ଶ୍ରୀନଗର: ଋଷ ସେନାରେ ୟୁକ୍ରେନ ବିରୋଧରେ ଯୁଦ୍ଧ ଲଢୁଛନ୍ତି ଜଣେ କାଶ୍ମୀର ଯୁବକ । ଏହି ଯୁବକଙ୍କ ନାମ ଆଜାଦ ୟୁସୁଫ କୁମାର ଓ ସେ ପୁଲଓ୍ବାମା ଜିଲ୍ଲାର ବାସିନ୍ଦା । ସେ ଏବେ ଋଷ ସେନାରେ ଜଣେ ସୈନିକ ଭାବେ ୟୁକ୍ରେନ ସୀମାରେ ଯୁଦ୍ଧ ଲଢୁଛନ୍ତି । ତାଙ୍କ ସହ ଅନ୍ୟ କିଛି ଦେଶର ନାଗରିକ ମଧ୍ୟ ଋଷରେ ସୈନିକ ଭାବେ ଯୁଦ୍ଧ ଲଢୁଛନ୍ତି । ଏହି ବିଦେଶୀ ନାଗରିକମାନଙ୍କ ଉଭୟ ଋଷ ଓ ୟୁକ୍ରେନ ସହ କିମ୍ବା ଉଭୟ ଦେଶରେ ଦ୍ବନ୍ଦ୍ବରେ କୌଣସି ସମ୍ପର୍କ ନଥିବା ବେଳେ ଏମାନେ ଯୁଦ୍ଧରେ ନିଜ ଜୀବନକୁ ବାଜି ଲଗାଉଛନ୍ତି । କାଶ୍ମୀର ଯୁବକ ଆଜାଦ ୟୁସୁଫଙ୍କ ପରିବାର ଏହି ଖବର ପାଇବା ପରେ ଭାଙ୍ଗି ପଡିଛନ୍ତି । ମୁମ୍ବାଇର ଜଣେ ଏଜେଣ୍ଟ ମାଧ୍ୟମରେ ପୁଅକୁ ଷଡଯନ୍ତ୍ର କରି ଋଷ ପଠାଯାଇଥିବା ସେମାନେ ଅଭିଯୋଗ କରିଛନ୍ତି । ଆଜାଦ ୟୁସୁଫକୁ ଉଦ୍ଧାର କରି ସ୍ବଦେଶ ଫେରାଇ ଆଣିବା ପାଇଁ ସେମାନେ ଭାରତ ସରକାରକୁ ନିବେଦନ ମଧ୍ୟ କରିଛନ୍ତି ।
ପୁଲଓ୍ବାମାର ଏହି 31 ବର୍ଷୀୟ ଯୁବକ ୟୁସୁଫ ବିବାହିତ ଓ ତାଙ୍କର 4 ମାସର ଏକ ସନ୍ତାନ ମଧ୍ୟ ରହିଛି । ପରିବାର ସଦସ୍ୟଙ୍କ ସୂଚନା ଅନୁସାରେ, ମୁମ୍ବାଇର ଜଣେ ଦଲାଲଙ୍କ ଜରିଆରେ ସେ ଗତବର୍ଷ ଡେସେମ୍ବରରେ ଦୁବାଇରେ କାମ କରିବାକୁ ଯାଇଥିଲେ । ଭାରତୀୟଙ୍କୁ ବିଦେଶରେ ନିଯୁକ୍ତି ଯୋଗାଇବା କାମ କରୁଥିବା ଏହି ଫୈଜଲ ଖାନ ନାମକ ଏହି ଏଜେଣ୍ଟ ‘ବାବା ବ୍ଲଗ’ ନାମରେ ଏକ ୟୁଟ୍ଯୁବ ଚ୍ୟାନେଲ ମଧ୍ୟ ଖୋଲିଥିଲା । ଇଣ୍ଟରନେଟରେ ଏହି ଭିଡିଓ ଦେଖି ୟୁସୁଫ କାମ ପାଇଁ ବିଦେଶ ଯିବାକୁ ସମ୍ପୃକ୍ତ ଏଜେଣ୍ଟଙ୍କ ସହ ଯୋଗାଯୋଗ କରିଥିଲେ । ଏହା ପରେ ତାଙ୍କୁ ଦୁବାଇ ପଠାଇବାକୁ ଏଜେଣ୍ଟ ଫୈଜଲ ପ୍ରକ୍ରିୟା ଆରମ୍ଭ କରିଥିଲା । ଗତବର୍ଷ ଡିସେମ୍ବର 14 ତାରିଖରେ ୟୁସୁଫ ଦୁବାଇର ଏକ କମ୍ପାନୀରେ କାମ କରିବା ପାଇଁ ବାହାରିଥିଲେ । ହେଲେ ସେ ପରେ ଋଷରେ ପହଞ୍ଚିଥିବା ଜଣାପଡିଥିଲା । ପରେ ତାଙ୍କୁ ସେଠାରୁ ନିଆଯାଇ ସେନାରେ ଭର୍ତ୍ତି କରାଯାଇଥିଲା ଏବଂ ଯୁଦ୍ଧ ଲଢିବା ପାଇଁ ୟୁକ୍ରେନ ସୀମାକୁ ପଠାଇ ଦିଆଯାଇଥିଲା ।
ୟୁସୁଫର ଭାଇ ସାଜାଦ ଅହମ୍ମଦଙ୍କ ସୂଚନା ଅନୁସାରେ, ୟୁସୁଫ ଋଷ ନୁହେଁ ବରଂ ଦୁବାଇର ଏକ କମ୍ପାନୀରେ କାମ କରିବା ପାଇଁ ବାହାରିଥିଲେ । ହେଲେ ପରେ ସେ ଋଷରେ ପହଞ୍ଚିଥିବା ଜଣାପଡିଛି । ୟୁସୁଫଙ୍କଠାରୁ ମିଳିଥିବା ସୂଚନା ଅନୁସାରେ, ଋଷ ସେନାରେ ଅନ୍ୟ କିଛି ଦେଶର ନାଗରିକ ମଧ୍ୟ ସୈନିକ ଭାବେ କାର୍ଯ୍ୟରତ ଅଛନ୍ତି । ସେମାନଙ୍କୁ ବଳପୂର୍ବକ ରଖାଯାଇଛି । ପରିବାର ସଦସ୍ୟ ଏନେଇ ଭାଙ୍ଗି ପଡିଛନ୍ତି । ଭାରତ ସରକାର ୟୁସୁଫଙ୍କୁ ଫେରାଇ ଆଣନ୍ତୁ ବୋଲି ସେମାନେ ବିଦେଶ ବ୍ୟାପାର ମନ୍ତ୍ରୀ ଏସ୍. ଜୟଶଙ୍କର ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ନିବେଦନ ମଧ୍ୟ କରିଛନ୍ତି । ସ୍ଥାନୀୟ ପୁଲଓ୍ବାମା ଜିଲ୍ଲା ଓ ପୋଲିସ ପ୍ରଶାସନ ୟୁସୁଫଙ୍କ ପରିବାର ସଦସ୍ୟଙ୍କୁ ଭେଟି ତଥ୍ୟ ସଂଗ୍ରହ କରିଛନ୍ତି । ତେବେ ୟୁସୁଫ ଋଷ ଯାତ୍ରା କରିଥିବା ନେଇ କୌଣସି ସରକାରୀ ତଥ୍ୟ ନାହିଁ । କେବଳ ଗଣମାଧ୍ୟମରୁ ଏହି ଖବର ମିଳିବା ପରେ ଏବେ ତଦନ୍ତ ଆରମ୍ଭ ହୋଇଥିବା କାଶ୍ମୀରର ଜଣେ ପୋଲିସ ଅଧିକାରୀ କହିଛନ୍ତି ।
ଏହା ମଧ୍ୟ ପଢନ୍ତୁ :- ଆରଜେଡି ନେତା ତେଜସ୍ବୀ ଯାଦବଙ୍କ ଏସକର୍ଟ ଗାଡ଼ି ଦୁର୍ଘଟଣା, ଜଣେ ପୋଲିସ ମୃତ
ଅନ୍ଯପଟେ କର୍ଣ୍ଣାଟକ ଓ ଗୁଜୁରାଟର କିଛି ଯୁବକ ମଧ୍ୟ ସମାନ ଭାବେ ଋଷ ସେନାରେ ଭର୍ତ୍ତି ହୋଇଥିବା ଅଭିଯୋଗ ହୋଇଥିଲା । ଗଣମାଧ୍ୟମରେ ଏନେଇ ଖବର ମଧ୍ୟ ପ୍ରସାରିତ ହୋଇଥିଲା । ଜାନୁଆରୀ 25 ତାରିଖରେ AIMIM ସାଂସଦ ଅସଦୁଦ୍ଦିନ ଔଓ୍ବେସୀ ଏହି ସଙ୍ଗୀନ ମାମଲାରେ ବିଦେଶ ମନ୍ତ୍ରୀ ଜୟଶଙ୍କରଙ୍କୁ ଚିଠି ଲେଖିଥିଲେ । ତୁରନ୍ତ ଭାରତୀୟଙ୍କୁ ଉଦ୍ଧାର କରି ସ୍ବଦେଶ ଫେରାଇ ଆଣିବା ପାଇଁ ସେ ଚିଠିରେ ନିବେଦନ କରିଥିଲେ । ଅନ୍ୟପଟେ ବିଦେଶ ମନ୍ତ୍ରଣାଳୟ ମଧ୍ୟ ଏହି ଅଭିଯୋଗକୁ କିଛି ମାତ୍ରାରେ ସ୍ବୀକାର କରିଛି । ବିଦେଶ ବ୍ୟାପାର ପ୍ରବକ୍ତା ରଣଧୀର ଜୈଶଓ୍ବାଲ ଚଳିତ ମାସ 13 ତାରିଖରେ ଏହି ପ୍ରସଙ୍ଗରେ ପ୍ରତିକ୍ରିୟା ରଖିଥିଲେ । କିଛି ଭାରତୀୟ ଋଷ ସେନାରେ ସାମିଲ ଥିବା ସୂଚନା ମିଳିଛି । ଭାରତୀୟ ଦୂତାବାସ ଏହି ପ୍ରସଙ୍ଗକୁ ପ୍ରାଥମିକତାର ସହ ନେଇଛି । ବିଦେଶରେ ଥିବା ଭାରତୀୟମାନେ ଦ୍ବନ୍ଦ୍ବ ଓ ଯୁଦ୍ଧରୁ ଦୂରରେ ରହିବା ପାଇଁ ବିଦେଶ ମନ୍ତ୍ରଣାଳୟ ପରାମର୍ଶ ମଧ୍ୟ ଦେଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
