ହାଇଦ୍ରାବାଦ: NEET ପେପର ଲିକ୍ ମାମଲାରେ ଆଜି ସୁପ୍ରିମକୋର୍ଟରେ ଗୁରୁତ୍ୱପୂର୍ଣ୍ଣ ଶୁଣାଣି ହେବାର ଥିଲା । ଆଜି ସେପରି କିଛି ରାୟ ପ୍ରକାଶ କରିନାହାନ୍ତି । ମାମଲାର ପରବର୍ତ୍ତୀ ଶୁଣାଣି ଗୁରୁବାର ପର୍ଯ୍ୟନ୍ତ ସ୍ଥଗିତ ରଖାଯାଇଛି । ପ୍ରଧାନ ବିଚାରପତି ଡିଓ୍ବାଇ ଚନ୍ଦ୍ରଚୂଡଙ୍କ ନେତୃତ୍ୱାଧୀନ ଖଣ୍ଡପୀଠ ଜୁଲାଇ 18 ତାରିଖରେ ପରୀକ୍ଷା ଅନିୟମିତତା ଏବଂ ପୁନଃପରୀକ୍ଷା ପାଇଁ ହୋଇଥିବା ଆବେଦନ ଶୁଣାଣି କରିବ । କେନ୍ଦ୍ର ଏବଂ ଜାତୀୟ ପରୀକ୍ଷା ଏଜେନ୍ସି (ଏନଟିଏ)ର ସତ୍ୟପାଠ ଦାଖଲ ପରେ ଆଜି କେନ୍ଦ୍ରୀୟ ଅନୁସନ୍ଧାନ ବ୍ୟୁରୋ (ସିବିଆଇ) ଏକ ମୁଦ୍ଦା ଲଫାପାରେ ସୁପ୍ରିମକୋର୍ଟରେ ମାମଲାର ତଦନ୍ତ ରିପୋର୍ଟ ଦାଖଲ ମଧ୍ୟ କରିଛି ।
ରିପୋର୍ଟ ସାର୍ବଜନୀନ ହୋଇନଥିଲେ ସୁଦ୍ଧା ସୂତ୍ରରୁ ମିଳିଥିବା ସୂଚନା ଅନୁସାରେ, ସିବିଆଇ ଦାଖଲ ରିପୋର୍ଟରେ ଏହା ଦର୍ଶାଇଛି ଯେ, NEET ପରୀକ୍ଷାରେ ହୋଇଥିବା ଲିକ୍ କେବଳ ପରୀକ୍ଷା କେନ୍ଦ୍ର ମଧ୍ୟରେ ସୀମିତ ରହିଥିଲା । ଏହା ସୋସିଆଲ ମିଡିଆରେ କିମ୍ବା ଅନ୍ୟ କୌଣସି ମାଧ୍ୟମରେ ଲିକ୍ ହୋଇନାହିଁ । ପୂର୍ବରୁ ଏନଟିିଏ ମଧ୍ୟ ସମାନ ତଥ୍ୟ ସତ୍ୟପାଠ ଆଧାରରେ କୋର୍ଟଙ୍କୁ ଅବଗତ କରିଥିଲା । କୌଣସି ପରୀକ୍ଷା କେନ୍ଦ୍ରର ଷ୍ଟ୍ରଙ୍ଗରୁମର ତାଲା ଭଙ୍ଗାଯାଇନି କିମ୍ବା ପରୀକ୍ଷା ପ୍ରଶ୍ନପତ୍ରର କ୍ରମିକ ସଂଖ୍ୟାରେ ମଧ୍ୟ କୌଣସି ପରିବର୍ତ୍ତନ ହୋଇନି ବୋଲି ଏନଟିଏ କୋର୍ଟଙ୍କୁ କହିଥିଲା । ଆଜି ସମାନ କଥା ସିବିଆଇ ମଧ୍ୟ ମୁଦ୍ଦା ଲଫାପାରେ ରିପୋର୍ଟ ଦାଖଲ କରିଥିବା ସୂଚନା ରହିଛି । ଅନ୍ୟପଟେ ରାଜସ୍ଥାନ ହାଇକୋର୍ଟରେ ଜାରି ରହିଥିବା ଏହି ପ୍ରଶ୍ନପତ୍ର ଲିକ ସମ୍ପର୍କିତ ମାମଲାର ସ୍ଥାନାନ୍ତର ସର୍ବୋଚ୍ଚ କୋର୍ଟଙ୍କୁ କରିବା ପାଇଁ ଏନଟିଏ କରିଥିବା ମାମଲାରେ ମଧ୍ୟ କୋର୍ଟ ନୋଟିସ ଜାରି କରିଛନ୍ତି ।
ଚଳିତବର୍ଷ ମେ’ ମାସ ୫ ତାରିଖରେ NEET ପରୀକ୍ଷା ଅନୁଷ୍ଠିତ ହୋଇଥିଲା । ଦେଶର ବିଭିନ୍ନ କେନ୍ଦ୍ରରେ ମୋଟ ୨୪ ଲକ୍ଷରୁ ଅଧିକ ପରୀକ୍ଷାର୍ଥୀ ଆବେଦନ ଫର୍ମରେ ପଞ୍ଜିକରଣ କରିବା ସହ ପ୍ରାୟ ସାଢେ ୨୩ ଲକ୍ଷ ଛାତ୍ରଛାତ୍ରୀ ପରୀକ୍ଷାରେ ଅଂଶଗ୍ରହଣ କରିଥିଲେ । ପୂର୍ବରୁ ଏହି ରେଜଲ୍ଟ ଜୁନ ୧୪ ତାରିଖରେ ଘୋଷଣା ହେବାକୁ ସ୍ଥିର କରାଯାଇଥିବା ବେଳେ ୪ ତାରିଖରେ ପରୀକ୍ଷା ଫଳାଫଳ ପ୍ରକାଶନକୁ ନେଇ ମଧ୍ୟ ବିବାଦ ସୃଷ୍ଟି ହୋଇଥିଲା । ଫଳାଫଳରେ ୬୭ ଜଣ ପରୀକ୍ଷାର୍ଥୀ ଶୀର୍ଷ ସ୍ଥାନରେ ରହିବା ପରେ ବିବାଦ ଦେଖାଯିବା ସହ ସ୍ୱଚ୍ଛତା ଉପରେ ପ୍ରଶ୍ନ ସୃଷ୍ଟି ହୋଇଥିଲା । ଏହି ଘଟଣାର ତଦନ୍ତ ପାଇଁ ଏକ ‘ଏସଆଇଟି’ ଗଠନ କରିବା ଦାବିରେ ସର୍ବୋଚ୍ଚ କୋର୍ଟରେ ମାମଲା କରିଥିଲେ ବହୁ ପରୀକ୍ଷାର୍ଥୀ । ସେହିପରି କାଉନସିଲିଂ ପ୍ରକ୍ରିୟାକୁ ବନ୍ଦ ରଖିବା ପାଇଁ ମଧ୍ୟ ଆବେଦନରେ ଦାବି ହୋଇଥିଲା । ଗ୍ରେସ ମାର୍କ ପାଇଥିବା ଛାତ୍ରଛାତ୍ରୀଙ୍କ ପାଇଁ ସାନି ପରୀକ୍ଷା କରାଇ ଫଳ ମଧ୍ୟ ପ୍ରକାଶିତ ହୋଇସାରିଛି । ତଥାପି କାଉନସିଲିଂ ବନ୍ଦ ରଖାଯିବା ସହ ମାମଲା ସର୍ବୋଚ୍ଚ କୋର୍ଟରେ ବିଚାରାଧୀନ ରହିଛି । ପୁନଃ ପରୀକ୍ଷା ହେବକି ନାହିଁ, ତାହା ଆସନ୍ତା ଶୁଣାଣିରେ ସ୍ପଷ୍ଟ ହୋଇପାରେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
