ହାଇଦ୍ରାବାଦ: ସାଉଥ ସୁପରଷ୍ଟାର ୟଶ ଆଜି 8 ଜାନୁଆରୀରେ ତାଙ୍କର 39 ତମ ଜନ୍ମଦିନ ପାଳନ କରୁଛନ୍ତି । ଏହି ଅବସରରେ ସେ ଫ୍ୟାନ୍ସଙ୍କୁ ଭେଟି ଦେଇଛନ୍ତି । ତାଙ୍କ ଜନ୍ମଦିନ ଅବସରରେ ଆଗାମୀ ଫିଲ୍ମ 'ଟକ୍ସିକ'ର ଟିଜର ରିଲିଜ କରିଛନ୍ତି । ଯେଉଁଥିରେ ତାଙ୍କ ଲୁକ୍ ସମସ୍ତଙ୍କ ଦୃଷ୍ଟି ଆକର୍ଷଣ କରିଛି । ବର୍ତ୍ତମାନ ଏହା ସୋସିଆଲ ମିଡିଆରେ ଭାଇରାଲ ହେଉଥିବା ବେଳେ ଲୋକେ ଏହାକୁ ପସନ୍ଦ କରିବା ସହ ତାଙ୍କୁ ଜନ୍ମଦିନ ଶୁଭକାମନା ଜଣାଇଛନ୍ତି ।
'ଟକ୍ସିକ' ଟିଜର ରିଲିଜ
ୟଶ ତାଙ୍କ ଜନ୍ମଦିନରେ ୟଶ ଟକ୍ସିକର ଟିଜର ସେୟାର କରିଛନ୍ତି, ଯେଉଁଥିରେ ୟଶ ଏକ ବାରରେ ଏଣ୍ଟ୍ରି କରି ବାର ନୃତ୍ୟଶିଳ୍ପୀଙ୍କ ସହ ରୋମାନ୍ସ କରୁଥିବା ନଜର ଆସିଛନ୍ତି । ଏଥିସହ ୟଶଙ୍କ ପ୍ରଥମ ଲୁକ୍ ଟିଜରରେ ମଧ୍ୟ ଦେଖିବାକୁ ମିଳିଛି । ଗ୍ୟାଙ୍ଗଷ୍ଟାର ଲୁକରେ ନଜର ଆସିଛନ୍ତି ୟଶ । ଏଥିରେ ଅଭିନେତା ଏକ କ୍ରିମ୍ ରଙ୍ଗର ପୋଷାକ ସହ ଟୋପି ପିନ୍ଧିଛନ୍ତି । କହିରଖୁଛୁ କି, ଏହି ଫିଲ୍ମ ବିଂଶ ଶତାବ୍ଦୀ ଉପରେ ଆଧାରିତ ହେବ । ତାହା ହେଉଛି, ଏହି ଚଳଚ୍ଚିତ୍ରରେ 1970 ଦଶକର ଡ୍ରଗ୍ ମାଫିଆଙ୍କ କାହାଣୀ ଚିତ୍ରିତ ହେବ ।
'ଟକ୍ସିକ' କେବେ ରିଲିଜ ହେବ ?
ୟଶଙ୍କ ଏହି ଫିଲ୍ମ ୧୦ ଏପ୍ରିଲ ୨୦୨୫ରେ ପ୍ରେକ୍ଷାଳୟକୁ ଆସିବ । ଏହି ଚଳଚ୍ଚିତ୍ରର ନିର୍ଦ୍ଦେଶକ ହେଉଛନ୍ତି ଜାତୀୟ ପୁରସ୍କାର ବିଜେତା ଜିତୁ ମୋହନଦାସ, ଯିଏ ଲାଏରସ ଡାଏସ୍ ଏବଂ ମୁଥନ୍ ଭଳି ଚଳଚ୍ଚିତ୍ର ନିର୍ମାଣ ପାଇଁ ଜଣାଶୁଣା । କେଭିଏନ୍ ପ୍ରଡକ୍ସନ୍ ହାଉସ୍ ୟଶଙ୍କ ଫିଲ୍ମ 'ଟକ୍ସିକ୍' ପ୍ରସ୍ତୁତ କରୁଛି । ୟଶଙ୍କ ସହ ଏହା ଜିତୁ ମୋହନଦାସଙ୍କର ପ୍ରଥମ ଚଳଚ୍ଚିତ୍ର । ଫିଲ୍ମର ସଙ୍ଗୀତ ଚରଣ ରାଜ କରିବାକୁ ଥିବା ବେଳେ ଆକ୍ସନ ଡିଜାଇନ ପାଇଁ ଷ୍ଟିଭ ଗ୍ରିଫିନଙ୍କୁ ଦାୟିତ୍ୱ ଦିଆଯାଇଥିବା କୁହାଯାଇଛି । ତେବେ ଫିଲ୍ମର ବାକି ଷ୍ଟାର କାଷ୍ଟ ବିଷୟରେ ଏପର୍ଯ୍ୟନ୍ତ କୌଣସି ବିବରଣୀ ପ୍ରକାଶ କରାଯାଇନାହିଁ ।
ଏହା ମଧ୍ୟ ପଢନ୍ତୁ: ଜନ୍ମଦିନରେ ଫ୍ୟାନ୍ସଙ୍କୁ ଭେଟି ଦେବେ ୟଶ, 'ଟକ୍ସିକ' ପୋଷ୍ଟର ସେୟାର କରି ଦେଲେ ହିଣ୍ଟ୍
ସୂଚନା ଥାଉ କି, ୟଶ ଗତ 17 ବର୍ଷ ଧରି ଭାରତୀୟ ଚଳଚ୍ଚିତ୍ର ଶିଳ୍ପରେ କାର୍ଯ୍ୟ କରିଆସୁଛନ୍ତି, କିନ୍ତୁ ସେ 2018 ରେ ମୁକ୍ତିଲାଭ କରିଥିବା ଚଳଚ୍ଚିତ୍ର KGF ଅଧ୍ୟାୟ 1 ରୁ ବିଶ୍ୱରେ ମାନ୍ୟତା ପାଇଛନ୍ତି । କେଜିଏଫ୍ ପୂର୍ବରୁ ୟଶଙ୍କୁ ଅନେକ ଚଳଚ୍ଚିତ୍ରରେ ଦେଖିବାକୁ ମିଳିଥିଲା, କିନ୍ତୁ ଏହି ସମସ୍ତ ଚଳଚ୍ଚିତ୍ର କେବଳ କନ୍ନଡ ସିନେମାରେ ସୀମିତ ରହିଥିଲା । ଆଜି ଭାରତର ପ୍ରତ୍ୟେକ କୋଣରେ ୟଶଙ୍କ ଚଳଚ୍ଚିତ୍ରକୁ ଅପେକ୍ଷା କରିରହିଥାନ୍ତି ଫ୍ୟାନ୍ସ । ତେବେ ବର୍ତ୍ତମାନ ସେ 'ଟକ୍ସିକ' ସହ ପୁଣି ପରଦାକୁ ଫେରୁଥିବା ବେଳେ ଲୋକେ ଫିଲ୍ମ ଦେଖିବାକୁ ଉତ୍ସାହର ସହ ଅପେକ୍ଷା କରିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
