പത്തനംതിട്ട: പത്തനംതിട്ടയിൽ ശബരിമല തീർത്ഥാടകർ സഞ്ചരിച്ച ബസും കാറും കൂട്ടിയിടിച്ചുണ്ടായ അപകടത്തിൽ 4 മരണം. പുനലൂർ മൂവാറ്റുപുഴ സംസ്ഥാന പാതയിലെ കൂടൽ മുറിഞ്ഞകല്ലിൽ പുലർച്ചെ 4.30നാണ് അപകടം നടന്നത്. കാറിലുണ്ടായിരുന്ന മല്ലശ്ശേരി സ്വദേശികളായ മത്തായി ഈപ്പൻ (65), നിഖിൽ (29), അനു (26), ബിജു പി ജോര്‍ജ് (51) എന്നിവരാണ് മരിച്ചത്.
നിഖിലും അനുവും നവ ദമ്പതികളാണ്. നവംബര്‍ 30നാണ് ഇവരുടെ വിവാഹം കഴിഞ്ഞത്. എട്ടു വര്‍ഷത്തെ പ്രണയത്തിന് ശേഷമാണ് ഇരുവരും വിവാഹിതരായത്. മലേഷ്യയിൽ മധുവിധു കഴിഞ്ഞ് വരുന്ന നിഖിലിനെയും അനുവിനെയും തിരുവനന്തപുരം വിമാനത്താവളത്തിൽ നിന്ന് കൂട്ടിക്കൊണ്ടുവരാന്‍ പോയതായിരുന്നു നിഖിലിന്‍റെ പിതാവാണ് മത്തായി ഈപ്പനും അനുവിന്‍റെ പിതാവാണ് ബിജു പി ജോര്‍ജും. തിരിച്ച് വരുന്ന വഴിക്കാണ് നാല് പേരും സഞ്ചരിച്ച മാരുത് സ്വിഫ്‌റ്റ് കാർ അപകടത്തിൽപ്പെട്ടത്.
അപകടത്തിലുൾപ്പെട്ട ബസില്‍ ഉണ്ടായിരുന്നത് ഹൈദരാബാദ് സ്വദേശികളായ 19 തീര്‍ഥാടകരാണ്. യാത്രക്കാരായ തീർത്ഥാടകർക്കും നിസാര പരിക്കുകൾ ഉണ്ട്. അപകടത്തിൽ ബസിന്റെ മുന്‍ ഭാഗം തകര്‍ന്നു. ഇവര്‍ മറ്റൊരു വാഹനത്തില്‍ യാത്ര തുടരുകയാണ്.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാം
കാർ ബസിനുള്ളിലേക്ക് ഇടിച്ചു കയറിയ നിലയിലായിരുന്നു. അപകടത്തിൽ പൂർണ്ണമായും തകർന്ന കാർ കാർ വെട്ടിപ്പൊളിച്ചാണ് യാത്രക്കാരെ പുറത്തെടുത്തത്. കാറിലുണ്ടായിരുന്നവരിൽ അനു ഒഴികെ ബാക്കിയുള്ള 3 പേരും സംഭവസ്ഥലത്ത് തന്നെ വെച്ച് മരിച്ചു. കോന്നി താലൂക്ക് ആശുപത്രിയിലെത്തിച്ച ശേഷമാണ് അനുവിന്‍റെ മരണം.
ആദ്യം ഓടിയെത്തിയ നാട്ടുകാരാണ് കാർ വെട്ടിപ്പൊളിച്ച് രക്ഷാപ്രവർത്തനം നടത്തിയത്. സ്ഥലം എസ്‌പിയുടെ നേതൃത്വത്തിൽ പൊലീസും ഫയർഫോഴ്‌സും സ്ഥലത്തെത്തി മേല്‍ നടപടികള്‍ സ്വീകരിച്ചു. അപകടകാരണത്തെക്കുറിച്ച് പൊലീസ് അന്വേഷണമാരംഭിച്ചു. മൃതദേഹങ്ങൾ കോന്നി താലൂക്കാശുപത്രിയിലും പത്തനംതിട്ടയിലെ സ്വകാര്യ ആശുപത്രി മോർച്ചറിയിലുമായി സൂക്ഷിച്ചിരിക്കുകയാണ്. നിഖിലിന്‍റെ സഹോദരി വിദേശത്ത് നിന്ന് എത്തിയതിന് ശേഷമായിരിക്കും സംസ്‌കാരം നടക്കുക.
അതേസമയം അപകടം നടന്നത് സ്ഥിരം അപകട മേഖലയിലാണെന്നും റോഡ് നിർമാണത്തിലെ അപാകതയാണ് അപകടങ്ങൾക്ക് കാരണമെന്നും നാട്ടുകാർ ആരോപിച്ചു.
കാര്‍ അമിതവേഗത്തില്‍ വന്നിടിക്കുകയായിരുന്നു എന്ന് ബസ് ഡ്രൈവര്‍: അപകടം നടക്കുന്നതിന് തൊട്ടു മുന്‍പ് കാര്‍ പോകുന്ന സിസിടിവി ദൃശ്യങ്ങള്‍ പുറത്തുന്നു. കാര്‍ അമിതവേഗത്തില്‍ വന്നിടിച്ചു എന്നാണ് തീര്‍ഥാടകര്‍ സഞ്ചരിച്ചിരുന്ന ബസിന്റെ ഡ്രൈവര്‍ സതീഷ് പറയുന്നത്. കാര്‍ വരുന്നത് കണ്ട് വേഗം കുറച്ച്‌ വശത്തേക്ക് വാഹനം ഒതുക്കി. പക്ഷേ കാര്‍ ഇടിച്ചു കയറി. ബസ് സാധാരണ വേഗത്തില്‍ മാത്രമായിരുന്നുവെന്നും ഡ്രൈവര്‍ സതീഷ് പറയുന്നു.
പത്തനംതിട്ട അപകടം ഏറെ ദുഖകരം, ശ്രദ്ധയോടെ വാഹനമോടിക്കുക എന്നതാണ് പ്രധാനം: മന്ത്രി കെബി ഗണേഷ് കുമാര്‍: പുലർച്ചെ പത്തനംതിട്ട കൂടല്‍ മുറിഞ്ഞകല്ലില്‍ ബസുമായി കാർ കൂട്ടിയിടിച്ച്‌ നാലു പേർ മരിച്ച സംഭവം അതീവ ദുഖകരമെന്ന് ഗതാഗത മന്ത്രി കെബി ഗണേഷ് കുമാർ. ഡ്രൈവർ ഉറങ്ങിപ്പോയതാണ് അപകട കാരണം എന്നതാണ് പ്രാഥമിക നിഗമനമെന്ന് അറിയുന്നു. മോട്ടോർ വെഹിക്കിള്‍ ഡിപ്പാർട്ട്മെന്‍റ് റിപ്പോർട്ട് അതാണ്.
എല്ലാവരും വളരെയധികം ശ്രദ്ധിക്കണമെന്നും അടുത്തിടെയായി അപകടങ്ങള്‍ വർധിക്കുന്നെ എന്നും മന്ത്രി പറഞ്ഞു. ഇത് മുഖ്യമന്ത്രിയുടെ ശ്രദ്ധയില്‍പ്പെടുത്തിയിട്ടുണ്ട്. പ്രത്യേക ഡ്രൈവ് നടത്താൻ തീരുമാനിച്ചിട്ടുണ്ട്. അതുകൊണ്ട് മാത്രം അപകടം കുറയ്ക്കാൻ സാധിക്കില്ല. സ്വയം നിയന്ത്രണം കൂടി വേണം. ശ്രദ്ധയോടെ വാഹനം ഓടിക്കുക എന്നതാണ് പ്രധാനമെന്നും മന്ത്രി കൂട്ടിച്ചേർത്തു. റോഡിന്‍റെ അപാകത ആണെങ്കില്‍ അത് പരിഹരിക്കുന്നതിന് നടപടി സ്വീകരിക്കുമെന്നും അദ്ദേഹം ഉറപ്പു നല്‍കി.
പത്തനംതിട്ട വാഹന അപകടം, അപകട കാരണം പരിശോധിക്കുമെന്ന് കെ യു ജനീഷ് കുമാർ എംഎല്‍എ: പത്തനംതിട്ടയിലുണ്ടായ വാഹനാപകടത്തില്‍ നാല് പേർ കൊല്ലപ്പെട്ട സംഭവത്തില്‍ സഹിക്കാൻ കഴിയുന്നതിലും അപ്പുറമാണ് വേദനയെന്ന് കെ യു ജനീഷ് കുമാർ എംഎല്‍എ മാധ്യമങ്ങളോട് പറഞ്ഞു. രണ്ടാഴ്‌ച മുന്‍പ് നടന്ന നിഖിലിൻ്റെയും അനുവിൻ്റെയും വിവാഹത്തില്‍ താനും പങ്കെടുത്തിരുന്നു. അപകട കാരണം പരിശോധിക്കും.
റോഡിന്‍റെ നിർമാണം പൂർത്തിയായി വരുന്നതേ ഉള്ളൂ. ടാറിങ് കഴിഞ്ഞത് മുതല്‍ എല്ലാ വാഹനങ്ങളും ഇതുവഴിയാണ് വരുന്നത്. മുന്നറിയിപ്പ് ബോർഡ് സ്ഥാപിച്ചു വരുന്നതെ ഉള്ളൂവെന്നും റോഡ് നല്ല നിലയില്‍ കിടക്കുന്നത് കൊണ്ടുതന്നെ വാഹനങ്ങള്‍ അമിത വേഗതയെടുക്കാറുണ്ടെന്നാണ് നാട്ടുകാർ പറയുന്നുന്നതെന്നും എംഎല്‍എ പറഞ്ഞു. വാഹനം അമിത വേഗതയില്‍ ആയിരുന്നെന്നും കാറിലുള്ളവർ ഉറങ്ങിപ്പോകാനുള്ള സാധ്യതയാണ് അപകടത്തിന് കാരണമായതായാണ് പൊലീസ് പറയുന്നതെന്നും എഎല്‍എ പറഞ്ഞു.
Also Read: ബൈക്കിൽ പോകുന്ന വിദ്യാർഥികൾക്ക് നേരെ കാട്ടാന പന മറിച്ചിട്ടു; വിദ്യാർഥിനിക്ക് ദാരുണാന്ത്യം
