ଜୟପୁର: ଲୋକସଭା ନିର୍ବାଚନ 2024ର ଦ୍ବିତୀୟ ପର୍ଯ୍ୟାୟରେ ରାଜସ୍ଥାନର ସମସ୍ତ 25 ଲୋକସଭା ଆସନରେ ସରିଛି ଭୋଟିଂ । ଏହା ପୂର୍ବରୁ ବିଜେପି ଓ କଂଗ୍ରେସ ମଧ୍ୟରେ ଜାରି ରହିଥିଲା ଆରୋପ ପ୍ରତ୍ୟରୋପ । ଏହି ବାକ୍ଯୁଦ୍ଧରେ ଆପତ୍ତିଜନକ ଶବ୍ଦର ବ୍ୟବହାରକୁ ନେଇ ନିର୍ବାଚନ ଆୟୋଗଙ୍କ ଦ୍ବାରସ୍ଥ ହୋଇଥିଲା କଂଗ୍ରେସ । ରାଜ୍ୟର କିଛି ମନ୍ତ୍ରୀ, ଅଧିକାରୀ ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପର୍ଯ୍ୟନ୍ତ 21ଟି ଅଭିଯୋଗ ପତ୍ର ଦାଖଲ କରିଥିଲା କଂଗ୍ରେସ । ମାତ୍ର କୌଣସି କାର୍ଯ୍ୟାନୁଷ୍ଠାନ ନ ନିଆଯିବା ପରେ ନିର୍ବାଚନ ଆୟୋଗଙ୍କ ବିରୋଧରେ ଗମ୍ଭୀର ଆରୋପ ଲଗାଇଛନ୍ତି ରାଜ୍ୟ କଂଗ୍ରେସ ସଭାପତି ଗୋବିନ୍ଦ ସିଂ ଡୋଟାସରା ।
'ଶୋଇଛନ୍ତି ନିର୍ବାଚନ ଆୟୋଗ':- ରାଜ୍ୟ କଂଗ୍ରେସ ସଭାପତି ଗୋବିନ୍ଦ ସିଂ ଡୋଟାସରା ଏକ୍ସ ସାଇଟରେ ଏକ ପୋଷ୍ଟ କରି କହିଛନ୍ତି, " ମାନନୀୟ ନିର୍ବାଚନ ଆୟୋଗ, ରାଜସ୍ଥାନ କଂଗ୍ରେସ 21ଟି ଅଭିଯୋଗ ଆଣିଥିଲା । ହେଲେ ଜଣଙ୍କୁ ବି ନୋଟିସ ପଠାଯାଇନାହିଁ । ଏଯାବତ କୌଣସି କାର୍ଯ୍ୟାନୁଷ୍ଠାନ ମଧ୍ୟ ନିଆଯାଇ ନାହିଁ । ନିର୍ବାଚନ ଆୟୋଗ ଶୋଇପଡ଼ିଛନ୍ତି ନା ନିଜ ଦାୟିତ୍ବ ଭୁଲିଯାଇଛନ୍ତି ।"
କାହା ବିରୋଧରେ କଣ ଅଭିଯୋଗ ? :- ଡୋଟାସରାଙ୍କ ଦ୍ବାରା ଜାରି କରାଯାଇଥିବା ସୂଚନା ଅନୁସାରେ, ଆଇପିଏଲ୍ ମ୍ୟାଚ୍ ପାଇଁ ମାଗଣା ପାସ୍ ଦେଇଥିବାରୁ ରାଜ୍ୟ କ୍ରୀଡ଼ା ପରିଷଦ ବିରୋଧରେ ନିର୍ବାଚନ ଆୟୋଗଙ୍କ ନିକଟରେ କଂଗ୍ରେସ ଅଭିଯୋଗ କରିଛି । ପରିମଳ କର୍ମଚାରୀଙ୍କୁ ମାଗଣା ଆଇପିଏଲ ପାସ୍ ଦେଇଥିବାରୁ ମନ୍ତ୍ରୀ ରାଜବର୍ଦ୍ଧନ ସିଂ ରାଠୋରଙ୍କ ବିରୋଧରେ ଅଭିଯୋଗ ହୋଇଛି । ସରକାରୀ କର୍ମଚାରୀଙ୍କୁ ଧମକ ଦେଉଥିବା ଅଭିଯୋଗ କରି ସନ୍ତୋଷ ଅହଲୱାତଙ୍କ ବିରୋଧରେ ଅଭିଯୋଗ । ଏହାସହ ମନ୍ତ୍ରୀ ମଦନ ଦିଲୱାରଙ୍କ ବିରୋଧରେ ଧାର୍ମିକ ପ୍ରଶଂସକ ପ୍ରସାର କରିଥିବା ଅଭିଯୋଗରେ ମଧ୍ୟ ଅଭିଯୋଗ ହୋଇଛି । ଏହି ସମସ୍ତ ଅଭିଯୋଗ ଉପରେ ଏଯାବତ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନାହିଁ ।
ଏହା ବି ପଢନ୍ତୁ- AAPର ନିର୍ବାଚନୀ ପ୍ରଚାର ଗୀତ ଉପରେ ECଙ୍କ ରୋକ, କଣ କହିଲେ ଆତିଶୀ
ଏହାସହିତ ବାଡମେର- ଜୈସଲମେରର ସ୍ବାଧୀନ ପ୍ରାର୍ଥୀ ରବିନ୍ଦ୍ର ସିଂ ଭଟ୍ଟଙ୍କ ବିରୁଦ୍ଧରେ ଷ୍ଟେଜରୁ ମିଥ୍ୟା ତଥ୍ୟ ପ୍ରଚାର କରିବା ଏବଂ କଂଗ୍ରେସର ରାଜ୍ୟ ସଭାପତିଙ୍କ ବିରୋଧରେ ମିଥ୍ୟା ପ୍ରଚାର ପ୍ରସାର ପାଇଁ ରାଜେନ୍ଦ୍ର ରାଠୋରଙ୍କ ବିରୋଧରେ ତାଙ୍କ ବିବୃତ୍ତି ନେଇ ଏକ ଅଭିଯୋଗ ହୋଇଛି । ଦେୟଯୁକ୍ତ ଖବର ସମ୍ପର୍କରେ କଂଗ୍ରେସ ମଧ୍ୟ ମୁଖ୍ୟମନ୍ତ୍ରୀ ଭଜନ ଲାଲ ଶର୍ମାଙ୍କ ବିରୋଧରେ ଅଭିଯୋଗ ଆଣିଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ 2ଟି ବୟାନ 'କଂଗ୍ରେସ ରାମ ମନ୍ଦିର ଯାଉଥିବା ବ୍ୟକ୍ତିଙ୍କୁ ଦଳରୁ ବାହର କରିଛି ଓ କଂଗ୍ରେସର ଘୋଷଣା ପତ୍ର ମୁସଲିମ ଲିଗ ପାଇଁ' ବିରୋଧରେ ମଧ୍ୟ କଂଗ୍ରେସ ନିର୍ବାଚନ ଆୟୋଗଙ୍କ ନିକଟରେ ଅଭିଯୋଗ ହୋଇଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
