कर्तव्यपथावर ब्रह्मोस क्षेपणास्त्रासह पिनाकातून दिसलं सैन्यदलाच्या सामर्थ्याचं प्रदर्शन

देशभरात ७६ वा प्रजासत्ताक दिनाचा उत्साह दिसून येत आहे. प्रजासत्ताक दिनाचं मुख्य आकर्षण म्हणजे दिल्लीतील कर्तव्यपथावर आज होणारी परेड आहे.

नवी दिल्ली - भारताचा ७६ वा प्रजासत्ताक दिन देशभरात साजरा ( 76th republic day) केला जात आहे. दिल्लीत कर्तव्यपथावरील परेडमधून देशाच्या विविधतेमधील एकता, समृद्ध सांस्कृतिक परंपरा आणि सैन्यदलाचं सामर्थ्य यांचं भव्य प्रदर्शन संपूर्ण जगाला पाहायला मिळणार आहे.

Live Updates

• प्रजासत्ताक दिनाच्या संचलनात ब्रह्मोस क्षेपणास्त्र आणि पिनाका मल्टी-लाँचर रॉकेट सिस्टीमचे प्रदर्शन करण्यात आले. कर्तव्यपथावर भारतीय हवाई दलाकडून प्रात्याक्षिके करण्यात आली आहेत.

76th #RepublicDay🇮🇳 Parade: Infantry Column on Kartavya Path showcasing India’s advanced military capabilities, beginning with the All-Terrain Vehicle (ATV) 'CHETAK' and Specialist Mobility Vehicle, 'KAPIDHWAJ' designed for maneuvering in tough terrains, especially in… pic.twitter.com/LRQZuAgbF5

— ANI (@ANI) January 26, 2025

• २०२५ च्या प्रजासत्ताक दिनाच्या परेडची सुरुवात ३०० कलाकारांच्या समूहाच्या विविध वाद्यांच्या वादनानं झाली. सांस्कृतिक मंत्रालयाने वाद्यांचा हा गट एकत्र आणला आहे.

• ७६ व्या प्रजासत्ताक दिनानिमित्त राष्ट्रपती द्रौपदी मुर्मू यांनी ड्युटी स्टेशनवर राष्ट्रध्वज फडकावला. यानंतर राष्ट्रगीत आणि २१ तोफांची सलामी देण्यात आली.

• पंतप्रधान नरेंद्र मोदींचा ताफा दिल्लीच्या कर्तव्य मार्गावर पोहोचला. येथे पोहोचताच संरक्षण मंत्री राजनाथ सिंह यांनी त्यांचं स्वागत केले.
• केंद्रीय मंत्री नितीन गडकरी म्हणाले," भारत हा जगातील सर्वात मोठी लोकशाही असलेला देश आहे. भारत हा लोकशाहीची जननी असलेला देश आहे. 'आत्मनिर्भर भारत' बनवणं, ५ ट्रिलियन अर्थव्यवस्था बनविणं, 'विश्वगुरू' बनविणं हे पंतप्रधान मोदींचं ध्येय आहे. आपण सर्वांनी भारताला जगातील तिसरी सर्वात मोठी अर्थव्यवस्था बनवण्याची प्रतिज्ञा घेतली पाहिजे".

• पंतप्रधान नरेंद्र मोदी यांनी नागरिकांना प्रजासत्ताक दिनाच्या शुभेच्छा दिल्या आहेत. त्यांनी एक्स मीडियातील पोस्टमध्ये म्हटले, आज आपण प्रजासत्ताकाचे गौरवशाली वर्ष साजरी करत आहोत. आपल्या संविधानाचे आदर्श जपण्यासाठी आणि मजबूत तसेच समृद्ध भारतासाठी काम करण्याच्या आपल्या प्रयत्नांना बळकटी मिळो.

राष्ट्रपती द्रौपदी मुर्मू प्रजासत्ताक दिनाच्या सोहळ्याच्या नेतृत्व करणार आहेत. तर यंदा इंडोनेशियाचे अध्यक्ष प्रबोवो सुबियांतो हे प्रमुख पाहुणे म्हणून उपस्थित राहणार आहेत. राष्ट्रीय महत्त्वाच्या कार्यक्रमांमध्ये लोकांचा सहभाग वाढवण्याच्या सरकारच्या उद्दिष्टानुसार सुमारे १०,००० खास पाहुण्यांना परेड पाहण्यासाठी आमंत्रित करण्यात आलं आहे. यामध्ये विविध क्षेत्रातील सर्वोत्तम कामगिरी करणारे आणि केंद्र सरकारच्या योजनांचा सर्वोत्तम वापर करणाऱ्या लाभार्थ्यांचा समावेश आहे. यामध्ये महाराष्ट्रातील दोन शेतकऱ्यांचादेखील समावेश आहे.

राष्ट्रपतींनी सलामी घेतल्यानंतर परेडची सुरुवात होईल. या परेडचं नेतृत्व परेड कमांडर लेफ्टनंट जनरल भवनिश कुमार, जनरल ऑफिसर कमांडिंग, दिल्ली एरिया करणार आहेत. तर दिल्ली मुख्यालयाचे प्रमुख मेजर जनरल सुमित मेहता हे परेडचे सेकंड-इन-कमांड असतील. परंपरेनुसार राष्ट्रध्वज फडकविल्यानंतर १०५ मिमी लाइट फील्ड गन, एक स्वदेशी शस्त्र प्रणाली वापरून २१ तोफांची सलामी दिली जाणार आहे.

परेडमध्ये काय पाहायला मिळणार? ( karatavya path parade)

• प्रजासत्ताक दिनाची परेड सकाळी १०:३० वाजता सुरू होईल. ही परेड सुमारे ९० मिनिटे चालणार आहे. सुरुवातीला पंतप्रधान नरेंद्र मोदी हे राष्ट्रीय युद्ध स्मारकाला भेट देणार आहेत. तिथं पुष्पहार अर्पण करून हुतात्म्यांना श्रद्धांजली अर्पण करणार आहेत
• पहिल्यांदाच, 'सशक्त आणि सुरक्षित भारत' या संकल्पना घेऊन सैन्यदला, नौद आणि हवाई दल यांच्यातर्फे एकता आणि एकात्मतेची भावना दाखविणाऱ्या कार्यक्रमाचं आयोजन करण्यात येणार आहे.
• देशाच्या विविध भागातील वाद्यांसह ३०० कलाकार 'सारे जहाँ से अच्छा'चे सादरीकरण करणार आहेत. या वाद्यांमध्ये शहनाई, सुंदरी, नादस्वरम, बीन, मशक बीन, रणसिंघा - राजस्थान, बासरी, कराडी मजलू, मोहुरी, संखा, तुतारी, ढोल, गोंग, निशाण, चांग, ​​ताशा, संबल, चेंडा, इडक्का, लेझीम, थाविल, गुडुम बाजा, तालम आणि मोनबा यांचा समावेश आहे.
• १६ राज्ये, केंद्रशासित प्रदेश तसेच केंद्र सरकारच्या १० मंत्रालये आणि विभागांची झलक या वर्षी परेडमध्ये दिसणार आहे.
• इंडोनेशियाच्या मिलिटरी अकादमीचे मार्चिंग पथकदेखील परेडमध्ये भाग घेणार आहेत. यामध्ये १५२ सदस्य आणि १९० सदस्य सैन्याच्या बँडमध्ये असणार आहेत.

हेही वाचा-