पुणे EVM Strongroom : बारामती लोकसभा मतदार संघातील ईव्हीएम मशिन्स ज्या स्टाँग रुममध्ये ठेवण्यात आल्या होत्या, त्या रुमचा सीसीटीव्ही काही वेळासाठी बंद झाल्याचा प्रकार समोर आला होता. यानंतर आता शिरुर लोकसभा मतदारसंघात देखील सीसीटीव्ही डिस्प्ले हे 24 तास बंद झाल्याचं सांगण्यात येतंय. आता यावर जिल्हाधिकारी सुहास दिवसे यांनी प्रतिक्रिया दिलीय, यात कसलंही तथ्य नसल्याचं त्यांनी सांगितलं.
काय म्हणाले जिल्हाधिकारी : लोकसभा निवडणुकीसाठी पुणे जिल्ह्यातील चारही मतदार संघात स्ट्रॉंग रुम तयार करण्यात आले आहेत. प्रत्येक स्ट्रॉंग रुम बाहेर मोठ्या प्रमाणावर पोलीस बंदोबस्त तैनात करण्यात आला असून उमेदवारांकडून सीसीटीव्हीद्वारे या स्ट्रॉंग रुमवर नजर ठेवण्यात येत आहे. यावर जिल्हाधिकारी दिवसे म्हणाले की, स्ट्रॉंग रुम सील करण्यापूर्वीच सीसीटीव्ही लावले जातात. ईव्हीएम मशीन स्ट्रॉंग रुम जवळ तीन पोलीस बंदोबस्तासाठी असतात. सर्व गोष्टींचं चित्रीकरण केलं जातं आणि ते पाहण्यासाठी बाहेर एक टीव्ही ठेवला जातो. शिरुरबाबत ही सर्व पूर्तता केलेली होती. शिरुरबाबत उमेदवारांचे प्रतिनिधी यांना चित्रीकरण पाहायचं असेल, तर त्यासाठी त्यांच्या प्रतिनिधींची नेमणूक करण्यात आली होती. पण सुरुवातीच्या काही दिवस प्रतिनिधी देण्यात आले नव्हते. आता ते देण्यात आले आहेत. शिरुर स्ट्रॉंग रुम बाबत ज्या बातम्या येत आहेत, त्यात कुठलंही तथ्य नसल्याचं जिल्हाधिकारी सुहास दिवसे यांनी सांगितलंय.
बारामतीच्या स्ट्राँगरुमवर सुप्रिया सुळेंनी उपस्थित केले होते प्रश्न : बारामती लोकसभा मतदारसंघातही मतदानानंतर स्ट्राँगरुममधील ईव्हीएमच्या सुरक्षेबाबत प्रश्न उपस्थित करणारा व्हिडिओ खासदार तथा बारामती लोकसभेच्या उमेदवार सुप्रिया सुळे यांनी सोशल मीडियावर पोस्ट केला होता. स्ट्राँगरुममधील कॅमेरा 45 मिनिटं व्हिडिओ ब्लँक होता, असं त्यांनी व्हिडिओत म्हटलं होतं. तसंच "ईव्हीएम ठेवण्यात आलेल्या ठिकाणचे सीसीटीव्ही सारखी उपकरणं बंद असणं अत्यंत संशयास्पद आहे. प्रशासकीय यंत्रणेचा निष्काळजीपणा आहे," असं म्हणत त्यांनी हा प्रकार निवडणूक प्रतिनिधींनी संबंधित यंत्रणेला आणि प्रशासनाला कळविल्यानंतर त्यांच्याकडून समाधानकारक प्रतिसाद मिळाला नसल्याचही म्हटलं होतं.
हेही वाचा :
