ହାଇଦ୍ରାବାଦ: ଆଜିକାଲି ହୃଦଘାତ ଅତି ସାଧାରଣ ରୋଗ ହୋଇଗଲାଣି । ଦେଶରେ ବଢିବାରେ ଲାଗିଛି ହୃଦଘାତ ଜନିତ ମୃତ୍ୟୁ । କିଏ କେତେବେଳେ ନାଚିବା ବେଳେ ଟଳିପଡିଲାଣି ତ କିଏ ଏକ୍ସରସାଇଜ କରିବା ବେଳେ ଆଖି ବୁଜିଲାଣି । ବିଶେଷକରି ଆଜିକାଲି ଯୁବବର୍ଗଙ୍କ ଠାରେ ଅଧିକ ହୃଦଘାତ ଦେଖାଯାଉଛି । ନିଜର ଖାଦ୍ୟପେୟ ଓ ସ୍ବାସ୍ଥ୍ୟ ପ୍ରତି ଯତ୍ନବାନ ହେବା ସତ୍ତ୍ବେ ଲୋକେ ହୃଦଘାତରେ ପ୍ରାଣ ହରାଉଛି । ଏହାରି ମଧ୍ୟରେ ଏକ ତଥ୍ୟ ସାମ୍ନାକୁ ଆସିଛି, ଯେଉଁଥିରେ ହୃଦଘାତ ପାଇଁ ଶବ୍ଦ ପ୍ରଦୂଷଣକୁ ଦାୟୀ କରାଯାଇଛି । ଏଥିରେ ମୁଖ୍ୟତଃ ସହରୀ ଶବ୍ଦ ପ୍ରଦୂଷଣ କାରଣରୁ ଅଧିକ ହୃଦଘାତ ହେଉଥିବା କୁହାଯାଇଛି ।
ବିଭିନ୍ନ ଇଉରୋପୀୟ ସହରରେ ହୋଇଥିବା ଦୁଇଟି ଅଧ୍ୟୟନରୁ ଜଣାପଡିଛି ଯେ, ସହରୀ ଶବ୍ଦ ପ୍ରଦୂଷଣ ହୃଦୟ ସ୍ବାସ୍ଥ୍ୟ ଉପରେ ବଡ଼ ନକରାତ୍ମକ ପ୍ରଭାବ ପକାଇଥାଏ । ଏହି DECIBEL-MI ଅଧ୍ୟୟନରେ ଦେଖାଯାଇଛି, ହୃଦଘାତରେ ପୀଡିତ 50 ବର୍ଷ ଓ ଏହାଠୁ କମ୍ ବୟସର ରୋଗୀ ଯିଏକି ମାୟୋକାର୍ଡିୟଲ ଇନଫାର୍କ୍ସନର (myocardial infarction) ଶିକାର ହୋଇଥିଲେ, ସେମାନେ ସାଧାରଣ ଲୋକଙ୍କ ଅପେକ୍ଷାରେ ଅଧିକ ଉଚ୍ଚ ସ୍ତରର ଶବ୍ଦ ସଂସ୍ପର୍ଶରେ ଆସିଥିଲେ । କହୁରଖୁଛୁ କି, ମାୟୋକାର୍ଡିୟଲ ଇନଫାର୍କ୍ସନ ହେଉଛି ହୃଦଘାତ, ହୃଦୟର ମାଂସପେଶୀକୁ ପର୍ଯ୍ୟାପ୍ତ ଅକ୍ସିଜେନ ନ ମିଳିପାରିଲେ ଏହି ହୃଦଘାତ ହୋଇଥାଏ ।
ସହରୀ ଶବ୍ଦ ପ୍ରଦୂଷଣ ଯୁବବର୍ଗ ମଧ୍ୟରେ ମାୟୋକାର୍ଡିୟଲ ଇନଫାର୍କ୍ସନ ଆଶଙ୍କାକୁ ଅଧିକ ବଢାଇଥାଏ । ଜର୍ମାନୀର ବ୍ରେମେନରେ ରହୁଥିବା 50 ବର୍ଷ ଓ ଏହାଠୁ କମ୍ ବୟସର 430 ଜଣ ରୋଗୀଙ୍କ ଉପରେ ଏହି ଅଧ୍ୟୟନ କରାଯାଇଥିଲା । ଏମାନେ ମାୟୋକାର୍ଡିୟଲ ଇନଫାର୍କ୍ସନ ପୀଡିତ ଥିଲେ ଓ ସମସ୍ତଙ୍କୁ ସ୍ଥାନୀୟ ହାର୍ଟ ସେଣ୍ଟରରେ ଭର୍ତ୍ତି ହୋଇଥିଲେ । ରେସେଡେନ୍ସିଆଲ ଶବ୍ଦ ବିପଦ ସ୍ତରର ଗଣନା ସମୟରେ ଅନୁସନ୍ଧାନକାରୀମାନେ ସାଧାରଣ ଜନତାଙ୍କ ତୁଳନାରେ ଅଧିକ ଶବ୍ଦ ପ୍ରଦୂଷଣ ଘଟଣା ଦେଖିବାକୁ ପାଇଥିଲେ । ଫ୍ରାନ୍ସରେ ଅନ୍ୟ ଏକ ଅଧ୍ୟୟନରେ ମଧ୍ୟ ସହରୀ ଶବ୍ଦ ପ୍ରଦୂଷଣ, ବିଶେଷକରି ରାତିରେ ହେଉଥିବା ଉଚ୍ଚ ଶବ୍ଦ ଅଧିକ ହୃଦଘାତ ଆଶଙ୍କା ବଢାଉଥିବା ଦର୍ଶାଯାଇଛି । ଏହି ପରିବର୍ତ୍ତିତ ଜୀବନଶୈଳୀ ମଧ୍ୟରେ ବାୟୁ ପ୍ରଦୂଷଣ ପରେ ଶବ୍ଦ ପ୍ରଦୂଷଣ ଏବେ ରୋଗବ୍ୟାଧିର ପ୍ରମୁଖ କାରଣ ହୋଇଛି ।
ଶବ୍ଦ ପ୍ରଦୂଷଣ ବ୍ୟତୀତ ଖରାପ ଜୀବନଶୈଳୀ ମଧ୍ୟ ହୃଦଘାତର କାରଣ । ଆଜିକାଲି ଯୁବପିଢିଙ୍କ ମଧ୍ୟରେ ଧୂମ୍ରପାନ ଅଭ୍ୟାସ ଦ୍ରୁତଗତିରେ ବଢିଚାଲିଛି । ଯାହାକି ହୃଦଘାତ ଭଳି ଘାତର ରୋଗର କାରଣ ହୋଇଥାଏ । ସେହିପରି ଅସ୍ବାସ୍ଥ୍ୟକର ଖାଦ୍ୟ, ମେଦବହୁଳତା, ଚିନ୍ତା, ଚାପ ଓ ଉଚ୍ଚ ରକ୍ତଚାପ କାରଣରୁ ମଧ୍ୟ ହୃଦୟ ଜନିତ ରୋଗ ହେବାର ଆଶଙ୍କା ଅଧିକ ରହିଥାଏ ।
