କୋଲକାତା: ହାଇକୋର୍ଟଙ୍କ ଦ୍ବିତୀୟ ନିର୍ଦ୍ଦେଶ ପରେ ବହୁଚର୍ଚ୍ଚିତ ଶନ୍ଦେଶଖାଲି ମହିଳା ନିର୍ଯାତନାକାଣ୍ଡର ମୁଖ୍ୟ ଅଭିଯୁକ୍ତ ଶେଖ ଶାହାଜାହନକୁ କେନ୍ଦ୍ରୀୟ ସଂସ୍ଥା ‘ସିବିଆଇ’କୁ ହସ୍ତାନ୍ତର କରିଛି ପଶ୍ଚିମବଙ୍ଗ ପୋଲିସ । ଆଜି ଅପରାହ୍ନରେ କୋର୍ଟ ଅଭିଯୁକ୍ତଙ୍କୁ ଅପରାହ୍ନ 4.15 ସୁଦ୍ଧା ସିବିଆଇକୁ ହସ୍ତାନ୍ତର କରିବା ପାଇଁ ରାଜ୍ୟ ସରକାର ଓ ପୋଲିସକୁ ନିର୍ଦ୍ଦେଶ ଦେଇଥିଲେ । କୋର୍ଟଙ୍କ ନିର୍ଦ୍ଦେଶ ପରେ ସିବିଆଇ ଟିମ କୋଲକାତା ପୋଲିସର ମୁଖ୍ୟାଳୟରେ ପହଞ୍ଚିଥିଲା । ଏବେ କେନ୍ଦ୍ରୀୟ ସଂସ୍ଥା ଶେଖ ଶାହାଜାହନକୁ କଷ୍ଟଡିକୁ ନେଇ ଜେରା କରୁଛି ।
ତେବେ ଗତକାଲି ଏହି ମାମଲାରେ କୋଲକାତା ହାଇକୋର୍ଟ ସମାନ ନିର୍ଦ୍ଦେଶ ଦେଇଥିଲେ । ହେଲେ ଏହା ବିରୋଧରେ ମମତା ସରକାର ସର୍ବୋଚ୍ଚ କୋର୍ଟରେ ଦ୍ବାରସ୍ଥ ହୋଇଥିଲେ । ଆଜି ପୁଣି ଥରେ ହାଇକୋର୍ଟ ଏହି ମାମଲାରେ ସରକାରଙ୍କୁ ତାଗିଦ କରିବା ସହ ଅପରାହ୍ନରେ ସିବିଆଇକୁ ହସ୍ତାନ୍ତର କରିବା ଲାଗି କହିଥିଲେ । ସର୍ବୋଚ୍ଚ କୋର୍ଟରେ ଏହି ମାମଲା ବିଚାରାଧୀନ ଥିବାରୁ ଶାହାଜାହାନକୁ ସିବିଆଇ ହସ୍ତାନ୍ତର କରାଯିବା ଉଚିତ ନୁହେଁ ବୋଲି ପଶ୍ଚିମବଙ୍ଗ ସିଆଇଡି ପକ୍ଷରୁ ମାମଲା ଲଢୁଥିବା ଓକିଲ ଯୁକ୍ତି ବାଢିଥଲେ । ସୁପ୍ରିମକୋର୍ଟ ଆଜି (ବୁଧବାର) ଶୁଣାଣିରେ କହିଛନ୍ତି, ବର୍ତ୍ତମାନ ପର୍ଯ୍ୟନ୍ତ ହାଇକୋର୍ଟଙ୍କ ଆଦେଶ ବଳବତ୍ତର ରହିବ । ଏହାର ମାତ୍ର କିଛି ଘଣ୍ଟା ମଧ୍ୟରେ ହାଇକୋର୍ଟ ମଧ୍ୟ ଦ୍ବିତୀୟ ନିର୍ଦ୍ଦେଶ ଜାରି କରିଥିଲେ ।
ଗତ ଗୁରୁବାର ୫୫ ଦିନର ଲୁଚକାଳି ଖେଳ ପରେ ମୁଖ୍ୟ ଅଭିଯୁକ୍ତ ଶାହାଜାହାନକୁ ଉତ୍ତର ୨୪ ପ୍ରଗଣା ଜିଲ୍ଲାର ମିନାଖାନ ଅଞ୍ଚଳରୁ ପୋଲିସ ଶାହାଜାହନକୁ ଗିରଫ କରିବାରେ ସଫଳ ହୋଇଥିଲା । ଗତ ଜାନୁଆରୀ ୫ ତାରିଖରୁ ସେ ଫେରାର ଥିଲା । ତା ବିରୋଧରେ ମୋଟ 43ଟି ଅପରାଧିକ ମାମଲା ରହିଛି । କେନ୍ଦ୍ରୀୟ ସଂସ୍ଥା ପ୍ରବର୍ତ୍ତନ ନିର୍ଦ୍ଦେଶାଳୟ ଆର୍ଥିକ ହେରଫେର ମାମଲାରେ ତାର ଠିକଣାରେ ଚଢାଉ କରିବାକୁ ଗଲା ବେଳେ ତାର ସମର୍ଥକମାନେ କେନ୍ଦ୍ରୀୟ ଅଧିକାରୀଙ୍କୁ ଆକ୍ରମଣ କରିଥିଲେ । ଏଥିରେ ଏକାଧିକ ଅଧିକାରୀ ଆହତ ହୋଇଥିଲେ । ଏହାପରଠାରୁ ସେ ଫେରାର ରହିଥିଲା । ପରେ ସ୍ଥାନୀୟ ମହିଳାମାନେ ଶାହଜାହାନ ଓ ତାର ସହଯୋଗୀଙ୍କ ବିରୋଧରେ ସାଙ୍ଘାତିକ ଅଭିଯୋଗ ଆଣି ଆନ୍ଦୋଳନ କରିଥିଲେ । ସେମାନେ ଶାହାଜାହନ ଓ ତାର ସହଯୋଗୀଙ୍କ ଦ୍ବାରା ବର୍ଷ ବର୍ଷ ଧରି ଯୌନ ନିର୍ଯାତନାର ଶିକାର ହୋଇଥିବା ଅଭିଯୋଗ କରିଥିଲେ । ଏହି ମାମଲାରେ ଏବେ ମଧ୍ୟ ରାଜ୍ୟରେ ରାଜନୀତି ଓ ପ୍ରତିବାଦ ଜାରି ରହିଛି ।
ବ୍ଯୁରୋ ରିପୋର୍ଟ, ଇଟିଭି ଭାରତ
