ନୂଆଦିଲ୍ଲୀ: ମିଳିଲା ନାହିଁ ବେଲ, ଜେଲରେ ରହିବେ କେଜ୍ରିଓ୍ବାଲ । ଆଜି ଦିଲ୍ଲୀ ହାଇକୋର୍ଟରୁ କେଜ୍ରିଓ୍ବାଲଙ୍କୁ ନିରାଶ ହେବାକୁ ପଡିଛି । ଆଜି କେଜ୍ରିଓ୍ବାଲଙ୍କ ଆବେଦନର ଶୁଣାଣି କରି କୋର୍ଟ କୌଣସି ଅନ୍ତରୀଣ ଜାମିନ ଦେବାକୁ ମନା କରିଛନ୍ତି । ଏହା ସହ ମାମଲାରେ ସବିଶେଷ ତଥ୍ୟ ରଖିବା ପାଇଁ ପ୍ରବର୍ତ୍ତନ ନିର୍ଦ୍ଦେଶାଳୟକୁ ମଧ୍ୟ କୋର୍ଟ ନିର୍ଦ୍ଦେଶ ଦେଇଛନ୍ତି । ଏପ୍ରିଲ 2ତାରିଖ ପୂର୍ବରୁ କେନ୍ଦ୍ରୀୟ ସଂସ୍ଥା କୋର୍ଟ ନିକଟରେ ମାମଲା ଓ କାର୍ଯ୍ୟାନୁଷ୍ଠାନ ସମ୍ପର୍କିତ ସମସ୍ତ ତଥ୍ୟ ଦାଖଲ କରିବ । 3 ତାରିଖରେ ମାମଲାର ପରବର୍ତ୍ତୀ ତଥା ଚୂଡାନ୍ତ ଶୁଣାଣି କରିବାକୁ ସମୟ ଧାର୍ଯ୍ୟ କରାଯାଇଛି ।
ଏବେ କେଜ୍ରିଓ୍ବାଲ ଇଡି ରିମାଣ୍ଡରେ ଅଛନ୍ତି । 28 ତାରିଖରେ ତାଙ୍କ ପ୍ରଥମ ପର୍ଯ୍ୟାୟର 6 ଦିନିଆ ରିମାଣ୍ଡ ଶେଷ ହେବାକୁ ଯାଉଛି । ଏହା ପରେ ମଧ୍ୟ ତଦନ୍ତକାରୀ ସଂସ୍ଥା ପରବର୍ତ୍ତୀ ପର୍ଯ୍ୟାୟରେ ମଧ୍ଯ ରିମାଣ୍ଡ ଆବେଦନ କରିବାର ସମ୍ଭବନା ରହିଛି । 21 ତାରିଖରେ ଗିରଫ ହେବା ପରେ 22ରେ କେଜ୍ରିଓ୍ବାଲଙ୍କୁ ରାଉଜ ଆଭିନ୍ୟୁ କୋର୍ଟରେ ହାଜର କରିଥିଲା କେନ୍ଦ୍ରୀୟ ସଂସ୍ଥା । ଗିରଫଦାରୀ ଓ ରିମାଣ୍ଡ ନିର୍ଦ୍ଦେଶକୁ ପ୍ରଥମେ ସୁପ୍ରିମକୋର୍ଟ ଓ ପରେ ଦିଲ୍ଲୀ ହାଇକୋର୍ଟରେ ଚ୍ୟାଲେଞ୍ଜ କରିଥିଲେ କେଜ୍ରିଓ୍ବାଲ । ଏହି ମାମଲାରେ କୌଣସି ତତ୍କାଳ ଶୁଣାଣି କରିବାକୁ କୋର୍ଟ ମନା କରିଥିଲେ । ଆଜି କୋର୍ଟ ଏହି ମାମଲାର ଶୁଣାଣି କରିଛନ୍ତି । ହେଲେ ତୁରନ୍ତ ଆଶ୍ବସ୍ତି ପାଇବାକୁ ଲକ୍ଷ୍ୟ ରଖି ହାଇକୋର୍ଟରେ ଦ୍ବାରସ୍ଥ ହୋଇଥିବା କେଜ୍ରିଓ୍ବାଲଙ୍କୁ ଆଜି ମଧ୍ୟ ନିରାଶ ହେବାକୁ ପଡିଛି । ଏବେ ସେ ରିମାଣ୍ଡ ଶେଷ ହେବା ପରେ ଦ୍ବିତୀୟ ପର୍ଯ୍ୟାୟ ରିମାଣ୍ଡ କିମ୍ବା ବିଚାର ବିଭାଗୀୟ ହାଜତକୁ ଯିବେ ଏକପ୍ରକାର ସ୍ପଷ୍ଟ ହୋଇଛି ।
କେନ୍ଦ୍ରୀୟ ସଂସ୍ଥା ‘ପ୍ରବର୍ତ୍ତନ ନିର୍ଦ୍ଦେଶାଳୟ’ କ୍ରମାଗତ ତାଙ୍କୁ 9ଥର ନୋଟିସ ଜାରି କରିଥିଲା । ହେଲେ ପ୍ରତ୍ୟେକ ସମନକୁ କେଜ୍ରିଓ୍ବାଲ ଏଡାଇ ଯାଇଥିଲେ । ଏହା ବିରୋଧରେ ରାଉଜ ଆଭିନ୍ୟୁ କୋର୍ଟରେ ଦ୍ବାରସ୍ଥ ହୋଇଥିଲା ଇଡି । ଦିଲ୍ଲୀ ହାଇକୋର୍ଟରେ ମଧ୍ୟ ଅନ୍ତରୀଣ ସୁରକ୍ଷା ପାଇଁ କେଜ୍ରିଓ୍ବାଲ ଆବେଦନ କରିଥିଲେ । ହେଲେ ଦିଲ୍ଲୀ ହାଇକୋର୍ଟ ତାଙ୍କ ଅନ୍ତରୀଣ ସୁରକ୍ଷା ଆବେଦନକୁ ଖାରଜ କରିଦେବା ପରେ 21 ତାରିଖ ସଂଧ୍ୟାରେ ପ୍ରବର୍ତ୍ତନ ନିର୍ଦ୍ଦେଶାଳୟ ଟିମ୍ ଓ୍ବାରେଣ୍ଟ ସହ କେଜ୍ରିଓ୍ବାଲଙ୍କ ବାସଭବନରେ ପହଞ୍ଚିଥିଲା । କିଛି ଘଣ୍ଟାର ଜେରା ପରେ ଗିରଫ ହୋଇଥିଲେ କେଜ୍ରିଓ୍ବାଲ ।
ବ୍ୟୁରୋ ରିପୋର୍ଟ, ଇଟିଭି ଭାରତ
