କୋଲକାତା: ଆର.ଜି କର ମେଡିକାଲ କଲେଜ କନିଷ୍ଠ ଡାକ୍ତର ଦୁଷ୍କର୍ମ ଓ ହତ୍ୟା ଘଟଣାରେ ଦୀର୍ଘ 42 ଦିନର ଆନ୍ଦୋଳନ ପରେ କାର୍ଯ୍ୟରେ ଯୋଗ ଦେଇଥିବା କନିଷ୍ଠ ଡାକ୍ତରମାନେ ପୁଣି ଆନ୍ଦୋଳନକୁ ଓହ୍ଲାଇଛନ୍ତି । କାର୍ଯ୍ୟକ୍ଷେତ୍ରରେ ସେମାନଙ୍କ ସୁରକ୍ଷା ଓ ନିରାପତ୍ତା ସମେତ ଏକାଧିକ ଦାବିରେ ସେମାନେ ଆଜିଠାରୁ ପୁଣି ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ସମ୍ପୂର୍ଣ୍ଣ କାର୍ଯ୍ୟବନ୍ଦ ଡାକରା ଦେଇଛନ୍ତି । କୋଲକାତା ସହରର ବିଭିନ୍ନ ହସ୍ପିଟାଲରେ କାର୍ଯ୍ୟରତ ହଜାର ହଜାର କନିଷ୍ଠ ଡାକ୍ତର ଆନ୍ଦୋଳନରେ ସାମିଲ ହେବା ପରେ ପୁଣି ଥରେ ସ୍ବାସ୍ଥ୍ୟସେବାରେ ଅଚଳାବସ୍ଥା ଦେଖାଯାଇଛି ।
- 42 ଦିନ ପରେ ପ୍ରତ୍ୟାହୃତ ହୋଇଥିଲା ଆନ୍ଦୋଳନ:-
ଅଗଷ୍ଟ 9 ତାରିଖରେ ଆର.ଜି କର ମେଡିକାଲ କଲେଜ କାଣ୍ଡ ପରେ ପଶ୍ଚିମବଙ୍ଗ ସମେତ ସାରା ଦେଶରେ ରେସିଡେଣ୍ଟ ଡାକ୍ତରମାନେ ଆନ୍ଦୋଳନକୁ ଓହ୍ଲାଇଥିଲେ । ପୀଡିତା ମହିଳା ଡାକ୍ତରଙ୍କ ପରିବାରକୁ ନ୍ୟାୟ ସହ ସମସ୍ତ ଡାକ୍ତର ଓ ସ୍ବାସ୍ଥ୍ୟକର୍ମୀଙ୍କୁ କର୍ମସ୍ଥଳରେ ପର୍ଯ୍ୟାପ୍ତ ସୁରକ୍ଷା ଦାବିରେ ଡାକ୍ତରମାନେ କାର୍ଯ୍ୟବନ୍ଦ ଆନ୍ଦୋଳନ କରିଥିଲେ । ସରକାର ଓ ପ୍ରଶାସନ ସହ ବାରମ୍ବାର ଆଲୋଚନା ବିଫଳ ହୋଇଥିଲା । ସୁପ୍ରିମକୋର୍ଟ ମଧ୍ୟ ଏହି ମାମଲାରେ ନିରପେକ୍ଷ ତଦନ୍ତର ପ୍ରତିଶ୍ରୁତି ସହ ଡାକ୍ତରଙ୍କୁ କାର୍ଯ୍ୟରେ ଯୋଗଦେବାକୁ କହିଥିଲେ । ଦୀର୍ଘ 42 ଦିନର ଆନ୍ଦୋଳନ ପରେ ଗତମାସ (ସେପ୍ଟେମ୍ବର) 21 ତାରିଖରେ କନିଷ୍ଠ ଡାକ୍ତରମାନେ ଆନ୍ଦୋଳନ ପ୍ରତ୍ୟାହାର କରିବା ସହ କାର୍ଯ୍ୟରେ ଯୋଗ ଦେଇଥିଲେ ।
- କାଲି ବିକ୍ଷୋଭ ଶୋଭାଯାତ୍ରା:-
ଏବେ ପୁଣି ଥରେ ସେମାନଙ୍କ ଦାବି ଓ ସୁରକ୍ଷା ସମ୍ପର୍କରେ ସରକାରଙ୍କ ପକ୍ଷରୁ କୌଣସି ଆଖିଦୃଶିଆ ପଦକ୍ଷେପ ଗ୍ରହଣ କରାଯାଇନଥିବା ଦର୍ଶାଇ ସେମାନେ ଅନିର୍ଦ୍ଦିଷ୍ଟ ସମୟ ପାଇଁ ପୁଣି କାର୍ଯ୍ୟବନ୍ଦ ଡାକରା ଦେଇଛନ୍ତି । ଆସନ୍ତାକାଲି କୋଲକାତାରେ ଆନ୍ଦୋଳନରତ ଡାକ୍ତରଙ୍କ ବିକ୍ଷୋଭ ଶୋଭାଯାତ୍ରା ମଧ୍ୟ ଆୟୋଜନ ହେବାର କାର୍ଯ୍ୟକ୍ରମ ରହିଛି । ଏନେଇ କନିଷ୍ଠ ଡାକ୍ତରସଂଘ ଆଉ କିଛି ସମୟ ମଧ୍ୟରେ ପ୍ରେସମିଟ୍ ମଧ୍ୟ କରିପାରେ ।
RG Kar Medical College and Hospital rape-murder case | We are compelled to return to a full ceasework starting from today. Unless we receive clear action from the government on safety, patient services, and the politics of fear, we will have no choice but to continue our full… pic.twitter.com/FG0DxlI9CW
— ANI (@ANI) October 1, 2024
ଏହା ମଧ୍ୟ ପଢନ୍ତୁ :- ଏହା ମଧ୍ୟ ପଢନ୍ତୁ: କୋଲକାତା ଡାକ୍ତର ଦୁଷ୍କର୍ମ- ହତ୍ୟା ମାମଲା: ସାରା ଦେଶରେ ଡାକ୍ତରଙ୍କ କାର୍ଯ୍ୟବନ୍ଦ ଆନ୍ଦୋଳନ, OPD ସେବା ଠପ୍ - Nationwide Doctors Protest |
- ସୁପ୍ରିମକୋର୍ଟ ଗଠନ କରିଥିଲେ ଜାତୀୟ ଟାକ୍ସଫୋର୍ସ:-
ଆର.ଜି କର ମାମଲାରେ ନିଜଆଡୁ ହସ୍ତକ୍ଷେପ କରିଥିଲେ ସର୍ବୋଚ୍ଚ ଅଦାଲତ । ପ୍ରଥମ ଶୁଣାଣିରେ ପ୍ରଧାନ ବିଚାରପତି ଜଷ୍ଟିସ ଡି.ଓ୍ବାଇ ଚନ୍ଦ୍ରଚୂଡଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ ମମତା ସରକାର, କୋଲକାତା ପୋଲିସ ପ୍ରଶାସନ, ମେଡିକାଲ କଲେଜର କର୍ତ୍ତୃପକ୍ଷଙ୍କୁ ଭର୍ତ୍ସନା କରିଥିଲେ । ଏହା ସହ ସମଗ୍ର ଦେଶରେ ଡାକ୍ତର ଓ ସ୍ବାସ୍ଥ୍ୟକର୍ମୀଙ୍କ ସୁରକ୍ଷା ପାଇଁ ଏକ 10 ଜଣିଆ ‘ଜାତୀୟ ଟାକ୍ସଫୋର୍ସ’ ପାଇଁ ଗଠନ କରିବାକୁ ନିର୍ଦ୍ଦେଶ ଦେଇଥିଲେ ।
- ମାମଲାର ତଦନ୍ତ କରୁଛି ‘ସିବିଆଇ’:
ଏବେ ଏହି ମାମଲାର ସର୍ବୋଚ୍ଚ କୋର୍ଟରେ ସିରିଜ ଶୁଣାଣି ଜାରି ରହିଛି । କେନ୍ଦ୍ରୀୟ ତଦନ୍ତକାରୀ ସଂସ୍ଥା ‘ସିବିଆଇ’ ମଧ୍ୟ ମାମଲାର ତଦନ୍ତ ଜାରି ରଖିଛି । ମୁଖ୍ୟ ଅଭିଯୁକ୍ତ ସଞ୍ଜୟ ରାୟ ଓ ତତ୍କାଳୀନ ମେଡିକାଲ କଲେଜ ଅଧ୍ୟକ୍ଷ ସନ୍ଦୀପ ଘୋଷଙ୍କ ସମେତ ଏକାଧିକ ଅଭିଯୁକ୍ତ ଗିରଫ ହୋଇସାରିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
