मुंबई -Auron Mein Kahan Dum Tha Trailer : बॉलिवूडचा 'सिंघम' अजय देवगणनं 'शैतान' या हॉरर चित्रपटातून धमाका केल्यानंतर, आता त्याचा 'ओरों में कहाँ दम था' हा चित्रपट रुपेरी पडद्यावर रिलीज होण्यासाठी सज्ज झाला आहे. या चित्रपटामध्ये एक प्रेमकहाणी दाखवण्यात येणार आहे. दरम्यान 'ओरों में कहाँ दम था'चा ट्रेलर आज 13 जून रोजी रिलीज झाला आहे. या चित्रपटामध्ये अजय देवगणबरोबर त्याची बेस्ट फ्रेंड तब्बू दिसणार आहे. यापूर्वी 31 मे रोजी या चित्रपटाचा टीझर प्रदर्शित करण्यात आला होता. या टीझरमध्ये अजय आणि तब्बूबद्दलचे काही प्रेमळ क्षण दाखवण्यात आले होते.
'ओरों में कहाँ दम था' ट्रेलर रिलीज : 'ओरों में कहाँ दम था' चित्रपटाचं दिग्दर्शन नीरज पांडे यांनी केलं आहे. याआधी त्यांनी 'स्पेशल ऑप्स', 'एम.एस. धोनी अनटोल्ड स्टोरी', 'बेबी', 'स्पेशल 26', 'अय्यारी' आणि 'अ वेनस्डे' यासारख्या दमदार चित्रपटांचं दिग्दर्शन केलंय. आता ते 'ओरों में कहाँ दम था' या चित्रपटातून प्रेमकहाणी घेऊन येत आहे. 'ओरों में कहाँ दम था' हा चित्रपट बऱ्याचं दिवसांपासून चर्चेत आहे. या चित्रपटामध्ये अजय देवगण आणि तब्बूशिवाय जिमी शेरगिल, सई मांजरेकर आणि शंतनू माहेश्वरी या चित्रपटात महत्त्वाच्या भूमिकेत दिसणार आहेत. या चित्रपटाची निर्मिती नरेंद्र हेरवत, कुमार मंगत पाठक, संगीता अहिर, शीतल भाटिया यांनी केली आहे.
