ठाणे : राज्यातील सत्ता संघर्षात डोंबिवलीचे आमदार रवींद्र चव्हाण यांचा मोठा वाटा होता. त्यामुळं शिंदे सरकारमध्ये भाजपाच्या वतीनं पुन्हा एकदा आमदार रवींद्र चव्हाण यांची मंत्रिमंडळात वर्णी लागली होती. आता मात्र चौथ्यांदा आमदार म्हणून निवडून आलेल्या चव्हाण यांचं संघटन कौशल्य पाहून भाजपाच्या वरिष्ठ नेत्यांनी त्यांना राज्यातील पक्ष संघटनेची जबाबदरी देत त्यांच्या गळ्यात प्रदेश अध्यक्ष पदाची माळ घातली आहे. त्यांच्या जीवनातील राजकीय प्रवासाची थोडक्यात गाथा ई टीव्ही भारतच्या माध्यमातून समोर आणण्याचा प्रयत्न.
आमदार तथा माजी मंत्री चव्हाण यांचा जन्म तळ कोकणातल्या सिंधुदुर्ग जिल्ह्यातील पेंडूर गावात झाला. तर त्यांच बालपण मुंबईत भांडुप परिसरात गेलं. त्यानंतर चव्हाण हे आई वडिलांच्या सोबत डोंबिवलीत स्थाईक झाले. त्यांना तरुण वयात डोंबिवलीतील सुशिक्षित, सुसंस्कृत आणि शांतताप्रिय लोकांचा सहवास लाभला आणि मुख्यतः रा. स्व. संघ आणि भाजपाचे भारतीयत्वाचे संस्कार त्यांच्यावर झाले. त्यानंतर राजकीय प्रवास सुरू झाला. २००२ साली भारतीय जनता युवा मोर्चाचे कल्याण उपजिल्हाध्यक्ष पदावर त्यांची नेमणूक झाली. तर २००५ साली डोंबिवलीतील सावरकर रोड प्रभागातून कल्याण डोंबिवली महानगरपालिकेत नगरसेवक म्हणून प्रथम निवडून आले. २००७ साली कल्याण डोंबिवली महानगरपालिका स्थायी समिती सभापतीपदावर विराजमान झाले.
नगरसेवक पदावर कार्यरत असतानाच २००९ साली डोंबिवली विधानसभा मतदारसंघाचा पहिला आमदार होण्याचा मान रविंद्र चव्हाण यांना मिळाला. २०१४ व त्यानंतर २०१९ साली झालेल्या महाराष्ट्र विधानसभेच्या सार्वत्रिक निवडणुकीत कोकण पट्ट्यातील सर्वाधिक मताधिक्य मिळवून देऊन डोंबिवलीकरांनी सलग तिसऱ्यांदा त्यांना आमदार म्हणून निवडून दिलं. दरम्यान, २०१६ साली महाराष्ट्राच्या मंत्रिमंडळात राज्यमंत्री म्हणून शपथ घेऊन महाराष्ट्र सरकारच्या ४ खात्यांची त्यांनी जबाबदारी सांभाळली होती. त्यामध्ये बंदरे, माहिती व तंत्रज्ञान, वैद्यकीय शिक्षण तसंच अन्न व नागरी पुरवठा आणि ग्राहक संरक्षण या खात्याचा राज्यमंत्री म्हणून युतीच्या काळात कार्यरत होते. तर शिंदे सरकारच्या काळात अडीच वर्ष बांधकाम मंत्री म्हणून पदभार सांभाळला होता.
राज्यात भाजपा शिवसेना युती तुटली आणि राज्यात महाविकास आघाडीचं ठाकरे सरकार आलं. आमदार असतानाच, त्यांना २०२० साली भाजपा महाराष्ट्र प्रदेश महामंत्री म्हणून नेमणूक झाली. अशा कौटुंबिक राजकीय वारसा नसलेल्या सलग चारवेळा भाजपा आमदार म्हणून निवडणून आलेल्या चव्हाण यांना पुन्हा मंत्रिमंडळात स्थान मिळणार होतं. मात्र त्यांच्या गळ्यात प्रदेश अध्यक्ष पदाची जबाबदारी देण्याचे संकेत भाजपाच्या वरिष्ठ नेत्यांकडून दिल्यानं आमदार चव्हाण यांचं पक्ष संघटनेत राजकीय वजन वाढल्याचं दिसून येत आहे.
