BMC Property Tax Collection : मुंबई महापालिकेचे मिशन मालमत्ता करवसुली फेल, 3 हजार 196 कोटी रुपयांचे कर संकलन - BMC Property Tax Collection mission

BMC Property Tax Collection : 2023-24 या आर्थिक वर्षात बृहन्मुंबई महानगरपालिकेला मालमत्ता कराची वसुली करण्यात अपयश आल्याचं आता स्पष्ट झालं आहे. महानगरपालिकेच्या उत्पन्नाचा महत्त्वाचा स्रोत असलेल्या मालमत्ता कराचे रविवारी रात्री बारा वाजेपर्यंत 3 हजार 195 कोटी 91 लाख 11 हजार रुपये इतके संकलन करण्यात आल्याचं पालिकेकडून सांगण्यात आलं.

मुंबई BMC Property Tax Collection : संपूर्ण कर वसुलीचे लक्ष्य पूर्ण न झाल्यानं मुंबई पालिकेच्या तिजोरीवर यावर्षी मोठा ताण असणार आहे. पूर्ण कर वसुलीचे लक्ष्य गाठण्यासाठी पालिका प्रशासनामार्फत टॉप टेन मालमत्ता कर थकबाकीदारांची नावे जाहीर करण्यात आली होती. मात्र, त्याचा देखील फायदा झालेला दिसून येत नाही.

काय म्हणाले सहआयुक्त : या संदर्भात करनिर्धारण व संकलन विभागाचे सहआयुक्त सुनील धामणे यांना विचारलं असता त्यांनी सांगितलं की, "महानगरपालिका क्षेत्रातील नागरिकांना पालिकेद्वारे विविध नागरी सेवा-सुविधा देण्यात येतात. या अनुषंगाने मालमत्ता कर हा महानगरपालिकेच्या उत्पन्नाचा महत्त्वाचा स्रोत आहे. हा मालमत्ता कर नागरिकांनी वेळेत महानगरपालिकेकडे भरणा करावा यासाठी करनिर्धारण व संकलन खात्याने वर्षभर प्रयत्न केले. परिणामी, रविवारी 31 मार्च, 2024 पर्यंत मालमत्ता कराची वसुली ही 3 हजार 195 कोटी 91 लाख 11 हजार रुपये इतकी झाली आहे."

मोठ्या थकबाकीदारांवर लक्ष केंद्रित : सहआयुक्त सुनील धामणे म्हणाले की, करनिर्धारण व संकलन विभागातर्फे आर्थिक वर्ष 2023-24 ची सुधारित मालमत्ता कर देयके फेब्रुवारी 2024 अखेरीस निर्गमित झाल्यानंतर निर्धारित कालावधीत कर भरण्याबाबत नागरिकांना सातत्याने आवाहन करण्यात आले. निर्धारित कालावधीत नागरिकांना मालमत्ता कराचा भरणा करता यावा, यासाठी साप्‍ताहिक तसेच सार्वजनिक सुट्टींच्‍या दिवशी नागरी सुविधा केंद्र सुरू ठेवण्‍यात आली. मोठ्या थकबाकीदारांवर लक्ष केंद्रित करण्‍यात आले. सोबतच मागील थकबाकी वसुलीसाठी परिश्रम घेण्‍यात आले. त्याचा परिणाम देखील दिसून आला. 19 मार्च या एकाच दिवसात तब्बल 100 कोटी रुपयांचे संकलन झाले. २८ मार्च रोजी 304 कोटी रुपये, 29 मार्च रोजी 171 कोटी रुपये, 30 मार्च रोजी पुन्हा 171 कोटी रुपये आणि शेवटच्या दिवशी म्हणजे 31 मार्च रोजी 190 कोटी 34 लाख रुपयांचे कर संकलन करण्‍यात आम्हाला यश आले.

विभागानुसार एवढ्या रुपयांचे संकलन : मुंबई पालिकेच्या आकडेवारीनुसार, 1 एप्रिल 2023 ते 31 मार्च 2024 या आर्थिक वर्षामध्ये सर्वाधिक मालमत्ता कर संकलन हे ‘एच पूर्व’ विभागामध्ये रुपये 336.45 कोटी इतके झाले आहे. त्या खालोखाल ‘के पूर्व’ विभागामध्ये 317.48 कोटी रुपये इतकी, ‘जी दक्षिण’ विभागामध्ये 257.11 कोटी रुपये मालमत्ता कर संकलन झाले आहे. महानगरपालिका क्षेत्रातील शहर, पूर्व उपनगरे आणि पश्चिम उपनगरे या तिन्ही भागातील मालमत्ता कर संकलनाचा विचार केल्यास सर्वाधिक कर संकलन हे पश्चिम उपनगरांमध्ये 1,590.09 कोटी रुपये, शहर भागात 917.05 कोटी रुपये आणि पूर्व उपनगरांमध्ये 678.42 कोटी रुपये इतके मालमत्ता कर संकलन झाले आहे.

'या' मालमत्ताधारकांना करातून सूट : मुंबई महापालिका हद्दीत एकूण मालमत्तांची संख्‍या 9 लाख 55 हजार 38 इतकी आहे. त्‍यापैकी 500 चौरस फूट व त्यापेक्षा कमी चटईक्षेत्र असणाऱ्या निवासी इमारती, निवासी सदनिकांना संपूर्ण मालमत्ता करातून सूट देण्यात आली आहे. या मालमत्तांची संख्‍या 3 लाख 56 हजार 652 इतकी आहे. तर, उर्वरित 5 लाख 98 हजार 386 मालमत्तांना कर आकारणी केली जाते. सन 2023-24 मध्‍ये 2 लाख 53 हजार 605 मालमत्ताधारकांनी मिळून एकूण वर्षात 3 हजार 195 कोटी 91 लाख 11 हजार रुपयांचा कर भरणा केला आहे.

हेही वाचा :