പത്തനംതിട്ട: ശബരിമലയില്‍ കഴിഞ്ഞ വർഷത്തേക്കാൾ ഒന്നര ലക്ഷത്തിലധികം തീർഥാടകര്‍ ഇത്തവണ ദർശനം നടത്തി. മണ്ഡലകാലം ആരംഭിച്ച് ഇന്നലെ വരെ 3,74,071 തീർഥാടകരാണ് ദർശനം നടത്തിയത്. കഴിഞ്ഞ മണ്ഡലകാലത്തെ ആദ്യ അഞ്ച് ദിനങ്ങളെ അപേക്ഷിച്ച് ഇത്തവണ ഒന്നര ലക്ഷത്തിലധികം തീർഥാടകർ അധികമായി ദർശനത്തിനെത്തിയതായാണ് കണക്കുകൾ സൂചിപ്പിക്കുന്നത്.
അടുത്ത മാസം അഞ്ചുവരെ 70000 വെർച്വൽ ക്യൂ ബുക്കിംങ് പൂർത്തിയായി. ഇന്നലെ മാത്രം 60742 തീർഥാടകരാണ് വെർച്വൽ ക്യൂ വഴി ദർശനം നടത്തിയത്. തീർഥാടകരുടെ എണ്ണം മുൻ വർഷത്തേക്കാൾ കൂടിയെങ്കിലും നട തുറന്നിരിക്കുന്ന സമയം വർധിപ്പിച്ചതും പടി കയറ്റുന്നതിൽ പൊലീസിൻ്റെ ജാഗ്രതയും സുഗമമായ ദർശനത്തിന് വഴിയൊരുക്കുന്നുണ്ട്.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാം
അതേസമയം, വെർച്വൽ ക്യൂ ബുക്കിങ് ലഭിച്ചവർ ദർശനത്തിനെത്താതിരുന്നാൽ ബുക്കിങ് ക്യാൻസൽ ചെയ്യണമെന്ന് ദേവസ്വം ബോർഡ് അറിയിച്ചു. ളാഹ മുതൽ പ്ലാപ്പള്ളി വരെയുള്ള തീർഥാടനപാതയിൽ ആനത്താരകളിൽ കാട്ടാനകളുടെ സാന്നിധ്യം ഏറെയാണ്. ളാഹ മഞ്ഞത്തോടിനു സമീപം കാട്ടാനക്കൂട്ടം ഇറങ്ങിയതിനാൽ ഇന്നലെ രാത്രി ഏഴു മണി മുതൽ അരമണിക്കൂർ ഗതാഗതം മുടങ്ങിയിരുന്നു.
