കൊല്ലം : കൊല്ലം ബീച്ചില്‍ മുന്നറിയിപ്പുകള്‍ ലംഘിച്ച് കടലിലിറങ്ങിയ മൂന്ന് വിദ്യാർഥിനികൾ തിരയിൽപ്പെട്ടു. മൂവരെയും ലൈഫ്‌ഗാര്‍ഡുകൾ സാഹസികമായി രക്ഷപെടുത്തി. വ്യാഴാഴ്‌ച ഉച്ചയോടെയാണ് സംഭവം. പാരിപ്പള്ളി സ്വദേശികളായ മൂന്ന് വിദ്യാർഥിനികളാണ് തിരയില്‍പ്പെട്ടത്.
അതിശക്തമായ തിരയുള്ളതിനാൽ ആരും കടലിൽ ഇറങ്ങരുതെന്ന് ലൈഫ്‌ഗാർഡുകൾ നിർദേശം നൽകിയിരുന്നു. ഇത് വകവയ്‌ക്കാതെ രണ്ട് വിദ്യാർഥിനികൾ ബീച്ചിലെ സ്റ്റേജിന് സമീപത്തായി തിരയിലേക്കിറങ്ങി. ശക്തമായി തിരയടിച്ചതോടെ രണ്ടുപേരും തിരയിൽപ്പെട്ടു. ഒപ്പമുണ്ടായിരുന്ന വിദ്യാർഥിനി ഇരുവരെയും രക്ഷിക്കാനായാണ് കടലിലേക്ക് ഇറങ്ങിയത്. ഇതോടെ മൂന്ന് പേരും തിരയിൽപ്പെടുകയായിരുന്നു.
അപകടം ശ്രദ്ധയില്‍പ്പെട്ട ലൈഫ്‌ഗാർഡുമാരായ സതീഷ്, രതീഷ്‌കുമാർ, ഷാജി ഫ്രാൻസിസ്, ആന്‍റണി ജോൺസൺ, സമീപവാസിയായ ജെയിംസ് എന്നിവർ ചേർന്ന് പത്തുമിനിറ്റിലേറെ പണിപ്പെട്ടാണ് മൂവരെയും കരയ്‌ക്കെത്തിച്ചത്. അവശരായ രണ്ടു വിദ്യാർഥിനികളെ ഉടൻ തന്നെ ജില്ല ആശുപത്രിയിലെത്തിച്ച് ചികിത്സ നൽകി.
