ഇടുക്കി : അടിമാലിയിലെ നാര്‍ക്കോട്ടിക് എന്‍ഫോഴ്സ്മെന്‍റ് സ്‌ക്വാഡ് ഓഫിസ് വര്‍ഷങ്ങളായി പ്രവര്‍ത്തിക്കുന്നത് വാടക കെട്ടിടത്തിലാണ്. ദേശിയപാതക്ക് സമീപമുള്ള കെട്ടിടത്തില്‍ കാര്യമായ അടിസ്ഥാന സൗകര്യങ്ങളൊന്നുമില്ല. ഓഫിസിനായി പുതിയ കെട്ടിടം നിര്‍മിക്കണമെന്ന ആവശ്യം കുറേ കാലമായി ഉയരുന്നുണ്ടെങ്കിലും ഇനിയും നിര്‍മാണ പ്രവര്‍ത്തനങ്ങള്‍ ആരംഭിച്ചിട്ടില്ല. ഇതുമായി ബന്ധപ്പെട്ട നടപടികള്‍ വേഗത്തിലാക്കണമെന്നാണ് ആവശ്യം
എക്സൈസ് സര്‍ക്കിള്‍ ഇന്‍സ്‌പെക്‌ടര്‍ ഉള്‍പ്പെടെ ഇരുപതിലധികം ജീവനക്കാര്‍ ഈ ഓഫിസില്‍ സേവനം അനുഷ്‌ഠിക്കുന്നുണ്ട്. കേസുകളുമായി ബന്ധപ്പെട്ട തൊണ്ടി മുതല്‍ സൂക്ഷിക്കുന്നതും ജീവനക്കാര്‍ വിശ്രമിക്കുന്നതുമെല്ലാം പരിമിതികളുള്ള ഈ പഴയ കെട്ടിടത്തിലാണ്. മുമ്പ് ഓഫിസ് കെട്ടിടം മഴയത്ത് ചോര്‍ന്നൊലിക്കുന്ന അവസ്ഥയിലായിരുന്നു. എന്നാല്‍ സമീപകാലത്ത് മേല്‍ക്കൂര ഷീറ്റ് മേഞ്ഞു.
സ്വന്തമായി കെട്ടിടം യാഥാര്‍ഥ്യമായാല്‍ ഓഫിസിന്‍റെ പ്രവര്‍ത്തനം കൂടുതല്‍ സുഗമമാക്കാമെന്നതിനൊപ്പം സര്‍ക്കാര്‍ ഖജനാവില്‍ നിന്ന് വാടകയിനത്തില്‍ നഷ്‌ടമാകുന്ന തുകയും ലാഭിക്കാം.
