मुंबई : थोड्याच वेळात विधानसभेच्या विशेष अधिवेशन 2024 ला सुरुवात होत आहे. या अधिवेशनाला अजित पवार यांच्या राष्ट्रवादी काँग्रेस पक्षाच्या आमदारांनी गुलाबी फेटे घालून विधानभवन परिसरात प्रवेश केला. गुलाबी फेटे घातलेल्या आमदारांच्या चेहऱ्यावर स्मितहास्य दिसत होतं. तर दुसरीकडं भाजपा आणि शिवसेनेच्या आमदारांमध्येही मोठा उत्साह होता. देवेंद्र फडणवीस आणि एकनाथ शिंदे यांच्या नेतृत्वात आमदार विधानभवन परिसरात दाखल झाले. विरोधकांचा रुसवा मात्र कायम राहिला. आज विरोधी आमदार शपथ घेणार नसल्याची माहिती सूत्रांनी दिली.
नवनिर्वाचित आमदारांचा शपथविधी : विधानसभा निवडणूक 2024 च्या निकालात महायुतीला मोठं यश मिळालं आहे. त्यानंतर मुख्यमंत्री म्हणून देवेंद्र फडणवीस यांनी गुरुवारी शपथ घेतली. तर माजी मुख्यमंत्री एकनाथ शिंदे आणि अजित पवार यांनी उपमुख्यमंत्री म्हणून शपथ घेतली. आजपासून महाराष्ट्र विधानसभेचं तीन दिवसीय विशेष अधिवेशन बोलावण्यात आलं आहे. या अधिवेशनात नवनिर्वाचित आमदारांचा शपथविधी पार पडत आहे.
विरोधी पक्षांचे आमदार आज घेणार नाहीत शपथ : सत्ताधारी आमदारांचा शपथविधी विधानभवनात पार पडत आहे. मात्र दुसरीकडं विरोधी पक्षातील आमदार आज शपथ घेणार नसल्याचं त्यांनी स्पष्ट केलं. याबाबत बोलताना जितेंद्र आव्हाड आणि आदित्य ठाकरे यांनी सत्ताधाऱ्यांवर टीका केली. तर उपमुख्यमंत्री अजित पवार यांनी विरोधकांवर हल्लाबोल केला. यावेळी बोलताना अजित पवार म्हणाले की, विरोधकांना उद्या शपथ घ्यावीच लागेल. लोकसभेत 31 जागा मिळाल्या तेव्हा ईव्हीएम चांगलं होतं. मात्र विधानसभेत हारल्यानंतर ईव्हीएम खराब झालं? असा सवाल त्यांनी यावेळी केला.
हेही वाचा :
