ചെന്നൈ: ഇലക്ട്രിക് വാഹനങ്ങളുടെ ചാർജർ നിർമാണ കമ്പനിയായ പ്ലഗ്‌സ്‌മാർട്ടും മദ്രാസ് ഐഐടിയും തദ്ദേശീയമായി വികസിപ്പിച്ചെടുത്ത ഇലക്ട്രിക് വാഹന ചാർജറിന് റിസർച്ച് അസോസിയേഷൻ ഓഫ് ഇന്ത്യ(എആർഎഐ)യുടെ സർട്ടിഫിക്കേഷൻ ലഭിച്ചു. മുൻനിര ഓട്ടോമോട്ടീവ് ടെസ്റ്റിംഗ് ബോഡിയായ എആർഎഐയുടെ സർട്ടിഫിക്കേഷൻ ലഭിച്ചതിനാൽ തന്നെ സുരക്ഷ മാനദണ്ഡങ്ങൾ കർശനമായി പാലിക്കുന്നതായിരിക്കും പുതിയ ഇലക്ട്രിക് വെഹിക്കിൾ(ഇ വി) ചാർജർ എന്നതിൽ സംശയമില്ല. ഇന്ത്യയിലെ തദ്ദേശീയ ഇവി ചാർജറുകളുടെ വരവ് ഓട്ടോമൊബൈൽ മേഖലയിലെ ഇന്ത്യയുടെ പുരോഗതിയെ കൂടിയാണ് കാണിക്കുന്നത്.
ഇന്ത്യയിലെ ഇലക്ട്രിക് വാഹന ചാർജറിന്‍റെ പ്രവർത്തന, സുരക്ഷ മാനദണ്ഡങ്ങൾ കൃത്യമായി പാലിക്കുന്നതാണ് തദ്ദേശീയമായി വികസിപ്പിച്ച പ്ലഗ്‌സ്‌മാർട്ടിന്‍റെ ഇ വി ചാർജർ. ഇലക്ട്രിക് വാഹനങ്ങളുടെ ഉപയോഗം ഇന്ത്യയിൽ വർധിക്കുന്നതിനാൽ തന്നെ കാര്യക്ഷമമായ ഇ വി ചാർജിങ് സംവിധാനത്തിന്‍റെ ആവശ്യകതയും വർധിച്ചുകൊണ്ടിരിക്കുകയാണ്. അതിനാൽ തന്നെ തദ്ദേശീയമായി വികസിപ്പിച്ച ചാർജർ ഇലക്ട്രിക് വാഹന മേഖലയിൽ നാഴികകല്ലായിരിക്കും.
60kW DC ഫാസ്റ്റ് ചാർജിങ് എന്നതാണ് ഈ ചാർജറിന്‍റെ സവിശേഷത. 60kW DC ഫാസ്റ്റ് ചാർജറിന്‍റെ വരവ് ഇവി ചാർജർ നിർമാണ വ്യവസായത്തിൽ കമ്പനിയുടെ സ്ഥാനം ഉയർത്തുന്നതു കൂടിയാണെന്ന് പ്ലഗ്‌സ്‌മാർട്ടിൻ്റെ സ്ഥാപകനും ചീഫ് എക്‌സിക്യൂട്ടീവ് ഓഫിസറുമായ വിവേക് സാമിനാഥൻ പറഞ്ഞു. കൂടാതെ ഈ സാമ്പത്തിക വർഷം ഇലക്ട്രിക് വാഹന മേഖലയിൽ നിരവധി ഉത്‌പ്പന്നങ്ങൾ അവതരിപ്പിക്കാൻ കമ്പനി പദ്ധതിയിടുന്നതായും, ഇതുവഴി വിപണിയിൽ തങ്ങളുടെ സാന്നിധ്യം കൂടുതൽ ശക്തിപ്പെടുത്തുമെന്നും അദ്ദേഹം കൂട്ടിച്ചേർത്തു.
ഇലക്ട്രിക് വാഹന മേഖലയുടെ നിലവിലെ ആവശ്യങ്ങൾ പരിഹരിക്കുന്നതിനൊപ്പം സുസ്ഥിര ഊർജത്തിൽ ഭാവിയിലെ നവീകരണങ്ങൾക്ക് വഴിയൊരുക്കുകയും ചെയ്യണമെന്നതാണ് പ്ലഗ്‌സ്‌മാർട്ടിന്‍റെ ലക്ഷ്യം.
