ହାଇଦ୍ରାବାଦ: ଆନ୍ଧ୍ରରେ ପୁଣି ଆରମ୍ଭ ହେଲା ଚନ୍ଦ୍ରବାବୁ ନାଇଡୁଙ୍କ ଶାସନ । ୪ର୍ଥ ଥର ପାଇଁ ଆଜି ଚନ୍ଦ୍ରବାବୁ ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିଛନ୍ତି । ବିଜୟୱାଡାରେ ଆୟୋଜିତ ଶପଥ ଗ୍ରହଣ ସମାରୋହରେ ଆନ୍ଧ୍ର ରାଜ୍ୟପାଳ ଅବଦ୍ଦୁଲ ନଜିର, ମୁଖ୍ୟମନ୍ତ୍ରୀ ଓ ଅନ୍ୟ ମନ୍ତ୍ରୀମାନଙ୍କୁ ପଦ ଓ ଗୋପନୀୟତାର ଶପଥ ପାଠ କରାଇଛନ୍ତି । ତେବେ ମିଳିଥିବା ସୂଚନା ଅନୁସାରେ, ଟିଡିପିର ୨୧ ବିଧାୟକ, ଜନସେନା ପାର୍ଟିରୁ ୩ ଓ ବିଜେପିରୁ ଜଣେ ବିଧାୟକ ମନ୍ତ୍ରୀ ଭାବେ ଶପଥ ଗ୍ରହଣ କରିଛନ୍ତି । କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ପୂର୍ବତନ ଉପ-ରାଷ୍ଟ୍ରପତି ଭେଙ୍କେୟା ନାଇଡୁ, ଗୃହମନ୍ତ୍ରୀ ଅମିତ ଶାହ, ସ୍ବାସ୍ଥ୍ୟମନ୍ତ୍ରୀ ଜେ.ପି ନଡ୍ଡା ଓ କେନ୍ଦ୍ର ପରିବହନ ମନ୍ତ୍ରୀ ନୀତିନ ଗଡକରୀ ପ୍ରମୁଖ ସାମିଲ ହୋଇଥିଲେ । ‘ଏନଡିଏ’ ମେଣ୍ଟର ଅନ୍ୟତମ ସହଯୋଗୀ ଦଳ ଜନସେନା ପାର୍ଟି ମୁଖ୍ୟ ପବନ କଲ୍ୟାଣ ଉପମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିଛନ୍ତି ।
ଆନ୍ଧ୍ର ରାଜନୀତିରେ ଏକ ଚର୍ଚ୍ଚିତ ଚେହେରା ହେଉଛନ୍ତି ଟିଡିପି ପ୍ରତିଷ୍ଠାତା ଚନ୍ଦ୍ରବାବୁ । ସେ ଚଳିତଥରକୁ ମିଶାଇ ମୋଟ ୪ଥର ରାଜ୍ୟର ମୁଖ୍ୟମନ୍ତ୍ରୀ ହୋଇଛନ୍ତି । ୧୯୯୫ରେ ସେ ପ୍ରଥମଥର ମୁଖ୍ୟମନ୍ତ୍ରୀ ନିର୍ବାଚିତ ହୋଇଥିଲେ । ଏହା ପରେ କ୍ରମାଗତ ୨୦୦୪ ପର୍ଯ୍ୟନ୍ତ ୯ ବର୍ଷ ଧରି ମୁଖ୍ୟମନ୍ତ୍ରୀ ଥିଲେ । ଆନ୍ଧ୍ର ବିଭାଜିତ ହେବା ପରେ ସେ ୨୦୧୪ରେ ପୁଣି ମୁଖ୍ୟମନ୍ତ୍ରୀ ହୋଇଥିଲେ । ହେଲେ ୨୦୧୯ରେ ତାଙ୍କୁ ଜଗନଙ୍କ ପାର୍ଟି ୱାଇଏସଆର-କଂଗ୍ରେସ ଠାରୁ ପରାଜିତ ହେବାକୁ ପଡିଥିଲା । ଏହାପରେ ସେ ଏକାଧିକ ଘୋଟାଲା ମାମଲାରେ ଛନ୍ଦି ହୋଇଥିଲେ । ଗତବର୍ଷ ସେ ଗିରଫ ହୋଇ ଜେଲ ମଧ୍ୟ ଯାଇଥିଲେ । ଜେଲରୁ ବେଲରେ ଆସି ନିର୍ବାଚନ ଲଢିଥିଲେ ଚନ୍ଦ୍ରବାବୁ । ଦୀର୍ଘ ବର୍ଷ ପରେ ସେ ବିଜେପି ନେତୃତ୍ବାଧୀନ ‘ଏନଡିଏ’ ମେଣ୍ଟକୁ ଫେରିଥିଲେ । ଚଳିତଥର ତାଙ୍କ ଦଳ ‘ଟିଡିପି’ ଏକାକୀ ୧୩୫ ଆସନ ଜିତିଥିଲା । ‘ଏନଡିଏ’ ମେଣ୍ଟ ଚନ୍ଦ୍ରବାବୁଙ୍କ ନେତୃତ୍ବରେ ଏଥର ସରକାର ଗଠନ କରିଛି ।
