എറണാകുളം : പെരിയാറിന് പിന്നാലെ മരടിലെ കായലിലും മത്സ്യങ്ങൾ ചത്തു പൊങ്ങി. ഈ ഭാഗങ്ങളിലുള്ള മത്സ്യ കർഷകരുടെ കൂട് കൃഷി മത്സ്യങ്ങളും ചത്തിട്ടുണ്ട്. ഫിഷറീസ് ഉദ്യോഗസ്ഥരും കുഫോസിൽ നിന്നുള്ള സംഘവും സ്ഥലത്തെത്തി സാംപിൾ ശേഖരിച്ചു. മത്സ്യക്കുരുതിയുടെ കാരണം വ്യക്തമല്ല.
ഇന്നലെ മുതലാണ് കായലിൽ മത്സ്യങ്ങൾ ചത്തുപൊങ്ങുന്നത് നാട്ടുകാരുടെ ശ്രദ്ധയിൽപ്പെട്ടത്. ഏതെങ്കിലും തരത്തിലുള്ള രാസമാലിന്യങ്ങളാണോ മത്സ്യക്കുരുതിയിലേക്ക് നയിച്ചതെന്ന് പരിശോധന ഫലം ലഭിച്ചാൽ മാത്രമേ വ്യക്തമാവുകയുള്ളൂ. അതേ സമയം പെരിയാറിലെ രാസമാലിന്യ സാന്നിധ്യം സ്ഥിരീകരിച്ച് കുഫോസ് ഏഴംഗ സമിതിയുടെ പഠന റിപ്പോർട്ട് പുറത്ത് വന്നിട്ടുണ്ട്.
മത്സ്യക്കുരുതിയെ തുടർന്നാണ് കുഫോസ് വിദഗ്‌ധ സമിതി പഠനം നടത്തി വൈസ് ചാൻസലർക്ക് റിപ്പോർട്ട് സമർപ്പിച്ചത്. പെരിയാറിൽ മത്സ്യങ്ങൾ കൂട്ടത്തോടെ ചത്തുപൊങ്ങിയ ദിവസം വെള്ളത്തിൻ രാസമാലിന്യത്തിന്‍റെ സാന്നിധ്യം ഉണ്ട്. പെരിയാറിലെ വെള്ളത്തിൽ അമോണിയയും സൾഫൈഡും അപകടകരമായ അളവിലാണെന്ന് കുഫോസിന്‍റെ റിപ്പോർട്ടിൽ വ്യക്തമാക്കുന്നു.
വെള്ളത്തിൽ ഓക്‌സിജന്‍റെ അളവും കുറവായിരുന്നു. ഏത് വ്യവസായ സ്ഥാപനത്തിൽ നിന്നാണ് രാസമാലിന്യം പുറം തള്ളിയതെന്ന് കണ്ടത്താൻ വിശദമായ പരിശോധന ഫലം ലഭിക്കണം. ചത്ത മത്സ്യങ്ങളുടെയും പെരിയാറിലെ വെള്ളത്തിന്‍റെയും സാംപിളുകൾ എടുത്താണ് കുഫോസ് സംഘം പരിശോധന നടത്തിയത്.
ചത്ത മത്സ്യങ്ങളുടെ ആന്തരികാവയവങ്ങളില്‍ രാസവസ്‌തു സാന്നിധ്യം ഉണ്ടായിരുന്നു. ഓക്‌സിജന്‍റെ കുറവ് മാത്രമല്ല മത്സ്യങ്ങള്‍ ചാകാന്‍ കാരണമായതെന്ന് ഇതില്‍ നിന്നും വ്യക്തമാണ്. അമോണിയയും സള്‍ഫൈഡും എത്തിയത് എവിടെനിന്നാണെന്ന് അറിയാന്‍ കൂട്ടായ പരിശോധന ആവശ്യമാണ്. ഇത്തരം രാസപദാര്‍ഥങ്ങള്‍ കൂടിയ അളവില്‍ പുറന്തള്ളുന്നത് ഏത് വ്യവസായ ശാലയാണെന്ന് കണ്ടെത്തണം.
ഇക്കാര്യം മലിനീകരണ നിയന്ത്രണ ബോര്‍ഡ് പരിശോധിക്കണമെന്നും റിപ്പോര്‍ട്ടില്‍ വ്യക്തമാക്കുന്നു. അതേ സമയം പെരിയാറിലെ മത്സ്യക്കുരുതിയുമായി ബന്ധപ്പെട്ട് ആരോപണ വിധേയരായ മലിനീകര നിയന്ത്രണ ബോർഡിന്‍റെ റിപ്പോർട്ടിൽ രാസമാലിന്യത്തെ കുറിച്ച് പറയുന്നില്ല. ഓക്‌സിജന്‍റെ അളവ് കുറഞ്ഞതാണ് അപകടകാരണമെന്നാണ് പിസിബി റിപ്പോർട്ടിലുള്ളത്.
എന്നാൽ പിസിബി റിപ്പോർട്ടിനെ തള്ളുന്നതാണ് കുസോഫിന്‍റെ പ്രാഥമിക റിപ്പോർട്ട്. ഏലൂരിലെ കർഷകന്‍റെ പരാതിയിൽ മത്സ്യക്കുരുതിയിൽ പൊലീസ് കേസെടുത്തിരുന്നു. ഏലൂർ മുൻസിപ്പാലിറ്റിയും മത്സ്യക്കുരുതിയിൽ അന്വേഷണം ആവശ്യപ്പെട്ട് പൊലീസിൻ പരാതി നൽകിയിട്ടുണ്ട്.
തിങ്കളാഴ്‌ച രാത്രി മുതലാണ് പെരിയാറിലെ മത്സ്യങ്ങൾ കൂട്ടത്തോടെ ചത്തു പൊങ്ങിയത് നാട്ടുകാരുടെ ശ്രദ്ധയിൽ പെട്ടത്. കരിമീൻ, ചെമ്മീൻ, ചെമ്പല്ലി, ചെറുമീനുകൾ ഉൾപ്പടെയുള്ള മത്സ്യങ്ങളാണ് ചത്ത് കരയ്ക്ക് അടിഞ്ഞത്. മുൻവർഷങ്ങളിലും പെരിയാറിൽ മത്സ്യങ്ങൾ കൂട്ടത്തോടെ ചത്തുപൊങ്ങിയ നിരവധി സംഭവങ്ങൾ ഉണ്ടായിട്ടുണ്ട്.
പുഴയിൽ കൂട് മത്സ്യകൃഷി ചെയ്യുന്ന കർഷകരുടെ മത്സ്യങ്ങളും കൂട്ടത്തോടെ ചത്തുപൊങ്ങിയത് ലക്ഷങ്ങളുടെ നഷ്ട്ടമാണുണ്ടാക്കിയത്. പെരിയാറിൻ്റെ തീരത്ത് പ്രവർത്തിക്കുന്ന കമ്പനികൾ രാസമാലിന്യങ്ങൾ പുഴയിലേക്ക് ഒഴുക്കുന്നത് തടയണമെന്ന് നാട്ടുകാരും പരിസ്ഥിതി പ്രവർത്തകരും നിരന്തരമായി ആവശ്യപ്പെടാറുണ്ട്. എന്നാൽ മലിനീകരണ നിയന്ത്രണ ബോർഡോ സർക്കാരോ ക്രിയാത്മകമായി ഈ വിഷയത്തിൽ ഇടപെടാറില്ലന്ന വിമർശനവും ശക്തമാണ്.
Also Read : പെരിയാറിൽ മത്സ്യങ്ങൾ ചത്തുപൊങ്ങിയ സംഭവം; പരാതി നൽകി ഏലൂർ നഗരസഭ - FISH KILL ON PERIYAR
