ଚଣ୍ଡିଗଡ଼: ପଞ୍ଜାବରେ ପଞ୍ଚାୟତ ନିର୍ବାଚନ ପରବର୍ତ୍ତୀ ହିଂସା । ମୋଟରସାଇକେଲରେ ଆସି ଆଖିବୁଜା ଗୁଳିଚାଳନା କଲେ 3 ଯୁବକ। ଗୁଳିମାଡ଼ରେ ପ୍ରାଣ ହରାଇଲେ ନବନିର୍ବାଚିତ ସରପଞ୍ଚ । ମୃତ ସରପଞ୍ଚ ହେଉଛନ୍ତି ରାଜବିନ୍ଦର ସିଂ । ସୂଚନା ଅନୁସାରେ, ଆମ ଆଦମୀ ପାର୍ଟି ନେତା ରାଜବିନ୍ଦର ସିଂ ନିର୍ବିରୋଧ ଭାବେ ତାଲୱାନ୍ଦି ଗ୍ରାମର ସରପଞ୍ଚ ଭାବେ ନିର୍ବାଚିତ ହୋଇଛନ୍ତି । ଏହାପରେ ନିର୍ବାଚିତ ହେବା ଖୁସିରେ ନିଜ ସମର୍ଥକଙ୍କ ସହ ସେ କାର୍ ଯୋଗେ ଯାତ୍ରା କରୁଥିଲେ । ଏହି ସମୟରେ ହଠାତ୍ 3 ଜଣ ଯୁବକ ଆସି ସରପଞ୍ଚଙ୍କୁ ଶୁଭକାମନା ଜଣାଇବା ସହ କରିଥିଲେ ଅତର୍କିତ ଗୁଳିଚାଳନା । ଯେଉଁଥିରେ ରାଜବିନ୍ଦରଙ୍କ ସମର୍ଥକମାନେ ମଧ୍ୟ ଆହତ ହୋଇଛନ୍ତି ।
ସମ୍ପୃକ୍ତ ଅଞ୍ଚଳରେ ଏହା ତୃତୀୟ ହତ୍ୟାକାଣ୍ଡ:
ସୂଚନା ମୁତାବକ, କୌଣସି ପ୍ରତିଦ୍ବନ୍ଦୀ ନଥିବାରୁ ନିର୍ଦ୍ବନ୍ଦ୍ବରେ ନିର୍ବାଚିତ ହୋଇଥିଲେ ରାଜବିନ୍ଦର ସିଂ । କାର୍ ଯୋଗେ ସମର୍ଥକଙ୍କ ସହ ଫେରୁଥିବାବେଳେ ଏଭଳି ଗୁଳିକାଣ୍ଡ ହୋଇଥିବା ଜଣାପଡ଼ିଛି । ତେବେ ତରନତାରନରେ ନେତାଙ୍କୁ ହତ୍ୟାର ଏ ହେଉଛି ତୃତୀୟ ଘଟଣା। ଆଜି ସ୍ପଷ୍ଟ ଦିବାଲୋକରେ ସରପଞ୍ଚଙ୍କୁ ଗୁଳିମାଡ଼ ପରେ ଭୟର ବାତାବରଣ ଖେଳିଯାଇଛି ।
କିଏ କରିଥିଲା ଗୁଳିଚାଳନା?
କିଏ ଗୁଳିମାଡ଼ କଲା ସେନେଇ କୌଣସି ସ୍ପଷ୍ଟ ସୂଚନା ଏପର୍ଯ୍ୟନ୍ତ ମିଳିପାରିନାହିଁ । ବର୍ତ୍ତମାନସୁଦ୍ଧା ଗୁଳିକାଣ୍ଡ କରିଥିବା ଦୁବୃର୍ତ୍ତଙ୍କ ପରିଚୟ ଅସ୍ପଷ୍ଟ ରହିଛି । ଘଟଣାକୁ ନେଇ ସମଗ୍ର ଅଞ୍ଚଳରେ ଭୟର ବାତାବରଣ ଖେଳିଯାଇଛି । ଗତ କିଛି ଦିନ ଧରି ଏଭଳି ଅଶାନ୍ତି ଲାଗି ରହିଥିବାରୁ ସୁରକ୍ଷା ବ୍ୟବସ୍ଥାକୁ ନେଇ ଉଠିଛି ପ୍ରଶ୍ନ । ସଙ୍ଗେ ସଙ୍ଗେ ସ୍ଥାନୀୟ ମେଡିକାଲକୁ ସରପଞ୍ଚଙ୍କୁ ଅଣାଯାଇଥିଲା । ହେଲେ ସେତେବେଳକୁ ତାଙ୍କର ମୃତ୍ୟୁ ହୋଇଥିବା କହିଛନ୍ତି ଡାକ୍ତର । ରାଜବିନ୍ଦର ସିଂଙ୍କ ପରିବାରଲୋକେ ଖବର ପାଇ ମେଡିକାଲରେ ପହଞ୍ଚିଛନ୍ତି। କାନ୍ଦବୋବାଳିରେ ଫାଟି ପଡ଼ିଛି ପୂରା ପରିବେଶ । ନୂଆ କରି ସରପଞ୍ଚ ହୋଇଥିବାରୁ ଖୁସି ମନାଇବାକୁ ଯାଉଥିବା ରାଜବିନ୍ଦରଙ୍କ ଏପରି ଅକାଳ ମୃତ୍ୟୁକୁ ନେଇ ଭାଙ୍ଗି ପଡ଼ିଛନ୍ତି ପୂରା ପରିବାର । ଦୋଷୀଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ନେବାକୁ ଦାବି କରିଛନ୍ତି ପରିବାରଲୋକେ ।
