ହାଇଦ୍ରାବାଦ: ଅନେକ ସମୟରେ ହଠାତ୍ ଆମ ପାଟି ପିତା ହୋଇଯାଏ । ଏହା ଏକ ସାଧାରଣ ସମସ୍ୟା । ଯାହାକୁ ପ୍ରାୟ ସମସ୍ତେ କେବେ ନା କେବେ ଅନୁଭବ କରିଛନ୍ତି । ସାଧାରଣତଃ ଏହି ପିତା ଲାଗିବା ଆପେ ଆପେ ଠିକ୍ ହୋଇଯାଏ । ହେଲେ ଏହା ଯଦି ଦୀର୍ଘ ଦିନ ଯାଏ ରହେ, ତାହେଲେ ଏହାକୁ ଅଣଦେଖା କରିବା ଠିକ୍ ନୁହେଁ । କାରଣ ଏହା କେବଳ ମୁହଁ କିମ୍ବା ଦାନ୍ତରେ କୌଣସି ବ୍ୟାକ୍ଟେରିଆ ପ୍ରଭାବରେ ହୋଇନଥାଏ, ବରଂ ଅନେକ ସମୟରେ ପାଚନ ସମସ୍ୟା କିମ୍ବା ଅନ୍ୟ କୌଣସି ସ୍ବାସ୍ଥ୍ୟ ଜନିତ ସମସ୍ୟା ଯୋଗୁଁ ମଧ୍ୟ ପିତା ଲାଗିଥାଏ ।
ପାଟି ପିତା ଲାଗିବାର କାରଣ ?
ବେଙ୍ଗାଲୁରୁର ଦାନ୍ତରୋଗ ଡାକ୍ତର ଅପୂର୍ବି ଯୋଶୀ କହିଛନ୍ତି, ପାଟି ପିତା ଲାଗିବା ଏବଂ ଲମ୍ବା ସମୟ ଯାଏଁ ଠିକ ନହେବାର ଅନେକ କାରଣ ଥାଇପାରେ । କିଛି ସ୍ବାସ୍ଥ୍ୟ ସମସ୍ୟା ସହିତ ଭଲ ଭାବେ ପାଟି ସଫା ନକରିବା ଯୋଗୁଁ ମଧ୍ୟ ହୋଇପାରେ । ଏହାବ୍ୟତୀତ କିଛି ବଦଭ୍ୟାସ କିମ୍ବା ଅସ୍ବାସ୍ଥ୍ୟକର ଖାଦ୍ୟପାନୀୟ କାରଣରୁ ବି ପାଟି ପିତା ଲାଗିଥାଏ । ସାଧାରଣତଃ ଯେଉଁସବୁ କାରଣରୁ ଏମିତି ପିତା ଲାଗେ, ସେଗୁଡିକ ହେଲା-
ଏସିଡ୍ ରିଫ୍ଲକ୍ସ- ଗଳାକୁ ପେଟ ସହ ଯୋଡୁଥିବା ଟ୍ୟୁବରେ ଷ୍ଟୋମାକ୍ ଏସିଡିର ଓଲଟା ପ୍ରବାହକୁ ଏସିଡ ରିଫ୍ଲକ୍ସ କୁହାଯାଏ । ଏହା କାରଣରୁ ପେଟର ଏସିଡ ଗଳାକୁ ଆସିଥାଏ, ଯାହାଦ୍ବାରା ପାଟିରେ ଖଟା ଓ ପିତା ସ୍ବାଦ ଆସେ ।
ଠିକ୍ ଭାବେ ପାଟି ନ ଧୋଇବା- ଯଦି ଆପଣ ନିୟମିତ ଭାବେ ପାଟି ଧୋଉନାହାନ୍ତି, ତାହେଲେ ପାଟିରେ ବ୍ୟାକ୍ଟେରିଆ ଓ କୀଟାଣୁ ବୃଦ୍ଧିପାଆନ୍ତି । ଯାହା ପିତା ସ୍ବାଦର କାରଣ ।
ମେଡିକାଲ କଣ୍ଡିସନ- କିଛି ରୋଗ ଯେମିତିକି ଡାଇବେଟିସ, ଲିଭର, କିଡନୀ ସମସ୍ୟା ଯୋଗୁଁ ମଧ୍ୟ ପାଟି ପିତା ଲାଗିଥାଏ ।
ଡିହାଇଡ୍ରେସନ- ଶରୀରରେ ପଯ୍ୟାପ୍ତ ପାଣିର ଅଭାବରୁ ବି ପାଟି ଶୁଖିପାରେ । ଲାଳର କମି ହେଲେ ପାଟିରେ ପିତା ସ୍ବାଦ ଆସିପାରେ ।
ଧୂମ୍ର ଓ ମଦ୍ୟପାନ- ଧୂମ୍ରପାନ ଓ ମଦ୍ୟପାନ ପାଟିର ସ୍ବାଦ ବଦଳାଇପାରେ ଓ ପିତା ଲାଗିବାର କାରଣ ହୋଇପାରେ ।
ପାଟି ପିତା ଲାଗିବାର ଉପଚାର
ସାଧାରଣତଃ ଠିକ୍ ଭାବେ ପାଟି ସଫା ନକରିବା ଓ ଏସିଡ ରିଫ୍ଲକ୍ସ ଯୋଗୁଁ ପାଟି ପିତା ଲାଗିଥାଏ । ତେଣୁ ଯେଉଁମାନଙ୍କ ଏସିଡ ରିଫ୍ଲକ ବା ପାଚନ ସମସ୍ୟା ରହୁଛି, ସେମାନେ ଡାକ୍ତରଙ୍କ ପରାମର୍ଶ ନେଇ ଚିକିତ୍ସା କରିବା ଜରୁରୀ । ଔଷଧ ଖାଇବା ସହ ଖାଦ୍ୟପେୟ ପ୍ରତି ମଧ୍ୟ ଧ୍ୟାନ ଦେବା ଆବଶ୍ୟକ । ଏଠାରେ ଅତ୍ୟଧିକ ଭୋଜନ ନ କରିବାକୁ ପରାମର୍ଶ ଦିଆଯାଏ ।
ଏହାସହିତ ପାଟି ଓ ଦାନ୍ତକୁ ନିୟମିତ ଭଲ ଭାବେ ସଫା କରିବା ଜରୁରୀ । ଡେଣ୍ଟିଷ୍ଟ ଦିନକୁ ଦୁଇ ଥର ସକାଳ ଓ ସନ୍ଧ୍ୟାରେ ବ୍ରଶ କରିବାକୁ ପରାମର୍ଶ ଦିଅନ୍ତି । କିଛି ବି ଖାଦ୍ୟ ଖାଇବା ପରେ ଭଲ ଭାବେ ପାଣିରେ କୁଳି କରନ୍ତୁ । ମାଉଥ୍ ୱାଶର ବି ବ୍ୟବହାର କରିପାରିବେ । ଏହାଦ୍ବାରା ପାଟିରେ ଥିବା ବ୍ୟାକ୍ଟେରିଆ ସୁରକ୍ଷିତ ରୁହନ୍ତି ଓ ପାଟି ପିତା ଲାଗିବା ଆଶଙ୍କା କମ୍ ରହିଥାଏ । ଏହାବ୍ୟତୀତ କିଛି ଅନ୍ୟ ଜିନିଷ ଉପରେ ମଧ୍ୟ ଧ୍ୟାନ ଦେବା ଉଚିତ୍ ଯେମିତିକି-
- ପାଟିରେ ଲାଳର ମାତ୍ରା ବଢାନ୍ତୁ । ଏଥିପାଇଁ ଆପଣ ପର୍ଯ୍ୟାପ୍ତ ପରିମାଣର ପାଣି ପିଇବା ସହ ଚୁଇଁଗମ୍ ଚୋବାଇ ପାରିବେ ।
- ଧୂମ୍ରପାନ ଓ ମଦ୍ୟପାନରୁ ଦୂରେଇ ରୁହନ୍ତୁ । ଏହାଦ୍ବାରା ପାଟି ପିତା ନହେବା ସହ ଆପଣଙ୍କ ସ୍ବାସ୍ଥ୍ୟ ବି ଭଲ ରହିବ ।
- ଯଦି ଆପଣ ନିୟମିତ ଭାବେ ଔଷଧ ଖାଉଛନ୍ତି ଓ ପାଟିରେ ପିତା ସ୍ବାଦ ଅନୁଭବ କରୁଛନ୍ତି, ତାହେଲେ ଡାକ୍ତରଙ୍କ ପରାମର୍ଶ ନିଅନ୍ତୁ ।
- ପ୍ରତିଦିନ ତାଜା ଫଳ, ପନିପରିବା ଖାଆନ୍ତୁ । ତେଲଭାଜି ଓ ମିଠା କମ୍ ଖାଆନ୍ତୁ ।
ଡ. ଅପୂର୍ବି ଯୋଶୀ କହିଛନ୍ତି, ଖାଦ୍ୟ ସହ ଜଡିତ ସୁସ୍ଥ ଅଭ୍ୟାସ ଆପଣାଇ ଓ ନିଜ ସ୍ବାସ୍ଥ୍ୟର ଭଲ ଭାବେ ଯତ୍ନ ନେଇ ଏହି ସମସ୍ୟାରୁ ସହଜରେ ମୁକ୍ତି ପାଇପାରିବେ । ହେଲେ ଯଦି ଦୀର୍ଘ ଦିନ ଯାଏ ଏମିତି ପାଟିରେ ପିତା ସ୍ବାଦ ରହେ, ତାହେଲେ ଡାକ୍ତରଙ୍କ ପରାମର୍ଶ ନେବା ଜରୁରୀ ।
Disclaimer- ଏହି ସୂଚନା କେବଳ ଆପଣଙ୍କ ଜାଣିବା ପାଇଁ । ଏହାକୁ ଅନୁପାଳନ କରିବା ପୂର୍ବରୁ ଡାକ୍ତରଙ୍କ ପରାମର୍ଶ ନେବା ଭଲ ହେବ ।
