കോട്ടയം: കൂരോപ്പട പഞ്ചായത്തിൽ ബിഡിജെഎസ് അംഗം യുഡിഎഫിനെ പിന്തുണച്ചതോടെ എൽഡിഎഫിന് ഭരണം നഷ്‌ടമായി. ബിഡിജെഎസ് പിന്തുണയോടെ കോൺഗ്രസിലെ അമ്പിളി പഞ്ചായത്ത് പ്രസിഡൻ്റായി.
17 അംഗങ്ങളാണ് പഞ്ചായത്തില്‍ ഉള്ളത്. ഇതില്‍ 7 അംഗളാണ് സിപിഎമ്മിനുണ്ടായിരുന്നത്. യുഡിഎഫിന് 6 അംഗങ്ങളും എന്‍ഡിഎയ്ക്ക് 4 അംഗങ്ങളുമാണുള്ളത്. എൻഡിഎ അംഗം യുഡിഎഫിനെ പിന്തുണച്ചതോടെ കക്ഷി നില തുല്യമായി. എൻഡിഎ പിന്തുണച്ചിട്ടും നറുക്കെടുപ്പിലൂടെയാണ് കോൺഗ്രസ് വിജയിച്ചത്.
അതേസമയം യുഡിഎഫിന് വോട്ട് ചെയ്‌ത ബിഡിജെഎസ് മെമ്പറെ പാർട്ടിയിൽ നിന്ന് പുറത്താക്കി. കൂരോപ്പട പന്ത്രണ്ടാം വാർഡ് മെമ്പർ ആശ ബിനുവിനെയാണ് പാർട്ടിയിൽ നിന്ന് പുറത്താക്കിയത്. ബിഡിജെഎസ് ജില്ല പ്രസിഡൻ്റ് എന്‍ പി സെൻ ആണ് നടപടി എടുത്തത്.
