ଯିବା ଦରକାର ନାହିଁ । ନିଜ ଘରେ ବନାଇପାରିବେ କେଏଫସି ଷ୍ଟାଇଲ ଫ୍ରାଏଡ ଚିକେନ । ଚାଲନ୍ତୁ ଜାଣିବା ଏହାକୁ କେମିତି ପ୍ରସ୍ତୁତ କରିବେ
ଆବଶ୍ୟକୀୟ ସାମଗ୍ରୀ:
ଚିକେନ- ଲେଗ୍ ପିସ୍ ନେଇପାରିବେ
ଅଦା ରସୁଣ ପେଷ୍ଟ- ଏକ ଚାମଚ
ଗୋଲମରିଚ ଗୁଣ୍ଡ
ଲଙ୍କାଗୁଣ୍ଡ
ହଳଦୀ ଗୁଣ୍ଡ
ଲୁଣ ସ୍ବାଦ ଅନୁସାରେ
ଅରଗାନୋ
ମଇଦା
କର୍ନଫ୍ଲୋର
ପ୍ରସ୍ତୁତି ପ୍ରଣାଳୀ:
- ପ୍ରଥମେ ଏକ ପାତ୍ରରେ ଚିକେନ ଲେଗ୍ ପିସ୍ ନେଇ ଏହାକୁ ଏକ ଚାମଚ ସାହାଯ୍ୟ ଟିକେ ଟିକେ କଣା କରନ୍ତୁ । ଯେମିତି ମସାଲା ଚିକେନ ସହ ଭଲ ଭାବେ ମିଶିପାରିବ ।
- ଏବେ ଏହି ଚିକେନରେ ଗୋଟିଏ ଚାମଚ ଲେମ୍ବୁ ରସ, ଅଧା ଚାମଚ ଗୋଲମରିଚ ଗୁଣ୍ଡ, କାଶ୍ମୀର ଲଙ୍କା ପାଉଡର, ଲୁଣ, ଅଦା ରସୁଣ ପେଷ୍ଟ, ଅରଗାନୋ ପକାଇ ହାତରେ ଭଲ ଭାବେ ଗୋଳାନ୍ତୁ ଏବଂ ଏହାକୁ ମ୍ୟାରିନେଟ ହେବାକୁ 4 ଘଣ୍ଟା ଛାଡି ଦିଅନ୍ତୁ ।
- ଆଉ ଏକ ପାତ୍ରରେ ଗୋଟିଏ ବଡ କପ୍ ମଇଦା, ଅଧା କପ୍ କର୍ନଫ୍ଲୋର ନିଅନ୍ତୁ । ଏଥିରେ ଲୁଣ, ଲଙ୍କା ପାଉଡର, ଗୋଲମରିଚ ଗୁଣ୍ଡ, ଅଳ୍ପ ବେକିଂ ପାଉଡର, ଅଧା ଚାମଚ ରସୁଣ ପାଉଡର ମିଶାଇ ହାତରେ ଗୋଳାନ୍ତୁ ।
- ଆଉ ଏକ ପାତ୍ରରେ ଦୁଇଟି ଅଣ୍ଡା ନିଅନ୍ତୁ । ଏଥିରେ ମଧ୍ୟ ଅଧା ଚାମଚ ଗୋଲମରିଚ ଗୁଣ୍ଡ, ଏକ ଚାମଚ ମଇଦା ଓ ଏକ ଚାମଚ କର୍ନଫ୍ଲୋର ମିଶାଇ ଗୋଳାନ୍ତୁ ।
- ବର୍ତ୍ତମାନ ମ୍ୟାରିନେଟ କରିଥିବା ଚିକେନକୁ ଆଣି ପ୍ରଥମେ ମଇଦା ମିଶ୍ରଣରେ ଗୋଳାନ୍ତୁ । ଏହାପରେ ଅଣ୍ଡା ମିଶ୍ରଣରେ ବୁଡାଇ ପୁଣିଥରେ ମଇଦାରେ ଗୋଳାନ୍ତୁ ଏବଂ ତେଲରେ ଛାଣନ୍ତୁ ।
- ଏହିପରି ଭାବେ ଗୋଟିଏ ପରେ ଗୋଟିଏ ଚିକେନ ପିସ୍କୁ ଛାଣନ୍ତୁ । ପ୍ରସ୍ତୁତ ହୋଇଯିବ ଆପଣଙ୍କ କେଏଫସି ଷ୍ଟାଇଲର କ୍ରିସପି ଫ୍ରାଏଡ ଚିକେନ ।
