കണ്ണൂർ: കാഫിർ സ്‌ക്രീന്‍ഷോട്ട് വിവാദത്തിൽ സിപിഎം ഉരുണ്ടുകളി തുടരുമ്പോൾ കെകെ ശെെലജയെ തള്ളി എൽഡിഎഫ് കൺവീനർ ഇപി ജയരാജൻ. ഏറ്റവും ഒടുവിൽ കെ.കെ ലതികയെ പിന്തുണച്ചുകൊണ്ടായിരുന്നു ഇ.പി ജയരാജന്‍റെ നിലപാട്. കെകെ ലതികയെ ശൈലജ തള്ളിയത് എന്തിനെന്ന് അവരോട് തന്നെ ചോദിക്കണമെന്നും അദ്ദേഹം പറഞ്ഞു. കണ്ണൂരിൽ മാധ്യമ പ്രവര്‍ത്തകരോട് സംസാരിക്കുകയായിരുന്നു ഇപി ജയരാജന്‍.
സോഷ്യൽ മീഡിയയിൽ വരുന്ന പല പോസ്റ്റുകളും പലരും ഷെയർ ചെയ്യുന്നത് നിജസ്ഥിതി അറിഞ്ഞിട്ടല്ല. വിവാദ പോസ്റ്റ് പ്രചരിപ്പിക്കരുതെന്ന ഉദേശത്തിലാണ് ലതിക പോസ്റ്റ് ഷെയർ ചെയ്‌തതെന്നും ഇപി ജയരാജൻ പറഞ്ഞു. എന്തോ ഒരു റിപ്പോർട്ട്‌ പൊലീസ് കോടതിയിൽ കൊടുത്തപ്പോൾ എല്ലാത്തിനും പിന്നിലും എൽഡിഎഫ് ആണെന്ന് വരുത്തി തീർക്കാനുള്ള ശ്രമമാണ് നടക്കുന്നത്. എല്ലാം കാര്യങ്ങളും പൊലീസ് കണ്ടെത്തിയെന്ന അഭിപ്രായം ഇല്ല.
പൊലീസ് കണ്ടെത്തിയ കാര്യങ്ങളാണ് കോടതിയിൽ മല്‍കിയത്. ആ റിപ്പോർട്ടിന്മേല്‍ കോടതിയിൽ പ്രൂഫ് ചെയ്യുകയാണ് വേണ്ടത്. കോടതിയിൽ പ്രൂഫ് ചെയ്യുമ്പോൾ ഇതിൽ യുഡിഎഫിന്‍റെ പങ്കാളിത്തവും യൂത്ത് കോൺഗ്രസ് നേതാവിന്‍റെ പങ്കാളിത്തവും പുറത്തുകൊണ്ടുവരും. ഇത് കോടതിയുടെ വിചാരണയിലാണ് പുറത്തുവരികയെന്നും അദ്ദേഹം വ്യക്തമാക്കി. യുഡിഎഫിന്‍റെ കൈ പരിശുദ്ധമല്ല. നാട്യം നടത്തിക്കൊണ്ടിരിക്കുന്ന ആളുകളുടെ കാര്യങ്ങൾ എല്ലാം പുറത്തുവരുമെന്നും ജയരാജൻ കൂട്ടിച്ചേർത്തു.
