ധരംശാല : ഐപിഎല്ലില്‍ പ്ലേ ഓഫ് പ്രതീക്ഷകള്‍ സജീവമാക്കാൻ ചെന്നൈ സൂപ്പര്‍ കിങ്സ് ഇന്നിറങ്ങും. നിലനില്‍പ്പിനായി പോരടിക്കുന്ന പഞ്ചാബ് കിങ്സ് ആണ് മത്സരത്തില്‍ സൂപ്പര്‍ കിങ്‌സിന്‍റെ എതിരാളികള്‍. ധരംശാലയില്‍ ഉച്ചയ്‌ക്ക് മൂന്നരയ്‌ക്കാണ് മത്സരം ആരംഭിക്കുന്നത്.
കഴിഞ്ഞ കളിയില്‍ ചെപ്പോക്കില്‍ കയറി ചെന്നൈ സൂപ്പര്‍ കിങ്‌സിനെ തോല്‍പ്പിക്കാനായതിന്‍റെ ആത്മവിശ്വാസത്തിലാണ് പഞ്ചാബ് കിങ്സ് ഇന്ന് ഇറങ്ങുന്നത്. അവസാന മത്സരത്തില്‍ ഏഴ് വിക്കറ്റിനായിരുന്നു പഞ്ചാബിന്‍റെ ജയം. ഇന്ന് ധരംശാലയില്‍ സൂപ്പര്‍ കിങ്‌സിനെ നേരിടാൻ ഇറങ്ങുമ്പോള്‍ അവര്‍ക്കെതിരെ ഐപിഎല്‍ ചരിത്രത്തിലെ തുടര്‍ച്ചയായ ആറാം ജയം കൂടിയാണ് പഞ്ചാബ് കിങ്സ് ലക്ഷ്യമിടുന്നത്.
പോയിന്‍റ് പട്ടികയിലെ എട്ടാം സ്ഥാനക്കാരായ പഞ്ചാബ് കിങ്‌സിനും ഇന്നത്തെ മത്സരം ഏറെ നിര്‍ണായകമാണ്. മത്സരത്തില്‍ തോല്‍വി വഴങ്ങിയാല്‍ അവരുടെ പ്ലേ ഓഫ് മോഹങ്ങള്‍ ഏറെക്കുറെ അവസാനിക്കും. അതുകൊണ്ട് തന്നെ കനത്ത പോരാട്ടം കാഴ്‌ചവയ്‌ക്കാനാകും പഞ്ചാബിന്‍റെ ശ്രമം.
വെറ്ററൻ ബാറ്റര്‍ ശിഖര്‍ ധവാൻ പരിക്കില്‍ നിന്നും പൂര്‍ണമായി മുക്തനാകാത്ത സാഹചര്യത്തില്‍ സാം കറന് കീഴില്‍ കാര്യമായ മാറ്റങ്ങള്‍ ഇല്ലാതെ തന്നെയാകും പഞ്ചാബ് ഇന്ന് കളിക്കാൻ ഇറങ്ങുക. ജോണി ബെയര്‍സ്റ്റോ, ശശാങ്ക് സിങ്, അഷുതോഷ് ശര്‍മ എന്നിവരുടെ പ്രകടനം ബാറ്റിങ്ങിലും ഹര്‍പ്രീത് ബ്രാര്‍, അര്‍ഷ്‌ദീപ് സിങ്, ഹര്‍ഷല്‍ പട്ടേല്‍ എന്നിവരുടെ പ്രകടനം ബൗളിങ്ങിലും പഞ്ചാബിന് നിര്‍ണായകമാകും.
മറുവശത്ത് 2021ന് ശേഷം പഞ്ചാബ് കിങ്സിനെതിരെ ജയിക്കാനായിട്ടില്ലെന്ന ചീത്തപ്പേര് മാറ്റിയെടുക്കാനാണ് ചെന്നൈ സൂപ്പര്‍ കിങ്‌സിന്‍റെ വരവ്. പോയിന്‍റ് പട്ടികയിലെ അഞ്ചാം സ്ഥാനക്കാരായ അവര്‍ക്ക് പ്ലേ ഓഫ് പ്രതീക്ഷകള്‍ നിലനിര്‍ത്താൻ ഇന്നത്തെ കളിയില്‍ ജയം അനിവാര്യമാണ്. സീസണില്‍ ഇതുവരെയുള്ള പത്ത് കളിയില്‍ അഞ്ച് ജയം സ്വന്തമാക്കിയ ചെന്നൈയ്‌ക്ക് 10 പോയിന്‍റാണ് നിലവില്‍.
ഇന്ന് പഞ്ചാബിനെ നേരിടാൻ ഇറങ്ങുമ്പോള്‍ ബൗളിങ് ഡിപ്പാര്‍ട്‌മെന്‍റിലാണ് ചെന്നൈയുടെ ആശങ്ക. മുസ്‌തഫിസുര്‍ റഹ്മാൻ നാട്ടിലേക്ക് മടങ്ങിയതും ദീപക് ചഹാറിന്‍റെ പരിക്കും സൂപ്പര്‍ കിങ്‌സിനെ വലയ്‌ക്കുമെന്ന് ഉറപ്പ്. അസുഖബാധിതനായതിനെ തുടര്‍ന്ന് കഴിഞ്ഞ കളി നഷ്‌ടമായ തുഷാര്‍ ദേശ്‌പാണ്ഡെ ടീമിലേക്ക് മടങ്ങിയെത്തിയേക്കുമെന്നാണ് സൂചന.
പേസര്‍ മുകേഷ് ചൗധരിയ്‌ക്കും ഇന്ന് ടീമില്‍ അവസരം ലഭിച്ചേക്കാം. നായകൻ റിതുരാജ് ഗെയ്‌ക്‌വാദിന്‍റെ ബാറ്റിങ് കരുത്തിലാണ് സിഎസ്‌കെ പ്രതീക്ഷ വയ്‌ക്കുന്നത്. ശിവം ദുബെ, ഡാരില്‍ മിച്ചല്‍, എംഎസ് ധോണി എന്നിവരും ടീമിന്‍റെ റണ്‍സ് പ്രതീക്ഷകളാണ്.
കഴിഞ്ഞ ഏഴ് വര്‍ഷത്തില്‍ ആകെ രണ്ട് ടി20 മത്സരങ്ങള്‍ക്ക് മാത്രം വേദിയായ ധരംശാലയിലാണ് ഇന്ന് പഞ്ചാബ് ചെന്നൈ മത്സരം നടക്കുന്നത്. നേരത്തെ, ഇവിടെ നടന്ന രണ്ട് മത്സരങ്ങളിലും വമ്പൻ സ്കോറുകളാണ് പിറന്നത്. കഴിഞ്ഞ വര്‍ഷം പഞ്ചാബും ഡല്‍ഹിയും ധരംശാലയില്‍ തമ്മിലേറ്റുമുട്ടിയ മത്സരത്തില്‍ ആദ്യം ബാറ്റ് ചെയ്‌ത ഡല്‍ഹി 213 റണ്‍സ് നേടി 15 റണ്‍സിന്‍റെ ജയമാണ് സ്വന്തമാക്കിയത്.
പഞ്ചാബ് കിങ്സ് സാധ്യത ടീം: പ്രഭ്‌സിമ്രാൻ സിങ്, ജോണി ബെയര്‍സ്റ്റോ, റിലീ റൂസോ, ശശാങ്ക് സിങ്, സാം കറൻ (ക്യാപ്‌റ്റൻ), ജിതേഷ് ശര്‍മ (വിക്കറ്റ് കീപ്പര്‍), അഷുതോഷ് ശര്‍മ, ഹര്‍പ്രീത് ബ്രാര്‍, കഗിസോ റബാഡ, ഹര്‍ഷല്‍ പട്ടേല്‍, അര്‍ഷ്‌ദീപ് സിങ്, രാഹുല്‍ ചഹാര്‍.
ചെന്നൈ സൂപ്പര്‍ കിങ്സ് സാധ്യത ടീം: റിതുരാജ് ഗെയ്‌ക്‌വാദ് (ക്യാപ്‌റ്റൻ), അജിങ്ക്യ രഹാനെ, ഡാരില്‍ മിച്ചല്‍, ശിവം ദുബെ, മൊയീൻ അലി, എംഎസ് ധോണി (വിക്കറ്റ് കീപ്പര്‍), രവീന്ദ്ര ജഡേജ, ശര്‍ദുല്‍ താക്കൂര്‍, തുഷാര്‍ ദേശ്‌പാണ്ഡെ, മഹീഷ് തീക്ഷണ/മിച്ചല്‍ സാന്‍റ്‌നര്‍, മതിഷ പതിരണ, മുകേഷ് ചൗധരി.
