ജയ്‌പുർ: പ്രധാനമന്ത്രി നരേന്ദ്ര മോദി രാജ്യത്തെ ജനാധിപത്യം തകർക്കുകയാണെന്ന് കോൺഗ്രസ് മുൻ അധ്യക്ഷ സോണിയാ ഗാന്ധി. ജയ്‌പുരിലെ വിദ്യാധർ നഗർ സ്‌റ്റേഡിയത്തിൽ സംസാരിക്കുകയായിരുന്നു സോണിയ. കോൺഗ്രസ് അധ്യക്ഷൻ മല്ലികാർജുൻ ഖാർഗെ, പ്രിയങ്ക ഗാന്ധി എന്നിവരും ചടങ്ങിൽ പങ്കെടുത്തു.
'മോദി രാജ്യത്തിനും മുകളിലാണെന്ന് സ്വയം ധരിക്കുകയാണ്. ജനാധിപത്യം തകർക്കാൻ ശ്രമിക്കുകയാണ്. അദ്ദേഹം സ്വയം മഹാനെന്ന് വിളിക്കുകയാണ്. അത്തരം നേതാക്കൾ ഭയത്തിന്‍റെ ഒരന്തരീക്ഷം സൃഷ്‌ടിക്കും' -സോണിയ ഗാന്ധി പറഞ്ഞു.
കഴിഞ്ഞ 10 വർഷമായി രാജ്യം ഒരു സർക്കാരിന്‍റെ കൈകളിലാണ്. തൊഴിലില്ലായ്മയും സാമ്പത്തിക പ്രതിസന്ധിയും പ്രോത്സാഹിപ്പിക്കുകയല്ലാതെ ഈ സര്‍ക്കാര്‍ ഒന്നും ചെയ്‌തിട്ടില്ലെന്നും സോണിയ ഗാന്ധി പറഞ്ഞു.
കഴിഞ്ഞ 70 വർഷമായി കോൺഗ്രസ് ചെയ്‌ത കാര്യങ്ങൾ മാത്രമാണ് ബിജെപിയും പ്രധാനമന്ത്രി നരേന്ദ്ര മോദിയും പറയുന്നതെന്ന് റാലിയില്‍ സംസാരിക്കവേ മല്ലികാർജുൻ ഖാർഗെ പറഞ്ഞു. 'ഞങ്ങൾ ഞങ്ങളുടെ ജോലി ചെയ്‌തു. അതിന്‍റെ കണക്ക് നൽകാനും തയ്യാറാണ്. ബിജെപിയും പ്രധാനമന്ത്രി നരേന്ദ്ര മോദിയും കഴിഞ്ഞ 10 വർഷമായി ഗാന്ധി കുടുംബത്തെ അധിക്ഷേപിക്കുക മാത്രമാണ് ചെയ്‌തത്.'-ഖാർഗെ പറഞ്ഞു.
മോദി ബിജെപിയേക്കാൾ വലുതായിരിക്കുകയാണ്. എവിടെ പോയാലും മോദിയുടെ ഗ്യാരണ്ടിയെ കുറിച്ച് മാത്രമാണ് അദ്ദേഹം സംസാരിക്കുന്നത്. എന്നാൽ ഗ്യാരണ്ടി എന്ന വാക്ക് കോൺഗ്രസിന്‍റേതാണെന്നും ബിജെപി അത് മോഷ്‌ടിച്ചതാണെന്നും ഖാർഗെ പറഞ്ഞു. രാജ്യത്ത് കഴിഞ്ഞ 70 വർഷങ്ങളിലായി കോൺഗ്രസ് നിർമിച്ച അടിസ്ഥാന സൗകര്യങ്ങളാണ് മോദി ഇപ്പോൾ ഫ്ലാഗ് ഓഫ് ചെയ്യുന്നതെന്നും ഖാർഗെ അവകാശപ്പെട്ടു.
കഴിഞ്ഞ 10 വർഷത്തിനിടെ രാജ്യത്ത് തൊഴിലില്ലായ്‌മ രൂക്ഷമായി വർധിച്ചതായി പ്രിയങ്ക ഗാന്ധി പറഞ്ഞു. 'രാജസ്ഥാനിലെ സാധാരണക്കാർക്ക് മെച്ചപ്പെട്ട ചികിത്സ ലഭ്യമാക്കുക എന്ന ലക്ഷ്യത്തോടെയാണ് ഞങ്ങളുടെ സർക്കാർ ചിരഞ്ജീവി യോജന ആരംഭിച്ചത്. പദ്ധതിയില്‍ 25 ലക്ഷം രൂപയുടെ ചികിത്സ ലഭ്യമാകുമായിരുന്നു. എന്നാൽ സർക്കാർ മാറിയതോടെ ബിജെപി പദ്ധതി നിർത്തിവച്ചു.' പ്രിയങ്ക പറഞ്ഞു.
കർഷകർക്ക് എംഎസ്‌പി നൽകുന്നതിനെ കുറിച്ച് പ്രധാനമന്ത്രി ഒരക്ഷരം പോലും മിണ്ടിയിട്ടില്ലെന്ന് രാജസ്ഥാൻ കോൺഗ്രസ് അധ്യക്ഷൻ ഗോവിന്ദ് സിങ് ദോട്ടസാരയും കുറ്റപ്പെടുത്തി.
Also Read : ലോക്‌സഭ തെരഞ്ഞെടുപ്പ് അട്ടിമറിക്കാന്‍ എഐ വഴി ചൈന ശ്രമിച്ചേക്കും; മുന്നറിയിപ്പ് നല്‍കി മൈക്രോസോഫ്‌റ്റ്
