अकोला ZP Teacher Molested School Girls : कोलकातानंतर मुंबईतील बदलापूर इथल्या दोन शाळकरी मुलींवर झालेल्या अत्याचाऱ्याच्या घटनेनं देशभर संताप पसरला आहे. या अत्याचाराची चर्चा थांबत नाही, तोच अकोल्यातील उरळ पोलीस ठाण्याच्या हद्दीत असाच घाणेरडा प्रकार उघडकीस आला आहे. अकोला जिल्ह्यातील एका गावात जिल्हा परिषदेच्या शिक्षकानं सहा मुलींचा लैंगिक छळ केल्याची संतापजनक घटना आता उघडकीस आली आहे. प्रमोद सरदार असं त्या नराधम शिक्षकाचं नाव आहे.
शिक्षक दाखवत होता मुलींना अश्लील व्हिडिओ : मंगळवारी संध्याकाळी याप्रकरणी आरोपी शिक्षक प्रमोद सरदार विरुद्ध कलम 354 नुसार गुन्हा दाखल करण्यात आला आहे. हा शिक्षक वर्ग 8 वीच्या मुलींना अश्लील व्हिडिओ दाखवत होता. हा शिक्षक गेल्या चार महिन्यांपासून शाळेतील शिकणाऱ्या मुलींचा छळ करत होता. विद्यार्थिनींना अश्लील चित्रफित दाखवून वाईट स्पर्श करत होता. त्याचप्रमाणं त्यांच्याशी अश्लील गप्पा ही मारायचा. अखेर आज पीडित विद्यार्थिनींनी याबाबत पालकांना सांगितल्यानंतर प्रमोदचे विकृत कृत्य उघडकीस आले. पालकांनी उरळ पोलिसांकडं धाव घेत शिक्षकाविरोधात तक्रार दाखल केली. तर सहा मुलींचे जबाब सुद्धा नोंदवण्यात आलं आहे. या प्रकरणी उरळ पोलिसांनी शिक्षकाच्या विरोधात गुन्हा दाखल करून त्याला अटक केली आहे.
शिक्षकाच्या कृत्यानं पालकांमध्ये संताप : जिल्हा परिषद शिक्षकाच्या या कृत्यानं पालकांमधून प्रचंड संताप व्यक्त करण्यात येत आहे. पोलिसांनी लगेच या प्रकरणामध्ये शिक्षक प्रमोद सदार याला अटक केल्यानंतर पालकांनी शांततेची भूमिका घेतली. त्यामुळे अनर्थ टळला. नाहीतर पालकांच्या संयमाचा बांध फुटण्याची शक्यता वर्तवण्यात येत होती.
महिला शिक्षिकेला कळला प्रकार : शाळेतील एका महिला शिक्षिकेला हा प्रकार माहीत होताच त्यांनी बाल कल्याण समितीच्या हेल्पलाइनला माहिती दिली. त्यानंतर चाइल्ड हेल्पलाइननं शाळेत हौसला कार्यक्रम घेऊन गुड टच बॅड टच विषयावर विद्यार्थ्यांना माहिती दिली. त्यामध्ये मुलींनी याबाबत शिक्षकेला सांगितलं. त्यासोबतच बालकल्याण समितीच्या सदस्य प्रांजली मनोज जयस्वाल यांना सांगताच शिक्षक प्रमोद सरदारचा विकृत प्रकार समोर आला.
वर्गात करायचा मुलींशी चर्चा : दरम्यान आठव्या वर्गातील सर्व मुलांना बाहेर काढून हा नराधम शिक्षक मुलींनाच वर्गात बसवायचा. त्या मुलींसोबत लैंगिक विषयावर शिक्षक चर्चा करायचा. याबाबत महिला शिक्षकांसोबत या प्रकाराच्या कारणांविषयी तो बोलत नव्हता.
हेही वाचा :
- उत्तराखंड हादरले! धावत्या बसमध्ये अल्पवयीन मुलीवर 2 कंडक्टरसह 2 चालकांकडून सामूहिक बलात्कार - Dehradun Gang Rape Case
- शाळेच्या शौचालयात दोन चिमुरड्यांवर लैंगिक अत्याचार, 23 वर्षीय नराधमाला ठोकल्या बेड्या - Thane Rape News
- न्यायालयातील चेंबरमध्येच वकिलाचा तरुणीवर बलात्कार ; नोकरीच्या आमिषानं पीडितेला बोलावलं अन् लुटलं सर्वस्व, हाती टेकवले 1500 रुपये - Girl Alleges Rape In Court Chamber
