ଚେନ୍ନାଇ: ହୃଦଘାତରେ ଆଖି ବୁଜିଲେ ଭାରତୀୟ ତଟରକ୍ଷୀ ବାହିନୀର ମହାନିର୍ଦ୍ଦେଶକ ରାକେଶ ପାଲ । ଆଜି ପ୍ରାୟ ସନ୍ଧ୍ୟା 7ଟା ସମୟରେ ତାମିଲନାଡୁର ରାଜୀବ ଗାନ୍ଧୀ ସରକାରୀ ଜେନେରାଲ ହସ୍ପିଟାଲରେ ସେ ଶେଷ ନିଶ୍ବାସ ତ୍ୟାଗ କରିଛନ୍ତି । ଛାତିରେ ଯନ୍ତ୍ରଣା ହେବାରୁ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା । ଶତ ଚେଷ୍ଟା ସତ୍ତ୍ବେ ଡାକ୍ତର ତାଙ୍କୁ ବଞ୍ଚାଇ ପାରିନଥିଲେ । ମୁଖ୍ୟମନ୍ତ୍ରୀ ଏକକେ ଷ୍ଟାଲିନ ଓ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ହସ୍ପିଟାଲରେ ପହଞ୍ଚି ଶ୍ରଦ୍ଧାଞ୍ଜଳି ଜ୍ଞାପନ କରିଛନ୍ତି ।
ବୈଠକ ବେଳେ ହୃଦଘାତ:
ସୂଚନା ଅନୁସାରେ, ଆଜି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂଙ୍କ ଚେନ୍ନାଇ ଗସ୍ତ ଥିବାରୁ ତଟରକ୍ଷୀ ବାହିନୀର ଡିଜି ରାକେଶ ପାଲ ଚେନ୍ନାଇ ସ୍ଥିତ ନୌସେନା ଘାଟି INS ଅଦ୍ୟାରରେ ବୈଠକ କରୁଥିଲେ । କିନ୍ତୁ ଦିନ 2.30 ସମୟରେ ତାଙ୍କୁ ହଠାତ୍ ଛାତିରେ ଯନ୍ତ୍ରଣା ହୋଇଥିଲା । ସଙ୍ଗେ ସଙ୍ଗେ ତାଙ୍କୁ ରାଜୀବ ଗାନ୍ଧୀ ସରକାରୀ ଜେନେରାଲ ହସ୍ପିଟାଲରେ ଭର୍ତ୍ତି କରାଯାଇଥିଲା । ହେଲେ ସନ୍ଧ୍ୟା ସମୟରେ ତାଙ୍କର ହୃଦଘାତରେ ଦେହାନ୍ତ ହୋଇଛି ।
ରାକେଶ ପାଲ୍ କିଏ ?
ରାକେଶ ପାଲ ଉତ୍ତରପ୍ରଦେଶର ବାସିନ୍ଦା ଅଟନ୍ତି । ଗତ ବର୍ଷ ଅର୍ଥାତ୍ 2023ରେ ତାଙ୍କୁ ଭାରତୀୟ ତଟରକ୍ଷା ବାହିନୀର 25ତମ ମହାନିର୍ଦ୍ଦେଶକ ଭାବେ ନିଯୁକ୍ତି ପାଇଥିଲେ । 1989 ମସିହାରୁ ଭାରତୀୟ ତଟରକ୍ଷା ବାହିନୀରେ ସେ ଯୋଗ ଦେଇଥିଲେ । ଦ୍ରୋଣାଚାର୍ଯ୍ୟ, ଭାରତୀୟ ନୌସେନା ସ୍କୁଲ, କୋଚି ଓ ୟୁକେର ଇଲୋକ୍ଟ୍ରୋ ଅଫ୍ଟିକସ ଫାୟାର କଣ୍ଟ୍ରୋଲ ସଲ୍ୟୁସନ କୋର୍ସ କରିଥିଲେ । ଅସ୍ତ୍ରଶସ୍ତ୍ର ନିର୍ମାଣ ପ୍ରଣାଳୀ ଉପରେ ଅଗାଧ ଜ୍ଞାନ ରଖିଥିଲେ ।
ବହୁ ଗୁରୁତ୍ବପୂର୍ଣ୍ଣ ପଦବୀ ସମ୍ଭାଳିଥିଲେ ରାକେଶ:
ଦୀର୍ଘ 35 ବର୍ଷ କ୍ୟାରିୟରରେ ବହୁ ଗୁରୁତ୍ବପୂର୍ଣ୍ଣ ପଦବୀ ସମ୍ଭାଳିଥିଲେ । ଯେପରିକି, ପଲିସି ଆଣ୍ଡ ପ୍ଲାନର ଡେପୁଟି ଡାଇରେକ୍ଟର ଜେନେରାଲ, ଫ୍ଲାଗ ଅଫିସର କମାଣ୍ଡାର କୋଷ୍ଟଗାର୍ଡ ରିଜିୟନ (ଉତ୍ତର-ପଶ୍ଚିମ), ନୂଆଦିଲ୍ଲା ସ୍ଥିତ ତଟରକ୍ଷୀ ବାହିନୀ କାର୍ଯ୍ୟାଳୟର ଅତିରିକ୍ତ ମହାନିର୍ଦ୍ଦେଶକ କୋଷ୍ଟଗାର୍ଡ ଭଳି ଅନେକ ଗୁରୁତ୍ବ ପୂର୍ଣ୍ଣ ପଦବୀରେ ରହିଥିଲେ ।
Deeply saddened at the untimely demise of Shri Rakesh Pal, DG, Indian Coast Guard in Chennai today. He was an able and committed officer under whose leadership ICG was making big strides in strengthening India’s maritime security. My heartfelt condolences to his bereaved family.
— Rajnath Singh (@rajnathsingh) August 18, 2024
ରାକେଶଙ୍କ ଦେହାନ୍ତରେ ପ୍ରତିରକ୍ଷା ମନ୍ତ୍ରୀଙ୍କ ଶୋକ:
ପରଲୋକରେ ଭାରତୀୟ ତଟରକ୍ଷୀ ବାହିନୀର ମହାନିର୍ଦ୍ଦେଶକ ରାକେଶ ପାଲ । ତାଙ୍କ ଦେହାନ୍ତରେ ସୋସିଆଲ ମିଡିଆ ଏକ୍ସରେ ଶୋକ ବ୍ୟକ୍ତ କରିଛନ୍ତି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ । ସେ ଲେଖିଛନ୍ତି, ଆଜି ଭାରତୀୟ ତଟରକ୍ଷୀ ବାହିନୀର ମହାନିର୍ଦ୍ଦେଶକ ରାକେଶ ପାଲଙ୍କ ନିଧନରେ ଗଭୀର ଦୁଃଖ ଲାଗୁଛି । ସେ ଜଣେ ଦକ୍ଷ ଓ ପ୍ରତିବଦ୍ଧ ଅଧିକାରୀ ଥିଲେ । ତାଙ୍କ ନେତୃତ୍ବରେ ଭାରତ ସମୁଦ୍ର ସୁରକ୍ଷାକୁ ମଜବୁତ କରିବାରେ ବହୁ ଆଗକୁ ଯାଇଥିଲା । ତାଙ୍କ ଶୋକସନ୍ତପ ପରିବାର ପ୍ରତି ମୋର ଗଭୀର ସମବେଦନା ।
ଏହା ମଧ୍ୟ ପଢନ୍ତୁ: ତଟରକ୍ଷୀ ଦିବସରେ କୋଷ୍ଟଗାର୍ଡ ଅଧିକାରୀଙ୍କୁ ପ୍ରଧାନମନ୍ତ୍ରୀଙ୍କ ଶୁଭେଚ୍ଛା; କହିଲେ 'ଉତ୍ସର୍ଗୀକୃତ ସେବା ଅତୁଳନୀୟ'
