എറണാകുളം : മഹാരാജാസ് കോളജിലെ പ്രശ്‌ന പരിഹാരത്തിനായി നടപടി സ്വീകരിച്ചതായി ഉന്നത വിദ്യാഭ്യാസ മന്ത്രി ആർ. ബിന്ദു (Minister R Bindu On Maharajas College Issue). കൊച്ചിയിൽ മാധ്യമങ്ങളോട് സംസാരിക്കുകയായിരുന്നു അവർ. പ്രശ്‌ന പരിഹാരത്തിനായി ഡയറക്‌ടറേറ്റ് ഓഫ് കോളേജിയേറ്റ് എജ്യുക്കേഷനെ ചുമതലപ്പെടുത്തിയിട്ടുണ്ട്. കേരളത്തിലെ അഭിമാന കലാലയമായ മഹാരാജാസിലെ പ്രശ്‌നം വളരെ ഗൗരവത്തോടെയാണ് സർക്കാർ കാണുന്നത്. താനുൾപ്പടെ പങ്കെടുത്ത് മഹാരാജാസിൽ യോഗം ചേരുമെന്നും മന്ത്രി അറിയിച്ചു. അതേസമയം വിദ്യാർത്ഥി സംഘർഷത്തെ തുടർന്ന് അനിശ്ചിത കാലത്തേക്ക് അടച്ചിട്ട കോളജ് തുറന്ന് പ്രവർത്തിപ്പിക്കുന്നത് ചർച്ച ചെയ്യാൻ കോളജിൽ സർവ്വകക്ഷി യോഗം ചേരുകയാണ്.
എസ് എഫ് ഐ യൂണിറ്റ് സെക്രട്ടറി നാസർ അബ്‌ദുറഹ്മാന് കഴിഞ്ഞ ബുധനാഴ്‌ച രാത്രി പതിനൊന്നര മണിയോടെയാണ് ക്യാമ്പസിൽ വച്ച് കുത്തേറ്റത്. ഇയാൾ കൊച്ചിയിലെ സ്വകാര്യ ആശുപത്രിയിൽ ചികിത്സ തേടിയിരുന്നു. പ്രതികൾ മൂർച്ചയുള്ള ആയുധം ഉപയോഗിച്ച് ശരീരത്തിൽ വരയുകയായിരുന്നു. നാടക പരിശീലനം കഴിഞ്ഞ് മടങ്ങവെ ഒരു കൂട്ടം വിദ്യാർത്ഥികൾ ചേർന്ന് ആക്രമണം നടത്തുകയായിരുന്നുവെന്നാണ് ആരോപണം.
ഫ്രറ്റേണിറ്റി കെ.എസ് യു പ്രവർത്തകരുടെ നേതൃത്വത്തിലായിരുന്നു ആക്രമണമെന്നാണ് എസ്എഫ്ഐ ആരോപിക്കുന്നത്. ബുധനാഴ്‌ച കോളജ് അറബിക് ഡിപ്പാർട്ട്മെന്‍റ് അധ്യാപകനായ നിസാമുദ്ദീന് മർദ്ദനമേറ്റതായി പരാതി ഉയർന്നിരുന്നു. ഹാജർ കുറഞ്ഞതുമായി ബന്ധപ്പെട്ട് ഉണ്ടായ വാക്കുതർക്കത്തിൽ വിദ്യാർത്ഥി ആക്രമണം നടത്തിയെന്നാണ് അധ്യാപകൻ പറയുന്നത്. ഇതേ തുടർന്ന് ഒരു വിദ്യാർത്ഥിയെ കോളജിൽ നിന്ന് സസ്പെന്‍റ് ചെയ്‌തിരുന്നു. ഈ സംഭവത്തിലും പൊലീസ് കേസെടുത്തിരുന്നു.
അധ്യാപകനെതിരായ ആക്രമണത്തിന് പിന്നിൽ ഫ്രറ്റേണിറ്റി പ്രവർത്തകരാണെന്ന് ആരോപിച്ച് ക്യാമ്പസിൽ എസ്എഫ്ഐ പ്രതിഷേധം നടത്തിയിരുന്നു. ഇതിന്‍റെ തുടർച്ചയാണ് കഴിഞ്ഞ ബുധനാഴ്‌ച രാത്രി വൈകി ക്യാമ്പസിലുണ്ടായ സംഘർഷം. എസ് എഫ് ഐ പ്രവർത്തകന് നേരെയുണ്ടായ ആക്രമണത്തിന് പിന്നാലെ ഫ്രറ്റേണിറ്റി പ്രവർത്തകനായ ബിലാൽ, കെ.എസ്.യു പ്രവർത്തകനായ അമൽ ടോമി എന്നിവർക്ക് നേരെയും ആക്രമണം നടന്നിരുന്നു.
പാലക്കാട് ഒറപ്പാലം സ്വദേശിയായ ബിലാലിനെ എറണാകുളത്ത് വാടകയ്ക്ക് താമസിക്കുന്ന വീട്ടിൽ അതിക്രമിച്ച് കയറി പുലർച്ചെ 1:30 യോടെയാണ് ക്രൂരമായി മർദ്ദിക്കുകയും കത്തി ഉപയോഗിച്ച് ശരീരമാസകലം വരയുകയും ചെയ്‌തത്. തുടർന്ന് എറണാകുളം ജനറൽ ആശുപത്രിയിൽ എത്തിച്ച ബിലാലിനെതിരെ ഭീഷണിയുമായി എസ്. എഫ് ഐ പ്രവർത്തകർ അവിടെയും എത്തിയതായാണ് ആരോപണം.
ഇതേ തുടർന്ന് ബിലാലിനെ സ്വകാര്യ ആശുപത്രിയിലേക്ക് മാറ്റുകയായിരുന്നു. ഇതിനിടെ ആംബുലൻസിൽ കയറ്റിയ വേളയിൽ എസ് എഫ് ഐ പ്രവർത്തകർ ആംബുലൻസിൽ കയറിയും ബിലാലിനെ ക്രൂരമായി മർദ്ദിച്ചിരുന്നു. പൊലീസെത്തിയാണ് ആക്രമണം നടത്തിയവരെ പിടിച്ച് മാറ്റിയത്. ബിലാലിനെതിരെ ആക്രമണം നടത്തിയവർ കയ്യേറ്റം ചെയ്‌തുവെന്ന എറണാകുളം ജനറൽ ആശുപത്രിയിലെ ഡോക്‌ടറുടെ പരാതിയിലും പൊലീസ് കേസെടുത്തിരുന്നു.
ഒരിടവേളയ്ക്ക് ശേഷമാണ് മഹാരാജാസ് കോളജ് വീണ്ടും സംഘർഷ ഭരിതമായത്. രണ്ട് ദിവസങ്ങളിലായി നാല് കേസുകളാണ് പൊലീസ് റജിസ്റ്റർ ചെയ്‌തത്. അതേസമയം സംഘർഷത്തെ തുടർന്ന് കോളജും, ഹോസ്റ്റലും അനിശ്ചിത കലത്തേക്ക് അടച്ചിരുന്നു.
