मुंबई Holi 2024 : होळीला अवघे दोन दिवस उरले आहेत. मात्र होळीच्या वेळी गोंधळ घालणाऱ्यांवर महापालिका प्रशासनाची करडी नजर असणार आहे. होलिका दहनाच्या तयारीत गुंतलेल्या लोकांना महापालिकेच्यावतीनं विशेष सूचना देण्यात आल्या आहेत. होलिका दहनसाठी कोणी बेकायदेशीर वृक्षतोड केल्यास 5 हजारांचा दंड किंवा 1आठवडा तुरुंगवासाची शिक्षा होऊ शकते. यासंदर्भात महापालिका प्रशासनानं आदेश जारी केलाय. त्यामुळं मुंबईकरांनो, होळी साजरी करताना महापालिकेच्या नियमांचं पालन करा असं आवाहन महापालिकेनं केलंय.
वृक्षतोड न करण्याचं आवाहन : याबाबत महापालिकेच्या प्रसिद्धीपत्रकात म्हटलंय की, येत्या रविवारी म्हणजेच दिनांक 24 मार्च 2024 रोजी साजरा होणाऱ्या होळी सणाच्या पार्श्वभूमीवर नागरिकांनी कोणत्याही प्रकाराची वृक्षतोड करु नये. आमच्या कर्मचाऱ्यांना एखाद्या ठिकाणी अनधिकृतपणे झाडे तोडल्याचं आढळून आल्यास त्याबाबत महापालिकेकडून पोलीस तक्रार केली जाईल. तसंच ‘होळी’च्या कालावधीत वृक्षतोड होत असल्याचं आढळल्यास सतर्क नागरिकांनी बृहन्मुंबई महानगरपालिका अधिकाऱ्यांना व स्थानिक पोलीस ठाण्यास कळवावं. अथवा महानगरपालिकेच्या '1916' या 'टोल फ्री' क्रमांकावर संपर्क करावा, अशी माहिती महापालिकेच्या उद्यान विभागाचे अधीक्षक आणि वृक्ष प्राधिकरणाचे सदस्य सचिव जितेंद्र परदेशी यांनी दिलीय.
