मुख्यमंत्री पदाबाबत महाविकास आघाडीत वाद ? ; आता रोहित पवार यांचं मोठं वक्तव्य आलं पुढं - Rohit Pawar On Cm Candidate

Rohit Pawar On Cm Candidate : मुख्यमंत्री पदाबाबत महाविकास आघाडीत मोठा वाद सुरू आहे. उबाठा गटप्रमुख उद्धव ठाकरे यांनी मुख्यमंत्री पदाचा उमेदवार घोषित करण्याची मागणी केली. मात्र आज आमदार रोहित पवार यांनी मुख्यमंत्री पदाबाबत मोठं वक्तव्य केलं. त्यामुळे महाविकास आघाडीत पुन्हा वाद होण्याची शक्यता वर्तवली जात आहे.

पुणे Rohit Pawar On Cm Candidate : गेल्या एक महिन्यापासून महाविकास आघाडीत मुख्यमंत्री पदाचा चेहरा कोण, याबाबत चर्चा होत आहे. याबाबत अनेक नेते मंडळी यांनी वक्तव्य केलं असलं, तरी आता देखील याबाबत जोरदार चर्चा सुरू आहे. यावर राष्ट्रवादी काँग्रेस शरद पवार पक्षाचे आमदार रोहित पवार यांना विचारलं असता, ते म्हणाले की "ही चर्चा निवडणूक जाहीर होण्यापर्यंत राहणार आहे, पण जेव्हा निवडणूक जाहीर होणार तेव्हा कुठंही हा वाद किंवा चर्चा राहणार नाही. सर्वजण एकनिष्ठेनं महाराष्ट्र धर्म वाचवण्यासाठी महाविकास आघाडीतील नेते एकत्र येतील. निवडणुकीच्या नंतर याबाबत निर्णय घेतला जाईल, असं मला एक कार्यकर्ता म्हणून वाटते," असं यावेळी रोहित पवार यांनी यावेळी स्पष्ट केलं. मात्र उबाठा गटाचे प्रमुख उद्धव ठाकरे यांनी अगोदर मुख्यमंत्री पदाचा चेहरा जाहीर करा, असा आग्रह धरल्यानं हा वाद पुन्हा चिघळण्याची शक्यता वर्तवली जात आहे.

सरकारला संविधानाचं काहीही वाटत नाही : आमदार रोहित पवार यांच्या नेतृत्वाखाली आज एमपीएससीच्या विविध मागण्यांसाठी आंदोलन करणाऱ्या विद्यार्थ्यांनी शरद पवार यांची भेट घेतली. यावेळी ते बोलत होते. "पदाचा वाद आज नको, आज काय महत्वाचं आहे, तर शेतकरी, कष्टकरी, विद्यार्थी यांच्यासाठी लढण्याची गोष्ट आहे. मला नागरिक म्हणून भीती वाटू लागली आहे, की सरकारला संविधानाचं काहीही वाटत नाही. राज्याची निवडणूक ऑक्टोबरमध्ये व्हायला पाहिजे होती, मात्र आता नोव्हेंबरमध्ये निवडणुका होतील, असं वाटत आहे. संविधानाला धरून निवडणुका व्हायला हव्या होत्या. भाजपा आणि महायुतीचा इंटरनल सर्वे त्यांच्या बाजुनं नाही, तर विरोधात आहे. त्यामुळे निवडणुका पुढं गेल्या आहेत. हा संविधानाला फार मोठा धोका आहे. मुख्यमंत्री पदाच्या बाबत माविआमध्ये चर्चा होते, ते ही उघड उघड चर्चा होते. तशी महायुतीमध्ये चर्चा तर होतच नाही. कोणी म्हणतं का फडणवीस मुख्यमंत्री होतील किंवा अजित पवारांनी एकनाथ शिंदे यांनी सांगितलं की आम्ही देवेंद्र फडणवीस यांच्या मार्गदर्शनाखाली निवडणूक लढणार आहे," असं रोहित पवार म्हणाले.

आयोगानं दोन मागण्या मान्य केल्या : "विद्यार्थी स्वतः च्या हक्कासाठी आंदोलन करत होते. आयोगानं दोन मागण्या मान्य केल्या आहेत. मी काल पोलिसांना सांगितलं की, दबावतंत्र वापरून विद्यार्थ्यांचे हक्क हिरावून घेऊ नका. आज शरद पवार यांनी लक्ष घालून आयोगाच्या अध्यक्षांशी बोलले. दोन प्रमुख मागण्या होत्या, त्यासाठी शरद पवार पुढं आले आणि त्यांनी ट्विट पण केलेलं होतं. कृषी जागेबाबत स्पष्टीकरण आलं नाही, त्याही लवकर अॅड कराव्या, आशी मागणी होती. हा महिना संपण्याअगोदर मुलांचे प्रश्न मार्गी लावल्या जातील. याबाबत मुख्यमंत्री लवकरच वेळ देतील," असं यावेळी रोहित पवार म्हणाले.

साखर कारखान्याबाबत न्यायालयानं स्थिगिती दिली : साखर कारखान्यांच्या पैश्यांच्या बाबत न्यायालयानं स्थगिती दिली आहे. याबाबत रोहित पवार यांना विचारलं असता, ते म्हणाले की "सरकारनं संविधान बाजुला ठेवून आपल्या जवळच्या लोकांना पैसे दिले. निष्ठावंताना कोर्टानं न्याय दिला आहे. हे राजकारण कोण करत असेल, त्याला न्यायलयानं फटकारलं आहे. अनेक चांगले कारखाने बंद पाडण्याचा प्रयत्न होता, त्यात आमदार अशोक पवार यांचा कारखाना देखील होता. सरकार हे भेदभाव करत होत ते आता कोर्टाच्या मदतीनं पुढं आलं आहे. शरद पवार यांना सुरक्षा पुरवण्यात आली आहे. त्याबाबत रोहित पवार यांना विचारलं असता ते म्हणाले, की कोण कुठं जातात, त्याची माहिती केंद्र आणि राज्य सरकार यांना माहिती पुरवू शकतात. शरद पवार यांनी काल त्यावर भाष्य केलं आहे, ते योग्य निर्णय घेतील, असं यावेळी रोहित पवार म्हणाले.

पार्थ आणि जय हे मोठे नेते आहेत : पार्थ पवार आणि जय पवार यांच्या बाबत रोहित पवार यांना विचारलं असता, ते म्हणाले की "पार्थ आणि जय मोठे नेते आहेत, त्यांनी कुठं फिरायचं ते त्यांनी ठरवावं. मी अजित पवारांचं काम जवळून बघितलं आहे. भाजपा त्यांची ताकद कमी करेल, असं मी सुरुवातीला सांगितलं होतं. आता तसं होताना दिसत आहे, त्याचं वाईट वाटते. कर्जत जामखेडकरांनी मला लढायला शिकवलं आहे. मी भल्याभल्या विरुद्ध लढायला तयार आहे," असं यावेळी पवार म्हणाले.

हेही वाचा :