തിരുവനന്തപുരം : കെഎസ്‌ആര്‍ടിസിയുടെ ജനപ്രിയ ബജറ്റ് ടൂറിസം ഇനി അതിര്‍ത്തി കടന്ന് തമിഴ്‌നാട്ടിലേക്കും കര്‍ണാടകയിലേക്കും. തമിഴ്‌നാട്ടിലെ മഹാബലിപുരം, വേളാങ്കണ്ണി, തഞ്ചാവൂര്‍, മധുര, ചെന്നൈ, കുംഭകോണം എന്നിവിടങ്ങളിലേക്കും കര്‍ണാടകയിലെ മൈസൂര്‍, മൂകാംബിക എന്നിവിടങ്ങളിലേക്കുമാണ് കെഎസ്‌ആര്‍ടിസി ബജറ്റ് ടൂറിസം ആരംഭിച്ചത്. ഡിപ്പോകള്‍ കേന്ദ്രീകരിച്ചല്ല പകരം ബുക്കിങ് എങ്ങനെയെന്ന് പരിശോധിച്ച ശേഷം ട്രിപ്പ് നിശ്ചയിക്കുന്ന തരത്തിലാകും പാക്കേജുകളെന്നും കെഎസ്‌ആര്‍ടിസി ബജറ്റ് ടൂറിസം സെല്‍ കോര്‍ഡിനേറ്റര്‍ ഉദയ കുമാര്‍ ഇടിവി ഭാരതിനോട് പറഞ്ഞു.
ബുക്കിങ് എങ്ങനെ?
യാത്രകാര്‍ക്ക് അതാത് ജില്ലകളിലെ ബജറ്റ് ടൂറിസം സെല്ലുകളിലോ വീടിനടുത്തുള്ള കെഎസ്‌ആര്‍ടിസി ഡിപ്പോകളിലോ പാക്കേജ് ബുക്ക് ചെയ്യാം. 35 പേരടങ്ങുന്ന സംഘത്തിനായി കെഎസ്‌ആര്‍ടിസിയുടെ സൂപ്പര്‍ ഡീലക്‌സ് ബസിലാകും യാത്രകള്‍ സംഘടിപ്പിക്കുക. ബുക്കിങ് അനുസരിച്ച് ഓരോ മാസത്തെയും പാക്കേജ് പത്ര മാധ്യമങ്ങള്‍ വഴിയും കെഎസ്‌ആര്‍ടിസിയുടെ ഔദ്യോഗിക സമൂഹ മാധ്യമ അക്കൗണ്ടുകള്‍ വഴിയും പ്രസിദ്ധീകരിക്കും.
ഫെബ്രുവരിയിലെ പാക്കേജിന്‍റെ വിവരങ്ങള്‍ ജനുവരി അവസാനത്തോടെ പ്രസിദ്ധീകരിക്കും. തിരുവനന്തപുരം മുതല്‍ കാസര്‍കോട് വരെ 93 യൂണിറ്റുകള്‍ വഴിയാകും ബജറ്റ് ടൂറുകള്‍ സംഘടിപ്പിക്കുക. ദൂരം കണക്കാക്കിയാണ് പാക്കേജിന്‍റെ തുക നിശ്ചയിക്കുക.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
ഓരോ ടൂറിലും പങ്കെടുക്കുന്ന യാത്രക്കാരുടെ പിക്കപ്പ് പോയിന്‍റ് ഉള്‍പ്പെടെ തുകയില്‍ വ്യത്യാസമുണ്ടാകും. ഓരോ യാത്രയ്ക്കും ഓരോ തുകയാകും പാക്കേജിന്. 2024 നവംബറില്‍ ആരംഭിച്ച തമിഴ്‌നാട്, കര്‍ണാടക ടൂര്‍ പാക്കേജുകളില്‍ ഇതു വരെ 24 യാത്രകള്‍ സംഘടിപ്പിച്ചെന്നും കോര്‍ഡിനേറ്റര്‍ ഉദയ കുമാര്‍ വ്യക്തമാക്കി. ഇതില്‍ 18 ഓളം ടൂറുകള്‍ കന്യാകുമാരിയിലേക്ക് മാത്രം നടത്തി.
യാത്രക്കാരില്‍ നിന്നും മികച്ച പ്രതികരണമാണ് പുതിയ ടൂര്‍ പാക്കേജുകള്‍ക്ക് ലഭിക്കുന്നത്. ഇതു പരിഗണിച്ച് ഊട്ടിയിലേക്കും കൊടൈക്കനാലിലേക്കും കൂടി വ്യാപിപ്പിക്കാനുള്ള നടപടികളും കെഎസ്‌ആര്‍ടിസി ആരംഭിച്ചിട്ടുണ്ട്. ഇതിനായി തമിഴ്‌നാട് സര്‍ക്കാരിന്‍റെ അനുമതിയും ആവശ്യമാണ്. കൂടുതല്‍ വിവരങ്ങള്‍ക്ക് https://my.artibot.ai/budget-tour എന്ന ലിങ്കിലെ ബജറ്റ് ടൂറിസം ചാറ്റ് ബോട്ടുമായി സംസാരിക്കാം.
Also Read: ഇത് വാടകയല്ല സ്വന്തമാണ്...; ആനവണ്ടിയില്‍ ഇനി 'പാട്ട് യാത്ര', ബോക്‌സും മൈക്കും ഒരുങ്ങുന്നു
