കോഴിക്കോട്: മുസ്‌ലീം ലീഗിനെ വിമർശിച്ച് മുഖ്യമന്ത്രി പിണറായി വിജയൻ. ലീഗിൻ്റെ മുഖം ജമാഅത്തെ ഇസ്‌ലാമിയുടേയും എസ്‌ഡിപിഐയുടെയും മുഖമായി മാറുന്നു. നാല് വോട്ടിന് വേണ്ടി കൂട്ടുകൂടാൻ പറ്റാത്തവരുമായി കൂട്ടുകൂടുന്നവരായി നിങ്ങൾ മാറിയെന്നും അദ്ദേഹം പറഞ്ഞു. കേരള എൻജിഒ യൂണിയൻ 61 ആം സംസ്ഥാന സമ്മേളനത്തിൽ സംസാരിക്കുകയായിരുന്നു മുഖ്യമന്ത്രി പിണറായി വിജയന്‍.
എന്താണ് എസ്‌ഡിപിഐ എന്താണ് ജമാഅത്തെ ഇസ്‌ലാമിയെന്ന് കോൺഗ്രസിന്‌ അറിയാഞ്ഞിട്ടാണോയെന്നും മുഖ്യമന്ത്രി ചോദിച്ചു. 18 സീറ്റ് നേടുമ്പോൾ യുഡിഎഫിൻ്റെ നില കൂടി പരിശോധിക്കണം. ലീഗിൻ്റെ മുഖം നഷ്‌ടപ്പെട്ടിരിക്കുന്നു. ഇടതുപക്ഷം പരാജയപ്പെട്ടു എന്നത് വസ്‌തുതയാണ്. എന്നാൽ ജനങ്ങൾ എൽഡിഎഫിനെ നെഞ്ചേറ്റുന്നുണ്ടെന്ന് തന്നെയാണ് നമ്മുടെ വിശ്വാസം.
അവർ നമ്മളെ കൈവിടില്ലെന്നും പിണറായി പറഞ്ഞു. തൃശൂരിലെ ബിജെപിയുടെ വിജയം ഗൗരവമായി പരിശോധിക്കണം. വോട്ട് മാറ്റി കുത്തിയവർ ചെയ്‌തത് ശരിയായോ എന്ന് പരിശോധിക്കണമെന്നും മുഖ്യമന്ത്രി പിണറായി വിജയൻ കൂട്ടിച്ചേര്‍ത്തു.
