ହାଇଦ୍ରାବାଦ: କନ୍ନଡ ସିନେମା ଇଣ୍ଡଷ୍ଟ୍ରିକୁ ଝଟକା । ସିନେମା ଏବଂ ଟେଲିଭିଜନ ଅଭିନେତ୍ରୀ ଶୋଭିତା ଶିବନ୍ନାଙ୍କର ଦେହାନ୍ତ ହୋଇଛି । ସୂଚନା ଅନୁସାରେ, ଅଭିନେତ୍ରୀ ଶୋଭିତା ଶିବନାନାଙ୍କ ମୃତଦେହ ତାଙ୍କ ବାସଭବନରୁ ଝୁଲନ୍ତା ଅବସ୍ଥାରେ ଉଦ୍ଧାର କରାଯାଇଛି । ସ୍ଥାନୀୟ ପୋଲିସ କହିଛି ଯେ ପ୍ରାଥମିକ ଅନୁସନ୍ଧାନରୁ ଜଣାପଡିଛି ଯେ ଅଭିନେତ୍ରୀଙ୍କ ଆତ୍ମହତ୍ୟା ଜନିତ ମୃତ୍ୟୁ ଘଟିଛି । ମୃତ୍ୟୁ ବେଳକୁ ତାଙ୍କୁ 30 ବର୍ଷ ହୋଇଥିଲା । ଏହି ଖବର ସାମ୍ନାକୁ ଆସିବା ପରେ ପରିବାର ଓ ଇଣ୍ଡଷ୍ଟ୍ରିରେ ଶୋକର ଛାୟା ଖେଳିଯାଇଛି ।
ଶୋଭିତା ଶିବନ୍ନାଙ୍କ ମୃତ୍ୟୁକୁ ନେଇ ସ୍ଥାନୀୟ ପୋଲିସର ବିବୃତ୍ତି ପ୍ରକାଶ ପାଇଛି। ପୋଲିସର ସୂଚନାନୁସାରେ, ଅଭିନେତ୍ରୀ ଶୋଭିତା ଶିବନା ଗାଚିବୋଲି ପୋଲିସ ଷ୍ଟେସନ ଅଧୀନରେ ଥିବା କୋଣ୍ଡାପୁରରେ ଥିବା ତାଙ୍କ ବାସଭବନରେ ଜୀବନ ହାରିଛନ୍ତି । ତେବେ ସେ ଏଭଳି ଚରମ ନିଷ୍ପତି କାହିଁକି ନେଲେ ତାହାର କାରଣ ଜଣାପଡିନଥିବା ବେଳେ ପୋଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି ଏବଂ ତାଙ୍କ ମୃତଦେହ ଗାନ୍ଧୀ ଡାକ୍ତରଖାନାକୁ ପୋଷ୍ଟମର୍ଟମ ପାଇଁ ପଠାଯାଇଛି । ତେବେ ତାଙ୍କର ମୃତ୍ୟୁ ଖବର ଶୁଣି ଫ୍ୟାନ୍ସ ସମେତ ସେଲିବ୍ରିଟି ଶୋକ ପ୍ରକାଶ କରିବା ସହ ପରିବାରକୁ ସମବେଦନା ଜଣାଇଛନ୍ତି ।
ଶୋଭିତା ଶିବନ୍ନାଙ୍କ ଅଭିନୟ କ୍ୟାରିଅର
ଶୋଭିତା ଶିବନ୍ନା କନ୍ନଡ ସିନେମା ଏବଂ ଟେଲିଭିଜନ ଜଗତରେ ଅନେକ ଫିଲ୍ମ ଓ ଶୋ'ରେ କାମ କରି ଲୋକପ୍ରିୟତା ହାସଲ କରିଛନ୍ତି । ଶୋଭିତା ଏରାଦୋଣ୍ଡଲା ମରୁ, ଏଟିଏମ୍: ଆଟାମ ଟୁ ମର୍ଡର, ଓଣ୍ଡ କ୍ୟାଥେ ହେଲା, ଜ୍ୟାକପଟ୍ ଏବଂ ବନ୍ଦାନା ଭଳି ଅନେକ ଲୋକପ୍ରିୟ ଚଳଚ୍ଚିତ୍ରରେ ଅଭିନୟ କରିଥିଲେ। ସେ ଗାଲିପାଟା, ମଙ୍ଗଳା ଗୌରୀ, କୋଗିଲେ, ବ୍ରହ୍ମାଣ୍ଟୁ, କୃଷ୍ଣ ରୁକ୍ମିଣୀ ଭଳି ଟିଭି ସିରିଏଲରେ କାମ କରୁଥିଲେ ।
ଏହା ମଧ୍ୟ ପଢନ୍ତୁ: ଆଉ ନାହାନ୍ତି 'କ୍ରାଇମ ପେଟ୍ରୋଲ' ଫେମ ଅଭିନେତା ନିତିନ ଚୌହାନ, ଫ୍ୟାନ୍ସ ଓ ସେଲିବ୍ରିଟିଙ୍କ ଶୋକ
ଦୁଇ ବର୍ଷ ପୂର୍ବେ କରିଥିଲେ ବିବାହ
ଶୋଭିତା ଦୁଇ ବର୍ଷ ପୂର୍ବେ ବିବାହ କରିଥିଲେ । ଏହା ପରେ ଅଭିନେତ୍ରୀ ହାଇଦ୍ରାବାଦରେ ରହିବାକୁ ଲାଗିଲେ ଏବଂ ଏହି କାରଣରୁ ସେ ତେଲୁଗୁ ସିନେମାରେ କାମ ଖୋଜିବା ଆରମ୍ଭ କଲେ । ସେ କନ୍ନଡ ଚଳଚ୍ଚିତ୍ରରୁ ନିଜକୁ ଟିକେ ଦୂରେଇ ରହିଥିଲେ, କିନ୍ତୁ ତାଙ୍କ ଅବଦାନ ପାଇଁ ସର୍ବଦା ସ୍ମରଣୀୟ ଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
