ନୂଆଦିଲ୍ଲୀ/ଶିମଲା: ହିମାଚଳ ପ୍ରଦେଶରେ ରାଜ୍ୟସଭା ନିର୍ବାଚନରେ କ୍ରସଭୋଟିଂ କାରଣରୁ ବାଚସ୍ପତିଙ୍କ ଦ୍ବାରା ଅଯୋଗ୍ୟ ଘୋଷିତ ହୋଇଥିବା କଂଗ୍ରେସ ବିଧାୟକ ଆଜି ସର୍ବୋଚ୍ଚକୋର୍ଟରେ ଦ୍ବାରସ୍ଥ ହୋଇଛନ୍ତି । 6 କଂଗ୍ରେସ ବିଧାୟକ ଦଳୀୟ ହ୍ବିପ ଉଲ୍ଲଙ୍ଘନ କରି ବିଜେପି ପ୍ରାର୍ଥୀଙ୍କ ପାଇଁ ଭୋଟ ଦେଇଥିଲେ । ରାଜ୍ୟରେ ମାତ୍ର ଗୋଟିଏ ଆସନରେ ନିର୍ବାଚନ ହୋଇଥିବା ବେଳେ କ୍ରସଭୋଟିଂ କାରଣରୁ ଆବଶ୍ୟକ ସଂଖ୍ୟା ଥାଇ ମଧ୍ୟ କଂଗ୍ରେସ ପ୍ରାର୍ଥୀ ପରାଜିତ ହୋଇଥିଲେ । ବିଜେପି ପ୍ରାର୍ଥୀ ହର୍ଷ ମହାଜନ ବିଜୟୀ ହୋଇଥିଲେ । ଏହା ପରେ କ୍ରସଭୋଟିଂ କରିଥିବା ବିଧାୟକଙ୍କ ଉପରେ କାର୍ଯ୍ୟାନୁଷ୍ଠାନ ମଧ୍ୟ ହୋଇଥିଲା । ସମ୍ବିଧାନର 10ମ ସୂଚୀ ଅନୁସାରେ, ଦଳୀୟ ହ୍ବିପ ବିରୋଧରେ ଯାଇଥିବା ଏହି 6 ବିଧାୟକଙ୍କୁ ବାଚସ୍ପତି ପଦରୁ ଅଯୋଗ୍ୟ ଘୋଷିତ କରିଥିଲେ ।
ଅଯୋଗ୍ୟ ଘୋଷିତ ବିଧାୟକମାନଙ୍କ ମଧ୍ୟରେ ରାଜିନ୍ଦର ରାଣା, ସୁଧୀର ଶର୍ମା, ଇନ୍ଦର ଦତ୍ତ ଲକ୍ଷ୍ମଣପାଲ, ଦେବନ୍ଦର କୁମାର ଭୁଟ୍ଟୋ, ରବି ଠାକୁର ଏବଂ ଚୈତନ୍ୟ ଶର୍ମା ରହିଛନ୍ତି । ତେବେ ପୂର୍ବରୁ ଏହି ଅଯୋଗ୍ୟ ଘୋଷିତ ବିଧାୟକମାନେ ହିମାଚଳ ପ୍ରଦେଶ ହାଇକୋର୍ଟରେ ଦ୍ବାରସ୍ଥ ହୋଇଥିଲେ । ଏବେ ସେମାନେ ବାଚସ୍ପତି କୁଳଦ୍ବୀପ ସିଂ ପଠାନିଆଙ୍କ ନିଷ୍ପତ୍ତିକୁ ସର୍ବୋଚ୍ଚକୋର୍ଟରେ ଚ୍ୟାଲେଞ୍ଜ କରିଛନ୍ତି । ସେମାନଙ୍କ ଉପରେ ଗ୍ରହଣ କରାଯାଇଥିବା କାର୍ଯ୍ୟାନୁଷ୍ଠାନ ଅସ୍ବାମ୍ବିଧାନିକ ଓ ଏହାକୁ ରଦ୍ଦ କରିବା ପାଇଁ ସେମାନେ ଆବେଦନରେ ଉଲ୍ଲେଖ କରିଛନ୍ତି ।
ତେବେ ଏଠାରେ ଉଲ୍ଲେଖଯୋଗ୍ୟ ଯେ, ଗତମାସ (ଫେବୃଆରୀ) 27 ତାରିଖରେ ହୋଇଥିବା ରାଜ୍ୟସଭା ନିର୍ବାଚନ ଭୋଟିଂରେ ହିମାଚଳ ପ୍ରଦେଶରେ ହାଇଭୋଲଟେଜ ଡ୍ରାମା ଦେଖିବାକୁ ମିଳିଥିଲା । ରାଜ୍ୟରେ ମାତ୍ର ଗୋଟିଏ ଆସନରେ ଏହି ନିର୍ବାଚନ ହୋଇଥିବା ବେଳେ ସଂଖ୍ୟା ଦୃଷ୍ଟିରୁ ଶାସନରେ କଂଗ୍ରେସ ପ୍ରାର୍ଥୀ ଅଭିଷେକ ମନୁ ସିଙ୍ଗଭି ବିଜୟୀ ହେବା ଏକପ୍ରକାର ନିଶ୍ଚିତ ଥିଲା । ହେଲେ ଦଳୀୟ ହ୍ବପ ଉଲ୍ଲଙ୍ଘନ କରି 6 କଂଗ୍ରେସ ବିଧାୟକ ବିଜେପି ପ୍ରାର୍ଥୀଙ୍କୁ ଭୋଟ ଦେବାରୁ ଫଳାଫଳ ସମ୍ପୂର୍ଣ୍ଣ ଓଲଟା ହୋଇଥିଲା । ବିଜେପି ପ୍ରାର୍ଥୀ ହର୍ଷ ମହାଜନ ବିଜୟୀ ହୋଇଥିଲା । ଏହା ପରେ ଏହି କ୍ରସଭୋଟିଂ କରିଥିବା ବିଧାୟକମାନେ ହରିୟାଣା ଚାଲିଯାଇଥିବା ମଧ୍ୟ ଅଭିଯୋଗ ହୋଇଥିଲା ।
ମୁଖ୍ୟମନ୍ତ୍ରୀ ସୁଖବିନ୍ଦର ସିଂ ସୁଖୁ ଏହି ବିଧାୟକଙ୍କୁ ବିଜେପି କେନ୍ଦ୍ରୀୟ ଫୋର୍ସ ଲଗାଇ ହରିୟାଣା ନେଇଯାଇଥିବା ଅଭିଯୋଗ ଆଣିଥିଲେ । ଏହାର ପରଦିନ ସୁଖୁ କ୍ୟାବିନେଟରେ ମନ୍ତ୍ରୀ ଥିବା ବିକ୍ରମାଦିତ୍ୟ ସିଂ ମଧ୍ୟ ଇସ୍ତଫା ଦେଇଥିଲା । ଏହାର ସୁଯୋଗ ନେଇ ବିଜେପି ଗୃହରେ ସଂଖ୍ୟାବହୁମତର ପ୍ରମାଣ ମାଗିଥିଲା । ହେଲେ ଗୃହରେ ହଟ୍ଟଗୋଳ କରିବା ଅଭିଯୋଗରେ ପୂର୍ବତନ ମୁଖ୍ୟମନ୍ତ୍ରୀ ଜୟରାମ ଠାକୁରଙ୍କ ସମେତ ଏକାଧିକ ବିଜେପି ବିଧାୟକଙ୍କୁ ବାଚସ୍ପତି ନିଲମ୍ବିତ କରିଥିଲେ । ବିରୋଧୀଙ୍କ ଅନୁପସ୍ଥିତିରେ ରାଜ୍ୟ ବଜେଟ ମଧ୍ୟ ପାସ ହୋଇଥିଲା । ଏବେ ଏହି ମାମଲା ସର୍ବୋଚ୍ଚ କୋର୍ଟରେ ପହଞ୍ଚିବା ପରେ ରାଜ୍ୟରେ ରାଜନୈତିକ ସଙ୍କଟ ମଧ୍ୟ ବଢିବାକୁ ଯାଉଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
