मुंबई- सायन-कोळीवाडा विधानसभा मतदारसंघ मुंबईतील महत्त्वाचा मतदारसंघ असून, सध्या या जागेवर भाजपाची मजबूत पकड आहे. तसेच दक्षिण मध्य मुंबई लोकसभा मतदारसंघाचा तो भाग आहे अन् बऱ्याच काळापासून तो लोकांच्या राजकारणाचा केंद्रबिंदू राहिलाय. 2009 पासून आतापर्यंत या मतदारसंघात भारतीय राष्ट्रीय काँग्रेस (INC) आणि भारतीय जनता पक्ष (BJP) यांच्यात चुरशीची लढत झालीय. भाजपाच्या तमील सेल्वन यांची या मतदारसंघावर मजबूत पकड आहे, पण काँग्रेसही येथे पुनरागमन करण्याचा सर्वतोपरी प्रयत्न करीत आहे. मतदारसंघाच्या भौगोलिक स्थानाबद्दल बोलायचे झाल्यास ते मुंबई शहर जिल्ह्यात स्थित आहे.
रवी राजा यांचाही सायन-कोळीवाड्यात दबदबा: खरं तर संपूर्ण महाराष्ट्रात एकाच टप्प्यात निवडणुका होत आहेत. राज्यात 20 नोव्हेंबरला मतदान होणार असून, 23 नोव्हेंबरला मतमोजणीनंतर चित्र स्पष्ट होणार आहे. या निवडणुकीत सायन-कोळीवाडा मतदारसंघातून भाजपाचे कॅप्टन आर. तमील सेल्वन हे तगडे उमेदवार आहेत आणि काँग्रेसला त्यांना आव्हान देणे कठीण जाऊ शकतं. तसेच 40 वर्षांहून अधिक काळ काँग्रेसमध्ये असलेले मुंबई महापालिकेतील काँग्रेसचे विरोधी पक्षनेते रवी राजा यांनी काँग्रेसचा हात सोडत कमळ हाती घेतलंय. रवी राजा यांचाही सायन-कोळीवाड्यात दबदबा आहे, त्याचा फायदा आता तमील सेल्वन यांना होणार आहे. सायन-कोळीवाडा विधानसभेत अनुसूचित जातीच्या मतदारांची संख्या अंदाजे 14,858 च्या जवळपास आहे. तसेच अनुसूचित जमातीच्या मतदारांची संख्या अंदाजे 2,481 च्या घरात आहे. विधानसभेतील मुस्लिम मतदारांवर नजर टाकल्यास त्यांची संख्या अंदाजे 53,958 आहे, जी मतदार यादीच्या विश्लेषणानुसार केवळ 21.1 टक्के एवढी आहे. तसेच इथल्या शहरी मतदारांची संख्या अंदाजे 2,55,726 च्या आसपास आहे. 2019 च्या लोकसभा निवडणुकांच्या आकडेवारीनुसार, सायन-कोळीवाडा विधानसभेत एकूण 2,55,726 मतदार आहेत. या विधानसभेतील मतदान केंद्रांची संख्या 264 आहे. वर्ष 2019 विधानसभा निवडणुकीत सायन-कोळीवाडा विधानसभेची एकूण मतदानाची टक्केवारी 50.78 टक्क्यांच्या घरात होती.
राजकीय इतिहास काय?- 2009 च्या महाराष्ट्र विधानसभा निवडणुकीत काँग्रेसचे जगन्नाथ शेट्टी यांनी ही जागा जिंकली होती. त्यावेळी मतदारसंघात काँग्रेस पक्षाचा प्रभाव मोठा होता. पण 2014 च्या निवडणुकीत भाजपाने येथे आपली पकड मजबूत केली, तेव्हा कॅप्टन आर. तमील सेल्वन यांनी काँग्रेसचा पराभव करून विजय मिळवलाय. तमील सेल्वन यांच्या विजयाने सायन-कोळीवाड्यात भाजपाचे अस्तित्व आणखी मजबूत झालंय. 2019 च्या निवडणुकीत कॅप्टन आर. तमील सेल्वन यांनी काँग्रेसचे उमेदवार गणेश कुमार यादव यांचा 54,845 मतांनी पराभव करत विजय मिळवला होता. काँग्रेसचे गणेशकुमार यादव हे 40,894 मतांसह दुसऱ्या स्थानावर होते. यावरून भाजपा या मतदारसंघावर सातत्याने आपली पकड मजबूत करीत असल्याचे स्पष्ट होत असून, इथे काँग्रेसचं आव्हानही वाढतंय.
2009 पासून आतापर्यंत पक्षांची स्थिती: 2009 मध्ये काँग्रेसचे जगन्नाथ शेट्टी या मतदारसंघातून विजयी झाले होते, मात्र 2014 मध्ये भाजपाचे कॅप्टन आर. तमील सेल्वन यांनी ही जागा काँग्रेसकडून हिसकावून घेतली. 2014 आणि 2019 मध्ये भाजपाने या मतदारसंघावर आपली पकड कायम ठेवली, ज्यामुळे या भागात पक्षाला तळागाळातून मजबूत पाठिंबा असल्याचे स्पष्ट झाले. भाजपा आणि काँग्रेस या दोन्ही पक्षांनी सायन-कोळीवाड्याच्या विकासावर आणि स्थानिक समस्यांवर भर दिलाय, पण भाजपाच्या नेतृत्वाला मतदारांमध्ये जास्त पाठिंबा मिळालाय.
रहिवाशांना भेडसावणाऱ्या समस्यांवर उठवला आवाज: कॅप्टन आर. तमील सेल्वन यांचा परिचय: भाजपा नेते कॅप्टन आर. तमील सेल्वन यांचा जन्म 8 डिसेंबर 1958 रोजी तामिळनाडूतील पुडुकोट्टई जिल्ह्यातील पिलाविदुथी येथे झालाय. त्यांनी 11 वीपर्यंतचे शिक्षण पूर्ण केलंय. कॅप्टन तमील सेल्वन एक साधे वैयक्तिक जीवन जगतात. त्यांनी लष्करी सेवेला वाहून घेतलं होतं अन् लोककल्याणाच्या समर्पणाचा त्यांचा भाव लोकांच्या पसंतीस उतरत आहे. ते आपल्या मतदारांमध्ये कार्यरत असतात. ते 2014 आणि 2019 मध्ये सायन-कोळीवाडा मतदारसंघातून महाराष्ट्र विधानसभेवर निवडून आलेत. आमदार होण्यापूर्वी ते मुंबई महापालिकेत नगरसेवक म्हणून कार्यरत होते. पावसाळी अधिवेशनादरम्यान आमदार कॅप्टन आर. तमील सेल्वन यांनी प्रतीक्षा नगर येथील म्हाडा संक्रमण शिबिरात राहणाऱ्या रहिवाशांना भेडसावणाऱ्या विविध समस्यांबाबत विधानसभेत महत्त्वाचा प्रश्न उपस्थित केला होता. या समस्यांमुळे संक्रमण शिबिरातील रहिवाशांसाठी चांगल्या गृहनिर्माण सुविधा आणि सुधारित राहणीमानाची गरज त्यांनी त्यावेळी अधोरेखित केली होती.
| 2019 च्या विधानसभा निवडणुकीचा निकाल | ||
| उमेदवार | पक्ष | मिळालेली मतं |
| तमील सेल्वन | भाजपा | 54,845 |
| गणेश यादव | काँग्रेस | 40,894 |
| अनंत कांबळे | मनसे | 13,684 |
| 2014 च्या विधानसभा निवडणुकीचा निकाल | ||
| उमेदवार | पक्ष | मिळालेली मतं |
| तमील सेल्वन | भाजपा | 40,869 |
| मंगेश सातमकर | मनसे | 37,131 |
| जगन्नाथ शेट्टी | काँग्रेस | 23,107 |
| 2009 च्या विधानसभा निवडणुकीचा निकाल | ||
| उमेदवार | पक्ष | मिळालेली मतं |
| जगन्नाथचन शेट्टी | काँग्रेस | 45,638 |
| डॉ. मनीषा कायंदे | भाजपा | 27,615 |
| विनोद खोपकर | मनसे | 20,827 |
हेही वाचा-
