കേരളം കണ്ട ഏറ്റവും തീവ്ര പ്രകൃതി ദുരന്തത്തില്‍ വയനാടിനെ ചേര്‍ത്തുപിടിച്ച് ഇന്ത്യന്‍ സിനിമ താരങ്ങള്‍. മലയാളത്തിലെയും ഇതര ഭാഷകളിലെയും സിനിമ താരങ്ങള്‍ വയനാടിന് വേണ്ടി മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന ചെയ്‌തു.
നടന്‍ മമ്മൂട്ടി 20 ലക്ഷം രൂപ വയനാട്ടിലെ ദുരിത ബാധിതര്‍ക്കായി സംഭാവന ചെയ്‌തു. കടവന്ത്ര റീജണൽ സ്പോർട്‌സ് സെന്‍ററിലെ ദുരിതാശ്വാസ സഹായ ശേഖരണ കേന്ദ്രത്തിൽ നേരിട്ടെത്തിയാണ് മമ്മൂട്ടി സഹായം കൈമാറിയത്. മമ്മൂട്ടിയുടെ മകനും നടനുമായ ദുൽഖർ സൽമാൻ 15 ലക്ഷം രൂപയും ദുരിതാശ്വാസ നിധിയിലേക്ക് സംഭാവനയായി നൽകി. നടന്‍ ഫഹദ് ഫാസിലും ഭാര്യ നസ്രിയ നസീമും ചേര്‍ന്ന് 25 ലക്ഷം രൂപ ദുരിതാശ്വാസ നിധിയിലേക്ക് കൈമാറി.
നടന്‍ വിക്രം 20 ലക്ഷം രൂപ വയനാടിനായി സംഭാവന ചെയ്‌തിരുന്നു. പിന്നാലെ സൂര്യ ജ്യോതിക താരദമ്പതികളും സഹോദരനും നടനുമായ കാര്‍ത്തിയും ചേര്‍ന്ന് 50 ലക്ഷം രൂപയും രശ്‌മിക മന്ദാന 10 ലക്ഷം രൂപയും സംഭാവനയായി നൽകി.
