എറണാകുളം: തൃപ്പൂണിത്തുറ തെരഞ്ഞെടുപ്പ് കേസില്‍ എം സ്വരാജിന്‍റെ ഹര്‍ജി ഹൈക്കോടതി തള്ളി. കെ ബാബുവിന് എംഎല്‍എയായി തുടരാമെന്ന് വിധിയില്‍ ഹൈക്കോടതി വ്യക്തമാക്കി. 2021-ല്‍ കെ ബാബു തെരഞ്ഞെടുക്കപ്പെട്ടത് ചോദ്യം ചെയ്‌ത് എതിര്‍ സ്ഥാനാര്‍ത്ഥി എം സ്വരാജ് നല്‍കിയ ഹര്‍ജിയാണ് ഹൈക്കോടതി തള്ളിയത്.
ശബരിമല അയ്യപ്പന്‍റെ ചിത്രം വെച്ച് വോട്ടര്‍ സ്ലിപ്പ് വിതരണം ചെയ്‌തതിനുള്ള തെളിവുകള്‍ ഹാജരാക്കി തെരഞ്ഞെടുപ്പ് റദ്ദാക്കണമെന്നായിരുന്നു സ്വരാജ് ഹര്‍ജിയില്‍ ആവശ്യപ്പെട്ടത്. എന്നാല്‍ മത ചിഹ്നം ഉപയോഗിച്ച് വോട്ട് പിടിച്ചു എന്ന ആരോപണം സാധൂകരിക്കുന്ന സാക്ഷി മൊഴികളില്ലെന്ന് കോടതി നിരീക്ഷിച്ചു.
